ଟ୍ରମ୍ପଙ୍କ ଧମକ ପରେ କଡ଼ା ଜବାବ ଦେଲା ଇରାନ…ଆମ ତାକତ ତୁମକୁ ଜଣା ନାହିଁ…ଅପେକ୍ଷା କର…

ଯୁକ୍ତରାଷ୍ଟ୍ର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଜାତିକୁ ଦେଇଥିବା ଟେଲିଭିଜନ୍ ସମ୍ବୋଧନରେ ଇରାନ୍କୁ ପ୍ରସ୍ତର ଯୁଗକୁ ଠେଲିଦେବୁ ବୋଲି ଧମକ ଦେବା ପରେ ଏହାର ତୁରନ୍ତ ଜବାବ ଦେଇଛି ଇରାନ। ଇରାନ୍‌ର କ୍ଷେପଣାସ୍ତ୍ର ଓ ଡ୍ରୋନ୍ ଉତ୍ପାଦନ କ୍ଷମତା ପ୍ରାୟ ସମାପ୍ତ ହୋଇଯାଇଥିବା ଏବଂ କେବଳ କିଛି କ୍ଷେପଣାସ୍ତ୍ର ଲଞ୍ଚର୍ ବାକି ଥିବା କହିବା ପରେ ଇରାନ୍ ସେନା ତୀବ୍ର ପ୍ରତିକ୍ରିୟା ଦେଇଛି।

ଇରାନ୍ ସେନାର ଖାତମ ଅଲ୍-ଅନବିୟା କେନ୍ଦ୍ରୀୟ ମୁଖପାତ୍ର ଏକ ବିବୃତ୍ତିରେ କହିଛନ୍ତି, “ତୁମେ କିଛି ଜାଣ ନାହିଁ (You Know Nothing)”। ସେ ଆହୁରି କହିଛନ୍ତି, “ତୁମର ଆମ ସୈନ୍ୟ ଶକ୍ତି ଓ ଉପକରଣ ବିଷୟରେ ଥିବା ଜ୍ଞାନ ଅସମ୍ପୂର୍ଣ୍ଣ। ଆମର ବିସ୍ତୃତ ରଣନୈତିକ କ୍ଷମତା ବିଷୟରେ ତୁମେ କିଛି ଜାଣ ନାହିଁ ।”ଟ୍ରମ୍ପ ତାଙ୍କ ଭାଷଣରେ କହିଥିଲେ ଯେ, ଇରାନ୍‌ର ନୌସେନା ସମ୍ପୂର୍ଣ୍ଣ ଧ୍ୱଂସ ହୋଇଛି, ବାୟୁସେନା ଭଙ୍ଗୁର ହୋଇଛି, କମାଣ୍ଡ୍ ଆଣ୍ଡ୍ କଣ୍ଟ୍ରୋଲ୍ ବ୍ୟବସ୍ଥା ଧ୍ୱଂସ ହେଉଛି ଏବଂ କ୍ଷେପଣାସ୍ତ୍ର ଓ ଡ୍ରୋନ୍ ଉତ୍ପାଦନ କ୍ଷମତା ବହୁତ କମିଯାଇଛି।

ସେ ଆହୁରି କହିଥିଲେ ଯେ, ଆଗାମୀ ଦୁଇରୁ ତିନି ସପ୍ତାହ ମଧ୍ୟରେ ଇରାନ୍‌କୁ ଅତ୍ୟନ୍ତ କଠୋର ଆକ୍ରମଣ କରାଯିବ ଏବଂ ଦେଶକୁ ‘ପଥର ଯୁଗ’କୁ ଠେଲି ଦିଆଯିବ।ଇରାନ୍ ସେନା ଏହି ଦାବିକୁ ଖଣ୍ଡନ କରି କହିଛି, “ଆମର ରଣନୈତିକ କ୍ଷେପଣାସ୍ତ୍ର ଉତ୍ପାଦନ ସ୍ଥାନ, ଦୀର୍ଘ ଆକ୍ରମଣ ଓ ନିର୍ଭୁଲ୍ ଡ୍ରୋନ୍, ଆଧୁନିକ ବାୟୁ ରକ୍ଷା ବ୍ୟବସ୍ଥା, ଇଲେକ୍ଟ୍ରୋନିକ୍ ୱାରଫେୟାର୍ ଏବଂ ବିଶେଷ ଉପକରଣଗୁଡ଼ିକ ବିଷୟରେ ତୁମକୁ କିଛି ଜଣା ନାହିଁ ।

ତୁମେ ଭାବୁଛ ଯେ ଆମର କ୍ଷେପଣାସ୍ତ୍ର ଉତ୍ପାଦନ କେନ୍ଦ୍ର ଧ୍ୱଂସ ହୋଇଯାଇଛି, କିନ୍ତୁ ତୁମେ ଭୁଲ୍ ଭାବୁଛ।”ଇରାନ୍ ଆହୁରି ଚେତାବନୀ ଦେଇ କହିଛି ଯେ, ଏହି ଯୁଦ୍ଧ ଆମେରିକା ପକ୍ଷରୁ ଅନୁତାପ ଓ ଆତ୍ମସମର୍ପଣ ନ ହେବା ପର୍ଯ୍ୟନ୍ତ ଜାରି ରହିବ। ସେନା ପକ୍ଷରୁ କୁହାଯାଇଛି, “ଆମର ଆକ୍ରମଣ ଆହୁରି ବିସ୍ତୃତ, ଶକ୍ତିଶାଳୀ ଓ ବିନାଶକାରୀ ହେବ।

”ଟ୍ରମ୍ପଙ୍କ ଭାଷଣ ପରେ ଆନ୍ତର୍ଜାତିକ ତୈଳ ବଜାରରେ ଉତ୍ତେଜନା ବଢ଼ିଛି ଏବଂ ଭାରତୀୟ ପୂଞ୍ଜି ବଜାର ମଧ୍ୟ ପ୍ରଭାବିତ ହୋଇଛି। ଇରାନ୍ ପକ୍ଷରୁ ଏହି କଡ଼ା ପ୍ରତିକ୍ରିୟା ଯୋଗୁଁ ମଧ୍ୟପ୍ରାଚ୍ୟରେ ଯୁଦ୍ଧର ତୀବ୍ରତା ଆହୁରି ବଢ଼ିପାରେ ବୋଲି ଆନ୍ତର୍ଜାତିକ ବିଶେଷଜ୍ଞମାନେ ଆଶଙ୍କା ପ୍ରକାଶ କରୁଛନ୍ତି।ବର୍ତ୍ତମାନ ପର୍ଯ୍ୟନ୍ତ ଉଭୟ ପକ୍ଷରୁ ଆକ୍ରମଣ ଜାରି ରହିଛି ଏବଂ ଯୁଦ୍ଧର ପରିଣାମ କେଉଁ ଦିଗରେ ଯିବା ସେନେଇ ବିଶ୍ୱ ଉତ୍କଣ୍ଠିତ ହୋଇ ରହିଛି।