ଭାରତୀୟ ଚଳଚ୍ଚିତ୍ର ଜଗତର ଏକ ମହାନ କଳାକାର, ବଲିଉଡର ‘ହି-ମ୍ୟାନ୍’ ଧର୍ମେନ୍ଦ୍ର ଦେଓଲ ଆଜି ୮୯ ବର୍ଷ ବୟସରେ ପରଲୋକ ଗମନ କରିଛନ୍ତି । ଧର୍ମେନ୍ଦ୍ରଙ୍କ ସ୍ୱାସ୍ଥ୍ୟ କିଛି ଦିନ ହେଲା ଅବନତି ଘଟିଥିଲା । ୧୨ ନଭେମ୍ବରରେ ହସ୍ପିଟାଲ୍ରୁ ଡିସ୍ଚାର୍ଜ୍ ହୋଇଥିବାବେଳେ ଆଜି ସକାଳେ ତାଙ୍କ ଜୁହୁ ଘରେ ସେ ଶେଷ ନିଶ୍ବାସ ତ୍ୟାଗ କରିଥିଲେ । ଧର୍ମେନ୍ଦ୍ର ୧୯୬୦ ଦଶକରୁ ୧୯୮୦ ଦଶକ ପର୍ଯ୍ୟନ୍ତ ଅନେକ ହିଟ ଫିଲ୍ମ ଦେଇଥିଲେ । ଶୋଲେ’, ‘ଧର୍ମବୀର’, ‘ରାମ ବଳରାମ’ ଭଳି ଅନେକ ହିଟ୍ ଚଳଚ୍ଚିତ୍ରରେ ତାଙ୍କ ଅଭିନୟ ଦର୍ଶକ ମନ ମୋହି ଥିଲା । ତାଙ୍କ ପୁଅ ସନ୍ନି ଦେଓଲ ଓ ବବି ଦେଓଲ ମଧ୍ୟ ବଲିଉଡର ସଫଳ କଳାକାର। ମୁମ୍ବାଇର ଭିଲେ ପାର୍ଲେ ଶ୍ମଶାନରେ ଆତ୍ମୀୟସ୍ଵଜନଙ୍କ ଗହଣରେ ତାଙ୍କର ଶେଷକୃତ୍ୟ ସମ୍ପନ୍ନ ହୋଇଛି । ତାଙ୍କ ପତ୍ନୀ ହେମା ମାଲିନୀ ଓ କନ୍ୟା ଏଶା ଦେଓଲ ସମେତ ପରିବାରଜନମାନେ ଶେଷଯାତ୍ରାରେ ସାମିଲ ହୋଇଥିଲେ ।
ଆମିତାଭ ବଚ୍ଚନ୍, ଆମିର୍ ଖାନ୍ ଭଳି ଅନେକ ସେଲିବ୍ରିଟିମାନେ ମଧ୍ୟ ଶୋକ ପ୍ରକାଶ କରିଛନ୍ତି । ଧର୍ମେନ୍ଦ୍ରଙ୍କ ମୃତ୍ୟୁ ସହିତ ଭାରତୀୟ ସିନେମାର ଏକ ଗୌରବମୟ ଅଧ୍ୟାୟ ଶେଷ ହୋଇଛି ବୋଲି କହିଛନ୍ତି । ତାଙ୍କ ବିୟୋଗରେ ସମଗ୍ର ଦେଶବାସୀ ଶୋକ ପ୍ରକାଶ କରୁଛନ୍ତି । ଦୀର୍ଘ ଦିନ ଧରି ଧର୍ମେନ୍ଦ୍ର ଅସୁସ୍ଥ ଥିଲେ। କିଛି ଦିନ ପୂର୍ବରୁ ଅସୁସ୍ଥତା କାରଣରୁ ଧର୍ମେନ୍ଦ୍ର ଡାକ୍ତରଖାନାରେ ଭର୍ତ୍ତି ହୋଇଥିଲେ। ସେତେବେଳେ ତାଙ୍କର ଦେହାନ୍ତ ହୋଇଥିବା ନେଇ ଗୁଜବ ହୋଇଥିଲା। ପରେ ସେ ଜୀବତ ଥିବା ପରିବାର ଲୋକେ ସ୍ପଷ୍ଟ କରିଥିଲେ। ସ୍ଵାସ୍ଥ୍ୟାବସ୍ଥାରେ ସୁଧାର ଆସିବା ପରେ ଧର୍ମେନ୍ଦ୍ର ଡାକ୍ତରଖାନରୁ ଘରକୁ ଫେରିଥିଲେ। ତେବେ ମାତ୍ର କିଛି ଦିନ ପରେ ତାଙ୍କର ଦେହାନ୍ତ ଖବର ଆସିଛି।
୧୯୬୦ରେ ହିନ୍ଦୀ ସିନେମା ‘ଦିଲ ଭି ତେରା ହମ ଭି ତେରେ’ ଜରିଆରେ ବଲିଉଡକୁ ଏଣ୍ଟ୍ରି କରିଥିଲେ ଧର୍ମେନ୍ଦ୍ର। ୩୦୦ ଶହରୁ ଅଧିକ ସିନେମାରେ ନିଜ ଅଭିନୟରେ ଦର୍ଶକଙ୍କ ହୃଦୟ ଜିଣିଛନ୍ତି ଧର୍ମେନ୍ଦ୍ର।
୧୯୯୭ରେ ତାଙ୍କୁ ଫିଲ୍ମ ଫେୟାର ଲାଇଫ୍ ଟାଇମ୍ ଆଚିଭମେଣ୍ଟ ସମ୍ମାନ ମିଳିଥିବା ବେଳେ ୨୦୧୧ରେ ତାଙ୍କୁ ଦାଦା ସାହେବ ଫାଲକେ ପୁରସ୍କାର ପ୍ରଦାନ କରାଯାଇଥିଲା। ୨୦୧୨ ମସିହାରେ ଧର୍ମେନ୍ଦ୍ର ପଦ୍ମଭୂଷଣ ସମ୍ମାନରେ ସମ୍ମାନିତ ହୋଇଥିଲେ।
