ସମାଜରେ ଛାଡପତ୍ରକୁ ପ୍ରାୟତଃ ଏକ କଳଙ୍କ ଭାବେ ଦେଖାଯାଏ, କିନ୍ତୁ ଉତ୍ତରପ୍ରଦେଶର ମିରଟରେ ଏକ ଅଭିନବ ଘଟଣା ଦେଖିବାକୁ ମିଳିଛି। ଜଣେ ଅବସରପ୍ରାପ୍ତ ଜଜ୍ ତାଙ୍କ ଝିଅର ଛାଡପତ୍ର ପାଇବା ପରେ ଢୋଲ ବଜାଇ, ମିଠା ବାଣ୍ଟିବା ସହ ଏହା ଆଡମ୍ବରପୂର୍ଣ୍ଣ ଉତ୍ସବ ପାଳନ କରି ଘରକୁ ଫେରାଇ ଆଣିଛନ୍ତି।
ଏହି ଘଟଣା ସାମାଜିକ କୁସଂସ୍କାର ବିରୋଧରେ ଏକ ଶକ୍ତିଶାଳୀ ସନ୍ଦେଶ ଦେଇଛି। ମିରଟ ଫ୍ୟାମିଲି କୋର୍ଟ ପ୍ରଣିତା ଶର୍ମାଙ୍କ ଛାଡପତ୍ର ମଞ୍ଜୁର କରିଥିଲେ। ଏହା ଜାଣିବା ପରେ ତାଙ୍କ ପିତା, ଅବସରପ୍ରାପ୍ତ ଜଜ୍ ଡକ୍ଟର ଜ୍ଞାନେନ୍ଦ୍ର କୁମାର ଶର୍ମା କୋର୍ଟ ପରିସର ବାହାରେ ଢୋଲ ବଜାଇ ଉତ୍ସବ ଆରମ୍ଭ କରିଥିଲେ। ପରିବାର ସଦସ୍ୟମାନେ ନାଚୁଥିଲେ ଏବଂ ଲଡ଼ୁ ବାଣ୍ଟୁଥିଲେ।
ଏହି ଦୃଶ୍ୟର ଭିଡିଓ ସୋସିଆଲ୍ ମିଡିଆରେ ଭାଇରାଲ୍ ହୋଇଛି। ଭିଡିଓରେ ପରିବାର ସଦସ୍ୟମାନେ କଳା ଟି-ସର୍ଟ୍ ପିନ୍ଧି ଥିବା ଦେଖାଯାଉଛି, ଯେଉଁଥିରେ ପ୍ରଣିତାଙ୍କ ଫଟୋ ଏବଂ ଲେଖା ଥିଲା – “I Love My Daughter. My Heart, My Soul.” ପ୍ରଣିତା ମଧ୍ୟ ଏକ କଳା ଟି-ସର୍ଟ୍ ପିନ୍ଧିଥିଲେ ଯେଉଁଥିରେ ଲେଖା ଥିଲା “My Family, My Life.”ଜ୍ଞାନେନ୍ଦ୍ର ଶର୍ମା କହିଛନ୍ତି ଯେ, “ଝିଅର ଜନ୍ମ, ବିବାହ କିମ୍ବା ଛାଡପତ୍ର – ପ୍ରତ୍ୟେକ ପର୍ଯ୍ୟାୟରେ ତାକୁ ସମ୍ମାନର ସହ ଗ୍ରହଣ କରିବା ମୋର କର୍ତ୍ତବ୍ୟ। ତାକୁ ଖୁସିରେ ରଖିବା ମୋର ଦାୟିତ୍ୱ।”
ସେ କହିଛନ୍ତି ଯେ, ଛାଡପତ୍ର ପରେ ଝିଅକୁ ଲଜ୍ଜିତ ହୋଇ ଘରକୁ ଫେରାଇ ଆଣିବା ଉଚିତ୍ ନୁହେଁ। ଏହା ଏକ ନୂତନ ଆରମ୍ଭ ବୋଲି ଗ୍ରହଣ କରିବାକୁ ହେବ। ପ୍ରଣିତାଙ୍କ ବିବାହକୁ ପାଖାପାଖି ୮ ବର୍ଷ ପୂରିଥିଲା ଏବଂ ଏହା କଷ୍ଟକର ଥିଲା ବୋଲି ଜଣାପଡ଼ିଛି। ପରିବାର ଏହି ଘଟଣାକୁ ଶୋକ ପରିବର୍ତ୍ତେ ଗର୍ବ ଏବଂ ସମର୍ଥନର ମୁହୂର୍ତ୍ତ ବୋଲି କହି ସମାଜକୁ ଏକ ବାର୍ତ୍ତା ଦେବାକୁ ଚାହୁଁଛି ଯେ, ଛାଡପତ୍ର କୌଣସି ମହିଳାଙ୍କ ଜୀବନର ଶେଷ ନୁହେଁ।ଏହି ଉତ୍ସବପୂର୍ଣ୍ଣ ସ୍ୱାଗତ ସାମାଜିକ ଗଣମାଧ୍ୟମରେ ବ୍ୟାପକ ପ୍ରଶଂସା ପାଇଛି ଏବଂ ଅନେକ ଏହାକୁ ମହିଳା ସଶକ୍ତିକରଣ ଏବଂ ପାରିବାରିକ ସମର୍ଥନର ଏକ ଉଦାହରଣ ବୋଲି କହୁଛନ୍ତି।
