ଭୁବନେଶ୍ୱରରୁ ନିଖୋଜ ମହିଳା କନଷ୍ଟେବଳ ଶୁଭମିତ୍ରା ସାହୁଙ୍କ ଗଳିତ ମୃତଦେହ ବୁଧବାର ଅପରାହ୍ନରେ କେନ୍ଦୁଝର ଜିଲ୍ଲାର ଘଟଗାଁ ଅଞ୍ଚଳରୁ ଉଦ୍ଧାର ହୋଇଛି। ଜଙ୍ଗଲ ମଧ୍ୟରେ ଏକ ପରିତ୍ୟକ୍ତ ସ୍ଥାନରୁ ଜେସିବି ସାହାଯ୍ୟରେ ମୃତଦେହ ଉଦ୍ଧାର କରାଯାଇଛି।
ମୃତଦେହଟି ସିମେଣ୍ଟ ଅଖା ଭିତରେ ବନ୍ଧା ଅବସ୍ଥାରେ ମିଳିଥିବା ବେଳେ ମାଜିଷ୍ଟ୍ରେଟଙ୍କ ଉପସ୍ଥିତିରେ ଏହା ଉଠାଯାଇଛି। ପୁଲିସ କମିସନର ସୁରେଶ ଦେବଦତ୍ତ ସିଂହଙ୍କ କହିବା ଅନୁସାରେ, ଶୁଭମିତ୍ରା ୬ ସେପ୍ଟେମ୍ବରରୁ ଡ୍ୟୁଟିରେ ଥିଲେ। ୭ ତାରିଖରୁ ତାଙ୍କ ନିଖୋଜ ନେଇ କ୍ୟାପିଟାଲ ଥାନାରେ ଅଭିଯୋଗ ହୋଇଥିଲା। ତଦନ୍ତ ଆରମ୍ଭ ପରେ ପୁଲିସ ଜାଣିବାକୁ ପାଇଥିଲା ଯେ, ଶୁଭମିତ୍ରା ଶେଷଥର ଦୀପକ ରାଉତଙ୍କ ସହ ଯୋଗାଯୋଗରେ ଥିଲେ।
ଏହା ଆଧାରରେ ଦୀପକଙ୍କ ଉପରେ ସନ୍ଦେହ ହୋଇଥିଲା। ପ୍ରମାଣ ସଂଗ୍ରହ ପରେ ଦୀପକଙ୍କୁ ଗିରଫ କରାଯାଇଛି। ସେ ହତ୍ୟା ପରେ ନିଜେ ବା ସହଯୋଗୀଙ୍କ ସାହାଯ୍ୟରେ ମୃତଦେହ ଲୁଚାଇଥିବା ଜଣାପଡ଼ିଛି। କମିସନରଙ୍କ କହିବା ମୁତାବକ, ଦୀପକ ଶୁଭମିତ୍ରାଙ୍କଠାରୁ ପୂର୍ବରୁ ୧୦ ଲକ୍ଷ ଟଙ୍କା ଧାର ନେଇଥିଲେ। ଏହି ଟଙ୍କା ଫେରାଇବା ନେଇ ଉଭୟଙ୍କ ମଧ୍ୟରେ ବଚସା ହୋଇଥିଲା, ଯାହା ହତ୍ୟାର କାରଣ ହୋଇଥାଇପାରେ ବୋଲି ପୁଲିସ ସନ୍ଦେହ କରୁଛି। ଏହା ସହିତ, ଶୁଭମିତ୍ରାଙ୍କ ନାମରେ ୧ କୋଟି ଟଙ୍କାର ବୀମା ଥିବା ଜଣାପଡ଼ିଛି। ଏହି ଟଙ୍କା ହଡ଼ପ କରିବା ଉଦ୍ଦେଶ୍ୟରେ ମଧ୍ୟ ହତ୍ୟା ହୋଇଥାଇପାରେ ବୋଲି ଅନୁମାନ କରାଯାଉଛି।
ତଦନ୍ତ ଜାରି ରହିଛି। ସୂଚନାଯୋଗ୍ୟ, ୬ ସେପ୍ଟେମ୍ବରରେ ଶୁଭମିତ୍ରା ଡିସିପି କାର୍ଯ୍ୟାଳୟରେ ଡ୍ୟୁଟି କରି ସନ୍ଧ୍ୟା ୭ଟାରେ ଭଡ଼ା ଘରକୁ ଫେରିଥିଲେ। ଏହାପରେ ତାଙ୍କ ମୋବାଇଲ୍ ବନ୍ଦ ହୋଇଯାଇଥିଲା। ଦୁଇ ଦିନ ଯୋଗାଯୋଗ ନହେବାରୁ ତାଙ୍କ ପିତା କ୍ୟାପିଟାଲ ଥାନାରେ ନିଖୋଜ ଅଭିଯୋଗ ଦାଖଲ କରିଥିଲେ। ତଦନ୍ତରେ କଲ୍ ଡିଟେଲ୍ସ ଆଧାରରେ ଦୀପକଙ୍କ ସମ୍ପୃକ୍ତି ଜଣାପଡ଼ିଥିଲା। ଦୀର୍ଘ ଜେରା ପରେ ସେ ଅପରାଧ ସ୍ୱୀକାର କରିଥିଲେ। ସେ କହିଛନ୍ତି, ଭୁବନେଶ୍ୱରରେ ତଣ୍ଟି ଚିପି ହତ୍ୟା କରି ମୃତଦେହକୁ କେନ୍ଦୁଝର ନେଇଥିଲେ। ହତ୍ୟାରେ ବ୍ୟବହୃତ କାର ଜବତ କରାଯାଇ କ୍ୟାପିଟାଲ ଥାନା ପୁଲିସ ତଦନ୍ତ ଜାରି ରଖିଛି। ଅଭିଯୁକ୍ତ ଦୀପକ ଗିରଫ ହୋଇଛନ୍ତି।
