କଂଗ୍ରେସ ନେତା ରାହୁଲ ଗାନ୍ଧୀ ୫ ନଭେମ୍ବର ୨୦୨୫ରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ହରିୟାଣା ବିଧାନସଭା ନିର୍ବାଚନ ୨୦୨୪ରେ ହୋଇଥିବା ‘ଭୋଟ୍ ଚୋରି’ ମାମଲାକୁ ନେଇ ଗୁରୁତର ଅଭିଯୋଗ ଆଣିଥିଲେ। ସେ ଦାବି କରିଛନ୍ତି ଯେ ହରିୟାଣାର ଭୋଟର ତାଲିକାରେ ପ୍ରାୟ ୨୫ ଲକ୍ଷ ଜାଲ୍ ଭୋଟର ଅଛନ୍ତି। ସେ ଏକ ଉଦାହରଣ ଦେଇ କହିଥିଲେ ଯେ ଜଣେ ମହିଳାଙ୍କର ଫଟୋ ୧୦ଟି ଭିନ୍ନ ଭିନ୍ନ ବୁଥ୍ରେ ୨୨ ଥର ଅଲଗା ଅଲଗା ନାମରେ ସୀମା, ସ୍ୱିଟୀ, ସରସ୍ୱତୀ, ରଶ୍ମି, ୱିଲ୍ମା ଇତ୍ୟାଦି ବ୍ୟବହୃତ ହୋଇଛି। ରାହୁଲ ଗାନ୍ଧୀ ପ୍ରଶ୍ନ କରିଥିଲେ, “ଏହି ବ୍ରାଜିଲୀୟ ମଡେଲ୍ ହରିୟାଣାରେ ୨୨ ଥର ଭୋଟ୍ କିପରି ଦେଇପାରିବେ?”
ଯେଉଁ ବ୍ରାଜିଲୀୟ ମଡେଲ୍ଙ୍କ ଫଟୋ ବ୍ୟବହାର ହୋଇଥିବା କୁହାଯାଉଛି, ସେହି ମଡେଲ ହେଉଛନ୍ତି ଲାରିସା । ସେ ନିଜ ଇନଷ୍ଟାଗ୍ରାମ୍ରେ ଏକ ଭିଡିଓ ପୋଷ୍ଟ କରି ଏହାକୁ ନେଇ ଆଶ୍ଚର୍ଯ୍ୟ ପ୍ରକଟ କରିଛନ୍ତି। ସେ କହିଛନ୍ତି: “ବନ୍ଧୁଗଣ, ମୁଁ ଆପଣଙ୍କୁ ଏକ ମଜାକ କହୁଛି। ଲୋକମାନେ ମୋର ପୁରୁଣା ଫଟୋ ବ୍ୟବହାର କରୁଛନ୍ତି, ଯେତେବେଳେ ମୁଁ ୧୮-୨୦ ବର୍ଷର ଥିଲି। ସେମାନେ ମୋତେ ଭାରତୀୟ ଦେଖାଇ ଲୋକଙ୍କୁ ଠକିବାକୁ ଚେଷ୍ଟା କରୁଛନ୍ତି। ଏହା କି ବାଉଳାମି? ଆମେ କେଉଁ ଦୁନିଆରେ ବଞ୍ଚୁଛୁ? ଓ ମାଏ ଗଡ୍, ଏ କି କ୍ରେଜିନେସ୍!” ସେ ଏହା ମଧ୍ୟ କହିଛନ୍ତି ଯେ ଅନେକ ଭାରତୀୟ ରିପୋର୍ଟର୍ ତାଙ୍କ ସେଲୁନ୍ ଏବଂ ଇନଷ୍ଟାଗ୍ରାମ୍ ମାଧ୍ୟମରେ ତାଙ୍କ ସହ ଯୋଗାଯୋଗ କରୁଛନ୍ତି, କିନ୍ତୁ ସେ କୌଣସି ସାକ୍ଷାତକାର ଦେବାକୁ ଚାହୁଁନାହାଁନ୍ତି।
“ମୁଁ ଭାରତରେ ଫେମସ୍ ହୋଇଗଲି!” (ମୁଁ ଭାରତରେ ପ୍ରସିଦ୍ଧ ହୋଇଗଲି!) କହି ସେ ହସିଥିଲେ ଏବଂ ଯୋଡ଼ିଥିଲେ, “ମୁଁ ‘ନମସ୍ତେ’ ଜାଣିଛି ଏବଂ ଆହୁରି ଶିଖିବି।” ସେ ସ୍ପଷ୍ଟ କରିଛନ୍ତି ଯେ ଏହା ଏକ ‘ଷ୍ଟକ୍ ଫଟୋ’ ଏବଂ ସେ ବର୍ତ୍ତମାନ ମଡେଲିଂ କରୁନାହାଁନ୍ତି। ତାଙ୍କ ଇନଷ୍ଟାଗ୍ରାମ୍ରେ ହଜାର ହଜାର ଭାରତୀୟ ଫଲୋଅର୍ସ ବୃଦ୍ଧି ପାଇଛନ୍ତି।
ରାହୁଲ ଗାନ୍ଧୀ ବିହାର ବିଧାନସଭା ନିର୍ବାଚନର ଠିକ୍ ଦିନକ ପୂର୍ବରୁ ନୂଆଦିଲ୍ଲୀସ୍ଥିତ କଂଗ୍ରେସ ମୁଖ୍ୟାଳୟରେ ଏକ ଖବରଦାତା ସମ୍ମିଳନୀ ଡାକି ୨୦୨୪ ହରିୟାଣା ବିଧାନସଭା ନିର୍ବାଚନରେ ଦଳୀୟ ପରାଜୟର କାରଣ ଭୋଟ ଚୋରିକୁ କହିଥିଲେ । ରାହୁଲ କହିଛନ୍ତି, କଂଗ୍ରେସ ଜିତିବା ନେଇ ଏକ୍ଜିଟ୍ ପୋଲ୍ଗୁଡ଼ିକ ଭବିଷ୍ୟବାଣୀ କରିଥିଲେ। କିନ୍ତୁ ଭାଜପା ଏବଂ ନିର୍ବାଚନ କମିଶନ (ଇସି) ମିଳିମିଶି ଫଳାଫଳକୁ ଏପଟ ସେପଟ କରିଦେଲେ। ୨୫ ଲକ୍ଷ ଜାଲ୍ ଭୋଟର ସୃଷ୍ଟି କରି ସେମାନେ ଜନମତକୁ ନିଜ ସପକ୍ଷକୁ ଟାଣିବାରେ ସକ୍ଷମ ହୋଇଥିବା ରାହୁଲ ଅଭିଯୋଗ ଆଣିଥିଲେ । ହରିୟାଣା ବିଧାନସଭା ନିର୍ବାଚନ ବେଳେ ବ୍ରାଜିଲର ଜଣେ ମହିଳା ମଡେଲ ୧୦ଟି ବୁଥ୍ରେ ୨୨ ଥର ଭୋଟ ଦେଇଥିଲେ ବୋଲି ସେ କହିଥିଲେ । ବିଭିନ୍ନ ବୁଥ୍ରେ ତାଙ୍କର ସ୍ବିଟି, ସୀମା, ସରସ୍ବତୀ ଭଳି ଭିନ୍ନ ଭିନ୍ନ ନାମ ରହିଥିଲା। ତେଣୁ ଏହି ଜାଲିଆତି ଏକ ‘ସେଣ୍ଟ୍ରାଲାଇଜ୍ଡ ଅପରେଶନ୍’ ବୋଲି ସେ ଅଭିଯୋଗ ଆଣିିଥିଲେ । ଯାହା ତାଙ୍କ ପାଇଁ ଏବେ ବୁମେରାଂ ହୋଇଛି । ଯେଉଁ ମହିଳାଙ୍କ ନାମ ରାହୁଲ ବ୍ୟବହାର କରିଥିଲେ ସେହି ମହିଳାମାନେ ଏବେ ଗଣମାଧ୍ୟମ ସାମ୍ନାକୁ ଆସି ସେମାନେ ଭୋଟ ଦେବା କହୁଛନ୍ତି ।
ସେପଟେ ଇସି ରାହୁଲଙ୍କ ଦାବିକୁ ଭିତ୍ତିହୀନ ଅଭିଯୋଗ କହି ଖଣ୍ଡନ କରିଛନ୍ତି। ହରିୟାଣା ଭୋଟର ତାଲିକାରେ ଯଦି ଜାଲିଆତି ହୋଇଥିଲା, ତେବେ କଂଗ୍ରେସ ପୂର୍ବରୁ କାହିଁକି ଏହାକୁ ଚ୍ୟାଲେଞ୍ଜ କରି ନ ଥିଲା ବୋଲି ଇସି ଅଧିକାରୀମାନେ ପ୍ରଶ୍ନ କରିଛନ୍ତି। ଯଦି ଜଣେ ବ୍ୟକ୍ତି ଏକାଧିକ ସ୍ଥାନରେ ଭୋଟ ଦେଉଥିଲେ, କଂଗ୍ରେସର ବୁଥ୍ ଏଜେଣ୍ଟମାନେ କାହିଁକି ତାକୁ ବିରୋଧ କରି ନ ଥିଲେ। ସେହିପରି ଭାଜପା ମଧ୍ୟ ରାହୁଲଙ୍କ ଅଭିଯୋଗକୁ ଭିତ୍ତିହୀନ ଦର୍ଶାଇଛି। ତେବେ ବ୍ରାଜିଲିଆନ ମହିଳା ନିଜର ମତ ରଖିବା ପରେ ଏହି ଖବର ଏବେ ଜୋରଦାର ଚର୍ଚା ହେଉଛି ।
