ବାଲେଶ୍ବର : ସାଂସଦ ଖେଳ ମହୋତ୍ସବ (Sansad Khel Mahotsav) ରେଜିଷ୍ଟ୍ରେସନ ବାଲେଶ୍ବର ସଂସଦୀୟ କ୍ଷେତ୍ରରେ ସାଂସଦ ପ୍ରତାପ ଷଡ଼ଙ୍ଗୀଙ୍କ ଦ୍ବାରା ଶୁଭାରମ୍ଭ ହୋଇଛି । ଏହି କ୍ରୀଡ଼ା ମହୋତ୍ସବକୁ ଉଦଘାଟନ କରି ସାଂସଦ ପ୍ରତାପ ଷଡ଼ଙ୍ଗୀ କହିଛନ୍ତି ଯେ ଏହା ହେଉଛି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଆରମ୍ଭ ହୋଇଥିବା ଏକ ଜାତୀୟ କ୍ରୀଡା ଉତ୍ସବ। ଏହାର ଉଦ୍ଦେଶ୍ୟ ହେଉଛି ଗ୍ରାମାଞ୍ଚଳ ଓ ସହରାଞ୍ଚଳରେ ଥିବା କ୍ରୀଡା ପ୍ରତିଭାମାନଙ୍କୁ ଚିହ୍ନଟ କରି ପ୍ରୋତ୍ସାହନ ଦେବା । ଏହି କ୍ରୀଡ଼ା ମହୋତ୍ସବ ମାଧ୍ୟମରେ ଗାଁରେ ଖେଳାଯାଉଥିବା କ୍ରୀଡାକୁ ପ୍ରୋତ୍ସାହନ ମିଳୁଛି ଏବଂ ଯୁବକମାନଙ୍କଠାରେ ସ୍ୱାସ୍ଥ୍ୟ ଓ କ୍ରୀଡ଼ା ଭାବନା ସଚେତନତା ବଢ଼ୁଛି ବୋଲି କହିଛନ୍ତି ସାଂସଦ । ନିଜ ନିର୍ବାଚନ ମଣ୍ଡଳୀରେ ଯୁବକମାନଙ୍କୁ ଭାଗ ନେବାକୁ ଆହ୍ୱାନ ଜଣାଇଛନ୍ତି ସାଂସଦ ଶ୍ରୀ ଷଡ଼ଙ୍ଗୀ । ଏଥିରେ ଭାଗନେବା ପାଇଁ ଅନଲାଇନ୍ ରେଜିଷ୍ଟ୍ରେସନ୍ ୨୦ ସେପ୍ଟେମ୍ବର ପର୍ଯ୍ୟନ୍ତ ଖୋଲା ରହିବ ଏବଂ ପ୍ରତିଯୋଗିତା ୨୧ ସେପ୍ଟେମ୍ବରରୁ ୨୫ ଡିସେମ୍ବର୍ ପର୍ଯ୍ୟନ୍ତ ଚାଲିବ ବୋଲି ସାଂସଦ କହିଛନ୍ତି ।
୨୦୨୫ରେ ଏହି ମହୋତ୍ସବର ତୃତୀୟ ସଂସ୍କରଣ ଦେଶର ବିଭିନ୍ନ ସଂସଦୀୟ କ୍ଷେତ୍ରରେ ଆରମ୍ଭ ହୋଇଛି। ୨୦୨୨ରେ ପ୍ରଥମଥର ଆୟୋଜିତ ହୋଇଥିବା ଏହି ମହୋତ୍ସବରେ ଲକ୍ଷାଧିକ ଯୁବକ-ଯୁବତୀ ଭାଗ ନେଇଥିଲେ। ଏହି କ୍ରୀଡ଼ା ସ୍ଥାନୀୟ ସାଂସଦମାନଙ୍କ ଦ୍ୱାରା ନିଜ ନିର୍ବାଚନ ମଣ୍ଡଳୀରେ ଆୟୋଜିତ ହୋଇଥାଏ । ଯେଉଁଠାରେ କବାଡ୍ଡି, ଖୋକ୍କୋ, ଭଲିବଲ, ବ୍ୟାଡ୍ମିନ୍ଟନ୍, କୁସ୍ତି ଆଦି ଖେଳରେ ପ୍ରତିଯୋଗିତା ହୋଇଥାଏ। । ଏଭଳି ଖେଳ ପ୍ରତିଯୋଗିତା ଦ୍ବାରା ଗ୍ରାମ୍ୟସ୍ତରର ପ୍ରତିଭାଙ୍କୁ ଖୋଜାଯାଇ ବଡ଼ ସୁଯୋଗ ପ୍ରଦାନ କରାଯାଉଛି । ଦେଶର କ୍ରୀଡା ବିକାଶରେ ଏଭଳି ଖେଳ ମହୋତ୍ସବ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ। ଏଭଳି ଉଦ୍ୟମ ମାଧ୍ୟମରେ ଭାରତ ଏକ କ୍ରୀଡା ଶକ୍ତି ଭାବେ ଉଭା ହେବାର ସ୍ୱପ୍ନକୁ ସାକାର କରୁଥିବା ସାଂସଦ ଶ୍ରୀ ପ୍ରତାପ ଷଡ଼ଙ୍ଗୀ କହିଛନ୍ତି ।
