ଓଡ଼ିଆଙ୍କ ପ୍ରିୟ ମିଠା ଛେନାପୋଡ଼ ଆଜି ବିଶ୍ୱ ଦରବାରରେ ନୟାଗଡ଼କୁ ଏକ ସ୍ୱତନ୍ତ୍ର ପରିଚୟ ଦେଇଛି। ଆଜି ଏପ୍ରିଲ୍ ୧୧ ତାରିଖ – ବିଶ୍ୱ ଛେନାପୋଡ଼ ଦିବସ। ରାଜ୍ୟର ବିଭିନ୍ନ ସ୍ଥାନରେ ଧୂମଧାମରେ ପାଳନ ହେଉଛି ଏହି ଦିବସ। କିନ୍ତୁ ଏହି ସୁଆଦିଆ ମିଠାର ଅସଲ ସ୍ରଷ୍ଠା କିଏ, ତାକୁ ନେଇ ବାପା-ପୁଅଙ୍କ ମଧ୍ୟରେ ଶ୍ରେୟର ଲଢ଼େଇ ଜାରି ରହିଛି।
ପାରମ୍ପରିକ କାହାଣୀ ଅନୁସାରେ, ନୟାଗଡ଼ ଜିଲ୍ଲାର ଦଶପଲ୍ଲାରେ ୧୯୪୭ ମସିହାରେ ସୁଦର୍ଶନ ସାହୁ ଏହି ମିଠାର ଆବିଷ୍କାର କରିଥିଲେ। ଗୋଟିଏ ରାତିରେ ଦୋକାନରେ ବଳକା ଛେନା ଥିଲା। ସେ ତାକୁ ଚିନି ସହ ମିଶାଇ କାଠ ଚୁଲା ଭିତରେ ରଖି ଦେଇଥିଲେ। ପରଦିନ ସକାଳେ ଦେଖିଲେ – ଛେନା ପୋଡ଼ି ଯାଇ ଏକ ସୁନ୍ଦର ବାଦାମୀ ରଙ୍ଗର ମିଠା ତିଆରି ହୋଇଛି। ଏହି ଛେନାପୋଡ଼ ଖୁବ୍ ଶୀଘ୍ର ଲୋକପ୍ରିୟ ହୋଇଗଲା। ସୁଦର୍ଶନ ସାହୁଙ୍କ ଜନ୍ମଦିନ ଏପ୍ରିଲ୍ ୧୧ ତାରିଖକୁ ହିଁ ୨୦୨୨ ମସିହାରୁ ବିଶ୍ୱ ଛେନାପୋଡ଼ ଦିବସ ଭାବେ ପାଳନ କରାଯାଉଛି।
କିନ୍ତୁ ଏହି କାହାଣୀରେ ଏକ ନୂଆ ମୋଡ଼ ଆସିଛି। ସୁଦର୍ଶନ ସାହୁଙ୍କ ପରିବାର ଏବଂ କେତେକ ସ୍ଥାନୀୟ ଲୋକ କହୁଛନ୍ତି ଯେ, ପ୍ରକୃତ ସ୍ରଷ୍ଟା ହେଉଛନ୍ତି ତାଙ୍କ ପିତା ବିଦ୍ୟାଧର ସାହୁ। ବିଦ୍ୟାଧର ସାହୁ ଦଶପଲ୍ଲାର ଜଣେ ପ୍ରସିଦ୍ଧ ମିଠା କାରିଗର ଥିଲେ। ତାଙ୍କ ଡାଏରୀରୁ ଜଣାପଡ଼ିଛି ଯେ, ୧୯୪୫ ମସିହାରେ ସେ ବଳକା ଛେନାକୁ ଚିନି ସହ ମିଶାଇ ଶାଳ ପତ୍ରରେ ଚୁଲା ଭିତରେ ରଖିଥିଲେ ଏବଂ ଏହି ମିଶ୍ରଣରୁ ଛେନାପୋଡ଼ ଜନ୍ମ ନେଇଥିଲା।
ସୁଦର୍ଶନ ସାହୁଙ୍କ ପୁତ୍ର ସୁମନ ସାହୁ କହିଛନ୍ତି, “ବାପାଙ୍କ ଡାଏରୀରୁ ଜଣାପଡ଼ିଛି ଯେ ସେ ହିଁ ଏହି ମିଠାର ପ୍ରକୃତ ସ୍ରଷ୍ଟା।” ସୁଦର୍ଶନ ସାହୁ ଏହି ମିଠାକୁ ବ୍ୟବସାୟିକ ଭାବେ ପ୍ରଚାର କରି ନୟାଗଡ଼ ଏବଂ ଓଡ଼ିଶାର ନାମ ଦେଶ ବିଦେଶରେ ପ୍ରସିଦ୍ଧ କରିଥିଲେ। ଜବାହରଲାଲ୍ ନେହେରୁଙ୍କ ଠାରୁ ବିଜୁ ପଟ୍ଟନାୟକ ପର୍ଯ୍ୟନ୍ତ ସମସ୍ତେ ଏହି ମିଠାର ପ୍ରଶଂସା କରିଥିଲେ।ଏହି ଶ୍ରେୟ ବିବାଦ ସତ୍ତ୍ୱେ ଛେନାପୋଡ଼ ଆଜି ଓଡ଼ିଶାର ଗର୍ବ ହୋଇ ରହିଛି। ରାଜ୍ୟର ବିଭିନ୍ନ ସ୍ଥାନରେ ଖାଦ୍ୟ ଉତ୍ସବ, ସାଂସ୍କୃତିକ କାର୍ଯ୍ୟକ୍ରମ ଏବଂ ଛେନାପୋଡ଼ କେକ୍ କଟିଂ ମାଧ୍ୟମରେ ଏହି ଦିବସ ପାଳନ କରାଯାଉଛି।
ନୟାଗଡ଼ ଜିଲ୍ଲା ପ୍ରଶାସନ ଏବଂ ବିଭିନ୍ନ ସଂଗଠନ ଏହି ଦିବସକୁ ଧୂମଧାମରେ ପାଳନ କରୁଛନ୍ତି। ଛେନାପୋଡ଼କୁ ଜିଆଇ ଟ୍ୟାଗ୍ ମିଳିବା ପାଇଁ ମଧ୍ୟ ଦାବି ଉଠିଛି। ଆଜିର ଏହି ଦିବସରେ ଓଡ଼ିଶାବାସୀ ଏକାଠି ହୋଇ ନିଜର ପାରମ୍ପରିକ ମିଠାକୁ ଗର୍ବର ସହ ମନେ ପକାଉଛନ୍ତି। ତେବେ ପୁଅ ନା ବାପା – ସ୍ରଷ୍ଟା ଯିଏ ହୁଅନ୍ତୁ, ଛେନାପୋଡ଼ ଆଜି ଓଡ଼ିଶାର ଗର୍ବ ହୋଇ ରହିଛି।
