ଆଇସିସି ମହିଳା କ୍ରିକେଟ୍ ବିଶ୍ୱକପ୍ ୨୦୨୫ର ଫାଇନାଲ୍ ମୁକାବିଲା ଆଜି ଡି.ୱାଇ. ପାଟିଲ୍ ଷ୍ଟାଡିୟମ୍ରେ ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଅନୁଷ୍ଠିତ ହେଉଛି। ଫାଇନାଲ୍ରେ ଭାରତ ଏବଂ ପ୍ରଥମ ଥର ଫାଇନାଲ୍ ଖେଳିବାକୁ ଯାଉଥିବା ଦକ୍ଷିଣ ଆଫ୍ରିକା ମୁହାଁମୁହିଁ ହେଉଛନ୍ତି। ହରମନପ୍ରୀତ୍ କୌରଙ୍କ ଦଳ ନବି ମୁମ୍ବାଇର ଡିୱାଇ ପାଟିଲ ଷ୍ଟାଡିୟମ୍ରେ ନୂଆ ଇତିହାସ ରଚିବାର ଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇଛି। ତୃତୀୟ ଥର ଫାଇନାଲ୍ ଖେଳିବାକୁ ଯାଉଥିବା ଟିମ୍ ଇଣ୍ଡିଆ ଏଥର ବିଜୟୀ ହେବାପାଇଁ ପଡ଼ିଆକୁ ଓହ୍ଲାଇଛି । ଦକ୍ଷିଣ ଆଫ୍ରିକା ବିଜୟୀ ହେଲେ ପ୍ରଥମ ଥର କୌଣସି ବର୍ଗର ବିଶ୍ବକପ୍ ହାସଲ କରିବ। ବର୍ଷା କାରଣରୁ ମ୍ୟାଚ୍ ବିଳମ୍ବ ହେବା ପରେ ଦକ୍ଷିଣ ଆଫ୍ରିକାର ଅଧିନାୟିକା ଲୌରା ୱୋଲଭାର୍ଟ ଟସ୍ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଛନ୍ତି। ଅଧିନାୟିକା ହରମନପ୍ରୀତ କୌରଙ୍କ ନେତୃତ୍ୱରେ ଭାରତୀୟ ଦଳର ବ୍ୟାଟିଂ ଶକ୍ତି ଉପରେ ଏବେ ସମସ୍ତଙ୍କ ନଜର ରହିଛି। ସେମିଫାଇନାଲରେ ରେକର୍ଡ ସ୍କୋରକୁ ପିଛା କରି ଚିରପ୍ରତିଦ୍ୱନ୍ଦ୍ୱୀ ଅଷ୍ଟ୍ରେଲିଆକୁ ହରାଇବା ପରେ ଭାରତୀୟ ଦଳର ମନୋବଳ ଦୃଢ଼ ରହିଛି। ସେମି ଫାଇନାଲରେ ଯେଉଁ ଖେଳାଳି ଖେଳୁଥିଲେ ଆଜି ସମାନ ଖେଳାଳି ଖେଳୁଛନ୍ତି । ଭାରତ ବିନା ଉଇକେଟ ହରାଇ 50 ରନ କରିଛି । ସ୍ମୃତି -ସେଫାଳି ବ୍ୟାଟିଂ କରୁଛନ୍ତି ।
ଭାରତ ପୂର୍ବରୁ ୨୦୦୫ ଏବଂ ୨୦୧୭ ମହିଳା ଦିନିକିଆ ବିଶ୍ୱକପ୍ ଫାଇନାଲ୍ରେ ପହଞ୍ଚିଥିଲେ ମଧ୍ୟ ଟାଇଟଲ୍ ଜିତିବାରେ ବିଫଳ ହୋଇଥିଲା। ତେଣୁ ଏହା ଭାରତ ପାଇଁ ତୃତୀୟ ସୁଯୋଗ।
ଦକ୍ଷିଣ ଆଫ୍ରିକା ମହିଳା ଟିମ୍ ପାଇଁ ପ୍ରଥମ ବିଶ୍ୱକପ୍ ଫାଇନାଲ୍। ସେମାନେ ସେମିଫାଇନାଲ୍ରେ ୪ ଥରର ଚାମ୍ପିୟନ୍ ଇଂଲଣ୍ଡକୁ ବଡ଼ ବ୍ୟବଧାନରେ ହରାଇ ଫାଇନାଲରେ ପ୍ରବେଶ କରିଛନ୍ତି।
ଭାରତ ବ୍ୟାଟିଂରେ ସ୍ମୃତି ମନ୍ଧାନା, ଜେମିମା ରୋଡ୍ରିଗସ୍, ଓ ଅଧିନାୟିକା ହରମନପ୍ରୀତ କୌର ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବେ। ବୋଲିଂରେ ଦୀପ୍ତି ଶର୍ମା ଏବଂ ରେଣୁକା ସିଂହ ଠାକୁର ଘାତକ ସାବ୍ୟସ୍ତ ହୋଇପାରନ୍ତି।
ଦକ୍ଷିଣ ଆଫ୍ରିକା ଦଳର ଅଧିନାୟିକା ଲୌରା ୱୋଲଭାର୍ଟ (ଟୁର୍ଣ୍ଣାମେଣ୍ଟର ସର୍ବାଧିକ ରନ୍ ସଂଗ୍ରହକାରୀ) ଏବଂ ଅଲରାଉଣ୍ଡର ମାରିଜାନ୍ କାପ୍ପ ଓ କ୍ଲୋ ଟ୍ରୟନ୍ ଙ୍କ ଉପରେ ଦଳ ନିର୍ଭର କରିବ ।
