ଗୋଟିଏ ଘଣ୍ଟାରେ ଉଡ଼ିଗଲା 10 ଲକ୍ଷ କୋଟି, କଣ କରିବେ ନିବେଶକ ?

ଯୁକ୍ତରାଷ୍ଟ୍ର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଇରାନ୍ ବିରୋଧରେ ନୂଆ ଧମକ ପରେ ଆନ୍ତର୍ଜାତିକ ତୈଳ ମୂଲ୍ୟ ବୃଦ୍ଧି ପାଇବାରୁ ଭାରତୀୟ ପୂଞ୍ଜି ବଜାରରେ ଭୟଙ୍କର କ୍ଷତି ଦେଖାଦେଇଛି। ଆଜି ବଜାର ଖୋଲିବା ସହିତ ବିଏସ୍‌ଇ ସେନ୍‌ସେକ୍ସ ଓ ଏନ୍‌ଏସ୍‌ଇ ନିଫ୍ଟି ତୀବ୍ର ହ୍ରାସ ପାଇଥିଲା। ମାତ୍ର ଏକ ଘଣ୍ଟା ମଧ୍ୟରେ ନିବେଶକଙ୍କ କ୍ଷତି ପ୍ରାୟ ୧୦ ଲକ୍ଷ କୋଟି ଟଙ୍କାରେ ପହଞ୍ଚିଛି।ବଜାର ଖୋଲିବା ପରେ ସେନ୍‌ସେକ୍ସ ପ୍ରାୟ ୧୪୦୦ ପଏଣ୍ଟ୍ ଓ ନିଫ୍ଟି ପ୍ରାୟ ୪୦୦ ପଏଣ୍ଟ୍ ପର୍ଯ୍ୟନ୍ତ ହ୍ରାସ ପାଇଥିଲା।

ଏହି ହ୍ରାସ ଯୋଗୁଁ ବିଏସ୍‌ଇର ସମୁଦାୟ ବଜାର ମୂଲ୍ୟରୁ ପ୍ରାୟ ୧୦ ଲକ୍ଷ କୋଟି ଟଙ୍କା ମୂଲ୍ୟ ହ୍ରାସ ପାଇଛି। ଏହା ହେଉଛି ସାମ୍ପ୍ରତିକ ସମୟରେ ଯୁଦ୍ଧ ପ୍ରଭାବିତ ବଜାର ଅସ୍ଥିରତାର ଏକ ନୂଆ ଉଦାହରଣ। ଟ୍ରମ୍ପଙ୍କ ଜାତୀୟ ସମ୍ବୋଧନରେ ଇରାନ୍ ଉପରେ ଆଗାମୀ ଦୁଇରୁ ତିନି ସପ୍ତାହ ମଧ୍ୟରେ ଅତ୍ୟନ୍ତ କଠୋର ଆକ୍ରମଣ କରାଯିବ ଏବଂ ଦେଶକୁ ‘ପଥର ଯୁଗ’କୁ ଠେଲି ଦିଆଯିବ ବୋଲି ଚେତାବନୀ ଦେବା ପରେ ଆନ୍ତର୍ଜାତିକ ତୈଳ ବଜାରରେ ଉତ୍ତେଜନା ବଢ଼ିଛି।

ଅଶୋଧିତ ଓ ଡବ୍ଲୁଟିଆଇ ତୈଳ ମୂଲ୍ୟ ପ୍ରାୟ ୬ ପ୍ରତିଶତ ବୃଦ୍ଧି ପାଇଛି। ଭାରତ ତୈଳ ଆମଦାନି ଉପରେ ନିର୍ଭରଶୀଳ ହୋଇଥିବାରୁ ଏହା ମୂଲ୍ୟବୃଦ୍ଧି ଏବଂ ଆର୍ଥିକ ଚାପ ବଢ଼ାଇବ ବୋଲି ନିବେଶକମାନେ ଆଶଙ୍କା କରୁଛନ୍ତି।ଏହା ସହିତ ବିଦେଶୀ ପୂଞ୍ଜି ନିବେଶକ (FII) ମାନେ ସୁରକ୍ଷିତ ସମ୍ପତ୍ତି ଯଥା ଡଲାର ଓ ସୁନା ଆଡ଼କୁ ମୁହାଁଇଛନ୍ତି। ଏହି କାରଣରୁ ଟଙ୍କା ମୂଲ୍ୟ ମଧ୍ୟ ହ୍ରାସ ପାଇଛି। ବିଶ୍ୱବ୍ୟାପୀ ରିସ୍କ-ଅଫ୍ ମାନସିକତା ଯୋଗୁଁ ଏସିଆର ଅନ୍ୟାନ୍ୟ ବଜାର ମଧ୍ୟ ପ୍ରଭାବିତ ହୋଇଛି।

ବଜାର ବିଶେଷଜ୍ଞମାନେ କହୁଛନ୍ତି ଯେ, ଯୁଦ୍ଧର ପ୍ରଭାବ ଦୀର୍ଘକାଳୀନ ହୋଇପାରେ ଏବଂ ତୈଳ ମୂଲ୍ୟ ଯଦି ଉଚ୍ଚ ସ୍ତରରେ ରହେ ତେବେ ଭାରତର ଆର୍ଥିକ ବୃଦ୍ଧି ଉପରେ ଚାପ ପଡ଼ିପାରେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପୂର୍ବରୁ ଜନତାଙ୍କ ଉପରେ ଯୁଦ୍ଧର ବୋଝ ନପଡ଼ୁ ବୋଲି କଡ଼ା ନିର୍ଦ୍ଦେଶ ଦେଇଛନ୍ତି ଏବଂ ସରକାର ତୈଳ ଯୋଗାଣ ନିଶ୍ଚିତ କରିବା ସହ ମୂଲ୍ୟ ସ୍ଥିର ରଖିବାକୁ ପଦକ୍ଷେପ ନେଉଥିବା କହିଛନ୍ତି । ବର୍ତ୍ତମାନ ପରିସ୍ଥିତିରେ ନିବେଶକମାନେ ସତର୍କତା ଅବଲମ୍ବନ କରୁଛନ୍ତି ଏବଂ ବଜାର ପୁନରୁଦ୍ଧାର ପାଇଁ ଯୁଦ୍ଧରେ ଶୀଘ୍ର ସମାଧାନ ଆଶା କରୁଛନ୍ତି।