ଇସଲାମାବାଦ, ନଭେମ୍ବର ୩୦: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ ଆଦିଆଲା ଜେଲରେ ସମ୍ପୂର୍ଣ୍ଣ ଅଲଗା ଭାବରେ ସୁରକ୍ଷିତ ଥିବା କୁହାଯାଉଥିଲେ ମଧ୍ୟ ତାଙ୍କ ସ୍ୱାସ୍ଥ୍ୟ ଏବଂ ରାଜନୈତିକ ଭବିଷ୍ୟତକୁ ନେଇ ସସପେନ୍ସ ବଢ଼ିବାରେ ଲାଗିଛି। ଇମ୍ରାନ୍ଙ୍କ ଦଳ ପାକିସ୍ତାନ ତେହେରିକ୍-ଏ-ଇନସାଫ୍ (PTI) ଅଭିଯୋଗ କରିଛି ଯେ ତାଙ୍କ ଉପରେ ଦେଶ ଛାଡ଼ି ଚାଲିଯିବା ପାଇଁ ଚାପ ପକାଯାଉଛି। ପିଟିଆଇ ସିନେଟର ଖୁରାମ ଜିସାନ୍ କହିଛନ୍ତି ଯେ ଇମ୍ରାନଙ୍କ ବଢୁଥିବା ଲୋକପ୍ରିୟତା ଶାସକ ଦଳ ପାଇଁ ଚିନ୍ତାର କାରଣ ପାଲଟିଛି। ଇମ୍ରାନ୍ଙ୍କ ପରିବାରକୁ ତାଙ୍କୁ ଭେଟିବାକୁ କୋର୍ଟ ଅନୁମତି ଦେବା ସତ୍ତ୍ୱେ ଏହା ପାଳନ କରାଯାଉ ନଥିବାରୁ ସନ୍ଦେହ ଅଧିକ ଘନୀଭୂତ ହୋଇଛି। ପିଟିଆଇ ଏହା ମଧ୍ୟ ଅଭିଯୋଗ କରିଛି ଯେ ଇମ୍ରାନ୍ଙ୍କ ସମର୍ଥକମାନଙ୍କୁ ଗିରଫ କରାଯାଇ ଜେଲରେ ନିର୍ଯାତନା ଦିଆଯାଉଛି। ଇମ୍ରାନ୍ ଖାନ୍ ଓ ପାକ୍ ସେନାମୁଖ୍ୟ ଜେନେରାଲ୍ ଅସିମ୍ ମୁନୀରଙ୍କ ମଧ୍ୟରେ ଥିବା ତିକ୍ତତା ଏବେ ବି ରାଜନୀତିରେ ଝଲସୁଛି। ୨୦୧୮-୨୦୧୯ରେ ଇମ୍ରାନ୍ ପ୍ରଧାନମନ୍ତ୍ରୀ ଥିବାବେଳେ ତତ୍କାଳୀନ ଆଇଏସଆଇର ମହାନିର୍ଦ୍ଦେଶକ (DG ISI) ଥିବା ମୁନୀରଙ୍କ ସହ ତାଙ୍କର ମତଭେଦ ହୋଇଥିଲା। ଇମ୍ରାନ୍ ତାଙ୍କ ପତ୍ନୀ ବୁସରା ବିବିଙ୍କ ବିରୋଧରେ ହୋଇଥିବା ଦୁର୍ନୀତି ମାମଲାରେ ହସ୍ତକ୍ଷେପ କରିବାରୁ ମାତ୍ର ସାତ ମାସ ମଧ୍ୟରେ ମୁନୀରଙ୍କୁ ଆଇଏସଆଇ ମୁଖ୍ୟ ପଦରୁ ହଟାଇ ଦେଇଥିଲେ। ୨୦୨୨ରେ ଅନାସ୍ଥା ଭୋଟରେ କ୍ଷମତାରୁ ହଟିବା ପରେ ଇମ୍ରାନ୍ ମୁନୀରଙ୍କୁ ହିଁ ଖଳନାୟକ ଭାବେ ବିବେଚନା କରିଥିଲେ। ମେ ୨୦୨୩ରେ ଇମ୍ରାନ୍ଙ୍କ ଗିରଫଦାରୀ ପରେ ପରିସ୍ଥିତି ଆହୁରି ଜଟିଳ ହୋଇଥିଲା। ନଭେମ୍ବର ୨୦୨୨ରେ ମୁନୀର ଆର୍ମି ଚିଫ୍ ହେବା ପରେ ସର୍ବଶକ୍ତିମାନ୍ ହୋଇଥିଲେ। ଇମ୍ରାନ୍ଙ୍କ ବାରମ୍ବାରର ମିଲିଟାରୀ-ବିରୋଧୀ ମନ୍ତବ୍ୟ ତଥା ମୁନୀରଙ୍କ ବିରୋଧରେ ତାଙ୍କର ଟିପ୍ପଣୀ ଏବେ ତାଙ୍କ ଜେଲ୍ ଜୀବନକୁ ଅଧିକ ସନ୍ଦେହଜନକ କରିଛି।
ପାକିସ୍ତାନରେ ଏବେ ସ୍ଥିତି ଏମିତି ଯେ, ଇମ୍ରାନଙ୍କ ସମର୍ଥକ ଜେଲ ବାହାରେ ଜମା ହୋଇ ବିକ୍ଷୋଭ କରିବା ଆରମ୍ଭ କରିଦେଇଛନ୍ତି । ଖବରକୁ ନେଇ ନା ସରକାର କିଛି କହୁଛନ୍ତି, ନା ଜେଲ୍ ପ୍ରଶାସକ ବି ମୁହଁ ଖୋଲୁଛନ୍ତି । ଏପରିକି ସରକାରୀ ସ୍ତରରେ ଦୁଇ ସପ୍ତାହ ହେବ ଇମ୍ରାନଙ୍କ କୌଣସି ଫଟୋ ବି ଜାରି କରାଯାଇନି ।
