ସୋସିଆଲ୍ ମିଡ଼ିଆରେ ରିଲ୍ସ ବନାଇବାର ନିଶା ଶେଷରେ ଜୀବନ ନେଇଗଲା। ଏହି ନିଶା ଏତେ ଘାରିଲା ଯେ, ଦୁଇ ଯୁବକ ସାଳନ୍ଦୀ ନଦୀରେ ଡେଇଁ ବଡ଼ ଅଘଟଣ ଘଟାଇଛନ୍ତି। ଏହି ଘଟଣାରେ ଜଣେ ଯୁବକ ନିଖୋଜ ହୋଇଯାଇଛନ୍ତି ଏବଂ ତାଙ୍କୁ ଖୋଜିବା ପାଇଁ ଅଗ୍ନିଶମ ବାହିନୀ ଓ ପୋଲିସ୍ ତରଫରୁ ସର୍ଚ୍ଚ ଅପରେସନ୍ ଜାରି ରହିଛି।

ଘଟଣାଟି ଭଦ୍ରକ ପୁରୁଣା ବଜାର ଥାନା ଅନ୍ତର୍ଗତ ସନ୍ଥିଆ ବ୍ରିଜ୍ ନିକଟରେ ଘଟିଛି। କେନ୍ଦୁଝର ଜିଲ୍ଲାର ଦୁଇ ଯୁବକ ହିମାଂଶୁ ଶେଖର ନାୟକ ଓ ମିଥୁନ ନାୟକ ଭଦ୍ରକରେ କାମ କରୁଥିଲେ। ସେମାନେ ସନ୍ଥିଆ ବ୍ରିଜ୍ ଉପରୁ ସାଳନ୍ଦୀ ନଦୀକୁ ଡେଇଁ ରିଲ୍ସ ବନାଉଥିଲେ। ପ୍ରଥମେ ହିମାଂଶୁ ଶେଖର ନାୟକ ନଦୀକୁ ଡେଇଁଥିଲେ। ତାଙ୍କ ପରେ ମିଥୁନ ନାୟକ ମଧ୍ୟ ବ୍ରିଜ୍ ଉପରୁ ନଦୀକୁ ଡେଇଁଥିଲେ। ହିମାଂଶୁ ପହଁରି ନଦୀ ପାର୍ଶ୍ୱକୁ ଆସିଯାଇଥିଲେ, କିନ୍ତୁ ମିଥୁନ ନଦୀରେ ଡେଇଁବା ପରେ ଉଠି ପାରିଲେ ନାହିଁ ଏବଂ ନିଖୋଜ ହୋଇଯାଇଥିଲେ।

ଏହି ଦୃଶ୍ୟ ଦେଖି ସ୍ଥାନୀୟ ଲୋକେ ଆତଙ୍କିତ ହୋଇ ତୁରନ୍ତ ଅଗ୍ନିଶମ ବାହିନୀକୁ ଖବର ଦେଇଥିଲେ। ଖବର ପାଇ ଅଗ୍ନିଶମ ବାହିନୀ ଏବଂ ପୋଲିସ୍ ଟିମ୍ ଘଟଣାସ୍ଥଳରେ ପହଞ୍ଚି ତୁରନ୍ତ ସର୍ଚ୍ଚ ଅପରେସନ୍ ଆରମ୍ଭ କରିଛନ୍ତି। ଡାଇଭରମାନେ ନଦୀରେ ଖୋଜାଖୋଜି କରୁଛନ୍ତି। ପୋଲିସ୍ ପକ୍ଷରୁ ରିଲ୍ସ ସୁଟିଂ କରୁଥିବା ତୃତୀୟ ଯୁବକକୁ ଅଟକ ରଖି ଜେରା କରାଯାଉଛି।

ପୋଲିସ୍ ଘଟଣାର ତଦନ୍ତ କରୁଛି ଏବଂ ନିଖୋଜ ଯୁବକ ମିଥୁନ ନାୟକଙ୍କୁ ଖୋଜିବା ପାଇଁ ସମସ୍ତ ପ୍ରୟାସ ଜାରି ରହିଛି। ଏହି ଘଟଣା ରିଲ୍ସ ବନାଇବାର ଅନ୍ଧ ନିଶା କେତେ ବିପଜ୍ଜନକ ହୋଇପାରେ ତାହାର ଏକ ଦୁଃଖଦ ଉଦାହରଣ ପାଲଟିଛି। ଆଜିକାଲିର ଯୁବକମାନେ ରିଲ୍ସ ପାଇଁ ଏତେ ବେପରୁଆ ହୋଇଯାଉଛନ୍ତି ଯେ, ନିଜ ଜୀବନକୁ ବି ବିପଦରେ ପକାଇବାକୁ ପଛଉ ନାହାନ୍ତି।

ବର୍ତ୍ତମାନ ପର୍ଯ୍ୟନ୍ତ ନିଖୋଜ ଯୁବକ ମିଥୁନ ନାୟକଙ୍କ କୌଣସି ଖୋଜ ଖବର ମିଳିନାହିଁ। ଉଦ୍ଧାର ଅଭିଯାନ ରାତି ପର୍ଯ୍ୟନ୍ତ ଜାରି ରହିବ ବୋଲି ଅଗ୍ନିଶମ ବାହିନୀ ପକ୍ଷରୁ କୁହାଯାଇଛି।ଏହି ଘଟଣାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ଚାଞ୍ଚଲ୍ୟ ପ୍ରକାଶ ପାଇଛି। ସେମାନେ ଯୁବପିଢ଼ିଙ୍କୁ ରିଲ୍ସ ନିଶାରୁ ଦୂରେଇ ରହିବାକୁ ଏବଂ ଜୀବନର ସୁରକ୍ଷାକୁ ପ୍ରାଥମିକତା ଦେବାକୁ ଅନୁରୋଧ କରିଛନ୍ତି।