ଭୁବନେଶ୍ୱର: ରାଜ୍ୟରେ ସାଇବର ଓ ଆର୍ଥିକ ଠକେଇର ଗ୍ରାଫ୍‌ ଏବେ ଆକାଶଛୁଆଁ ହୋଇଥିବା ବେଳେ ଓଡ଼ିଶା ଅର୍ଥନୈତିକ ଅପରାଧ ଶାଖା (EOW) ଏକ ବଡ଼ ଧରଣର ସଫଳତା ପାଇଛି। ସେୟାର ମାର୍କେଟରେ ନିବେଶ କରି ଅଧିକ ମୁନାଫା ପାଇବାର ଲୋଭ ଦେଖାଇ ଲୋକଙ୍କୁ କୋଟି କୋଟି ଟଙ୍କା ଚୂନ ଲଗାଇଥିବା ମହାଠକ ଅମିତ ମଣ୍ଡଳକୁ EOW ଗିରଫ କରିଛି। ପଶ୍ଚିମବଙ୍ଗର ବାଙ୍କୁରା ଅଞ୍ଚଳରୁ ତାକୁ ଗିରଫ କରାଯାଇ ଓଡ଼ିଶା ଅଣାଯାଇଛି।

କୋଟିପତି ହେବାର ଲୋଭ ଦେଖାଇ ଲୁଟିଲେ ୧୨୦ କୋଟି

ଅଭିଯୁକ୍ତ ଅମିତ ମଣ୍ଡଳ ଏବଂ ତା’ର ଗ୍ୟାଙ୍ଗ ସେୟାର ଟ୍ରେଡିଂ ମାଧ୍ୟମରେ ରାତାରାତି କୋଟିପତି ହେବାର ମିଥ୍ୟା ସ୍ୱପ୍ନ ଦେଖାଇ ଲୋକଙ୍କୁ ନିଜ ଜାଲରେ ଫସାଉଥିଲେ। EOW ର ସୂଚନା ଅନୁଯାୟୀ, ଏହି ଗ୍ୟାଙ୍ଗ ଓଡ଼ିଶାରୁ ପ୍ରାୟ ୫୦୦ ଏବଂ ପଶ୍ଚିମବଙ୍ଗରୁ ୧୦୦ ଜଣ ନିବେଶକଙ୍କୁ ଠକି ପ୍ରାୟ ୧୨୦ କୋଟି ଟଙ୍କା ହଡ଼ପ କରିଛନ୍ତି। ଅଧିକାଂଶ ନିବେଶକ ଅଧିକ ରିଟର୍ଣ୍ଣ ଆଶାରେ ନିଜର ସଞ୍ଚିତ ଅର୍ଥ ଏହି ଠକଙ୍କ ପାଖରେ ନିବେଶ କରି ସର୍ବସ୍ୱାନ୍ତ ହୋଇଛନ୍ତି।

ଅନ୍ତଃରାଜ୍ୟ ଠକେଇର ଚେର

ଅମିତ ମଣ୍ଡଳ କେବଳ ଓଡ଼ିଶା ନୁହେଁ, ବରଂ ପଶ୍ଚିମବଙ୍ଗରେ ମଧ୍ୟ ଠକେଇର ଏକ ବଡ଼ ନେଟୱାର୍କ ଚଲାଉଥିଲା। ବିଭିନ୍ନ ସୋସିଆଲ ମିଡିଆ ପ୍ଲାଟଫର୍ମ ଏବଂ ଆପ୍ ମାଧ୍ୟମରେ ସେ ଲୋକଙ୍କୁ ବିଶ୍ୱାସକୁ ନେଉଥିଲା। ତେବେ ଠକେଇ ଟଙ୍କା କେଉଁ କେଉଁ ବ୍ୟାଙ୍କ ଆକାଉଣ୍ଟକୁ ଯାଇଛି ଏବଂ ଏଥିରେ ଆଉ କେଉଁ ବଡ଼ ମୁଣ୍ଡ ସାମିଲ ଅଛନ୍ତି, ସେ ନେଇ EOW ଅଭିଯୁକ୍ତକୁ ରିମାଣ୍ଡରେ ଆଣି ଜେରା କରିବାକୁ ପ୍ରସ୍ତୁତି ଚଲାଉଛି।