ବାଲେଶ୍ୱର: ଭାରତୀୟ ପ୍ରତିରକ୍ଷା ଅନୁସନ୍ଧାନ ଏବଂ ବିକାଶ ସଂଗଠନ (DRDO) ପକ୍ଷରୁ ଆଜି ଓଡ଼ିଶା ତଟରେ ଏକ ଶକ୍ତିଶାଳୀ କ୍ଷେପଣାସ୍ତ୍ରର ସଫଳ ପରୀକ୍ଷଣ କରାଯାଇଛି। ବାଲେଶ୍ୱର ଜିଲ୍ଲାସ୍ଥିତ ଡକ୍ଟର ଏପିଜେ ଅବଦୁଲ କଲାମ ଦ୍ୱୀପରୁ ଏହି କ୍ବାସି ବାଲିଷ୍ଟିକ୍ ମିସାଇଲ୍ ର ଏକ ସିରିଜ୍ ପରୀକ୍ଷଣ କରାଯାଇ ଭାରତ ନିଜର ସାମରିକ ଦକ୍ଷତା ପ୍ରଦର୍ଶିତ କରିଛି।
ଆଜି ସକାଳ ପ୍ରାୟ ୧୦ଟା ସମୟରେ ପ୍ରଥମ କ୍ଷେପଣାସ୍ତ୍ରର ନିକ୍ଷେପ କରାଯାଇଥିଲା। ଏହାର କିଛି ସମୟ ବ୍ୟବଧାନରେ ପୁଣି ଏକ ସିରିଜ୍ ପରୀକ୍ଷଣ କରାଯାଇଥିଲା। ମିସାଇଲ୍ଟି ନିଜର ସମସ୍ତ ଲକ୍ଷ୍ୟ ପଥକୁ ସଫଳତାର ସହ ଅତିକ୍ରମ କରିଛି ଏବଂ ସମୁଦ୍ର ମଧ୍ୟରେ ଥିବା ଏହାର ଟାର୍ଗେଟ୍କୁ ସଠିକ୍ ଭାବେ ଭେଦ କରିଛି। ଏହା ଭୂପୃଷ୍ଠରୁ ଭୂପୃଷ୍ଠକୁ (Surface-to-Surface) ନିକ୍ଷେପ କରାଯାଇପାରୁଥିବା ଏକ କ୍ଷେପଣାସ୍ତ୍ର। ଏହାର ଲକ୍ଷ୍ୟଭେଦ କ୍ଷମତା ୧୫୦ରୁ ୫୦୦ କିଲୋମିଟର ପର୍ଯ୍ୟନ୍ତ ରହିଛି। ଏହି ମିସାଇଲ୍ ପ୍ରାୟ ୫୦୦ରୁ ୧୦୦୦ କେଜି ପର୍ଯ୍ୟନ୍ତ ଓଜନର ପାରମ୍ପରିକ ଯୁଦ୍ଧାସ୍ତ୍ର ବହନ କରିବାରେ ସକ୍ଷମ। ଏହାର ଗତିପଥ ସମ୍ପୂର୍ଣ୍ଣ ବାଲିଷ୍ଟିକ୍ ନୁହେଁ, ବରଂ ‘ଆଭାସି’ (Quasi-ballistic), ଯାହା ଶତ୍ରୁ ପକ୍ଷର ରାଡାର୍ ଏବଂ ଆଣ୍ଟି-ମିସାଇଲ୍ ସିଷ୍ଟମକୁ ଚକମା ଦେବାରେ ସହାୟକ ହୋଇଥାଏ।
