ଭୁବନେଶ୍ୱର,: ଓଡ଼ିଶାରେ ମୋହନଙ୍କ ସରକାର ଚାଲିଛି । ଦେଢ଼ ବର୍ଷ ହେଲା ସରକାରରେ ଏବେ ବି କିଛି ଅଧିକାରୀ ପୁରୁଣା ଢ଼ାଞ୍ଚାରେ କାମ କରୁଛନ୍ତି । ମୋହନଙ୍କ ନୂତନ ପ୍ରଶାସନିକ ଯୁଗର ଆରମ୍ଭ ହୋଇଥିଲେ ମଧ୍ୟ ସେଭଳି କିଛି ବଦଳିନାହିଁ। ଲୋକସେବା ଭବନର କନ୍ଭେନ୍ସନ୍ ହଲ୍ରେ ଆଜି ଜିଲ୍ଲାପାଳ ଓ ଏସ୍ପି ସମ୍ମିଳନୀରେ ମୁଖ୍ୟମନ୍ତ୍ରୀ ଅଧିକାରୀଙ୍କୁ ଅନେକ ପରାମର୍ଶ ଦେଇଛନ୍ତି । ରାଜ୍ୟର ସମସ୍ତ ଜିଲ୍ଲାର ଜିଲ୍ଲାପାଳ ଏବଂ ଏସ୍ପିମାନଙ୍କୁ ସେ କହିଛନ୍ତି ଯେ ୨୦୩୬ ସୁଦ୍ଧା ସମୃଦ୍ଧ ଓଡ଼ିଶା ଗଠନ କରିବା ଆମ ସମସ୍ତଙ୍କ ଲକ୍ଷ୍ୟ । ଏହି ଲକ୍ଷ୍ୟ ପୂରଣ ଦିଗରେ କାର୍ଯ୍ୟ କରିବା ପାଇଁ ସେ ପ୍ରଶାସନିକ ଅଧିକାରୀଙ୍କୁ ସେ କିଛି ନିର୍ଦ୍ଦେଶ ଦେଇଛନ୍ତି। ଏହା ସହିତ ୨୦୨୭ ସୁଦ୍ଧା ପାଣି, ରାସ୍ତା ଓ ବିଦ୍ୟୁତ ସଂଯୋଗ ଭଳି ମୌଳିକ ସୁବିଧାକୁ ପ୍ରତ୍ୟେକ ନାଗରିକଙ୍କ ପାଖରେ ପହଞ୍ଚାଇବା ପାଇଁ ସେ ସମୟସୀମା ଦେଇଛନ୍ତି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ମୁଖ୍ୟମନ୍ତ୍ରୀ ଜିଲ୍ଲାପାଳମାନଙ୍କୁ ୯ଟି ଟାସ୍କ ପ୍ରଦାନ କରି ପ୍ରଶାସନିକ ଅଧିକାରୀମାନଙ୍କୁ ନିଜ କାର୍ଯ୍ୟଧାରା ପରିବର୍ତ୍ତନ କରିବାକୁ ସିଧାସଳଖ ନିର୍ଦ୍ଦେଶ ଦେଇଛନ୍ତି । ମୁଖ୍ୟମନ୍ତ୍ରୀ କହିଛନ୍ତି ଦୁର୍ନୀତି ହଟାଇବାକୁ ପ୍ରାଥମିକତା ଅଧିକାରୀମାନେ ଦେବା ଉଚିତ । ଅଧିକାରୀମାନେ ସଚ୍ଚୋଟତା ଓ ସାଧୁତା ରଖିବାକୁ ଉଚିତ । ମୁଖ୍ୟମନ୍ତ୍ରୀ ଚେତାବନୀ ଦେଇ କହିଛନ୍ତି, ଦୁର୍ନୀତି ଯୋଗୁଁ ସରକାର ବଦନାମ ହେଲେ ତାହା ବରଦାସ୍ତ କରାଯିବ ନାହିଁ। ଜିଲ୍ଲାପାଳ ଏବଂ ଏସପିମାନେ ଅଧିକ ଫିଲ୍ଡ ଭିଜିଟ୍ କରନ୍ତୁ। କେବଳ ଅଫିସରେ ଶୀତତାପ ନିୟନ୍ତ୍ରିତ ରୁମ୍ରେ ନ ବସି ଲୋକଙ୍କ ପାଖକୁ ଯାଇ ତୃଣମୂଳ ସ୍ତରରେ କାମ କରିବାକୁ ପରାମର୍ଶ ଦେଇଛନ୍ତି ମୁଖ୍ୟମନ୍ତ୍ରୀ ।
ବର୍ତ୍ତମାନ ସମୟରେ ଶାସନ ପ୍ରଶାସନରେ ଆଧୁନିକ ଟେକ୍ନୋଲୋଜିର ବ୍ୟବହାର କରି ସମସ୍ୟାର ସମାଧାନ କରିବାକୁ ସେ ନିର୍ଦ୍ଦେଶ ଦେଇଛନ୍ତି । ରିୟଲ୍ ଟାଇମ୍ ଡାଟା ବ୍ୟବହାର କରି ତୁରନ୍ତ ସମସ୍ୟାର ସମାଧାନ କରିବାକୁ କହିଛନ୍ତି । ଜିଲ୍ଲା ସ୍ତରରେ ଲୋକଙ୍କ ଅଭିଯୋଗ ଶୁଣାଣିକୁ ପ୍ରାଧାନ୍ୟ ଦିଆଯାଉ।
ପ୍ରଶାସନିକ ସ୍ତରରେ ଓଡିଆ ଭାଷାର ବହୁଳ ବ୍ୟବହାର କରିବାକୁ ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ। ସରକାରୀ ନୋଟିସ୍ ଓ ବିଜ୍ଞାପନ ଓଡିଆ ଭାଷାରେ ପ୍ରକାଶ କରିବାକୁ କହିଛନ୍ତି ମୁଖ୍ୟମନ୍ତ୍ରୀ । ସରକାରୀ କାମର ସଫଳତାକୁ ସୋସିଆଲ୍ ମିଡିଆ ଜରିଆରେ ଲୋକଙ୍କ ପାଖରେ ପହଞ୍ଚାଇବାକୁ କହିଛନ୍ତି ମୁଖ୍ୟମନ୍ତ୍ରୀ । ରାଜ୍ୟସ୍ତରରେ ଏବଂ ଜିଲ୍ଲା ସ୍ତରରେ ଚାଲିଥିବା ଆଉଟ୍ସୋର୍ସିଂ ଅଭ୍ୟାସକୁ ସମୀକ୍ଷା କରି ଏହାକୁ କମ୍ କରିବା ଉପରେ ଗୁରୁତ୍ୱ ଦେଇଛନ୍ତି ମୁଖ୍ୟମନ୍ତ୍ରୀ । ସେହିପରି ସରକାରୀ କାର୍ଯ୍ୟାଳୟକୁ ଆସୁଥିବା ନିର୍ବାଚିତ ପ୍ରତିନିଧିମାନଙ୍କୁ ସମ୍ମାନ ଦେବାକୁ ମୁଖ୍ୟମନ୍ତ୍ରୀ କହିଛନ୍ତି । ମୁଖ୍ୟମନ୍ତ୍ରୀ କଡ଼ା ଭାଷାରେ ‘ଗାଦିମଡ଼ା ବାବୁ’ଙ୍କୁ ହଟାଇବାକୁ ନିର୍ଦ୍ଦେଶ ଦେଇ ଲୋକଙ୍କୁ ତ୍ୱରିତ ସେବା ଯୋଗାଇବାକୁ କହିଛନ୍ତି। ମୁଖ୍ୟମନ୍ତ୍ରୀ ମାଝୀଙ୍କ ଏହି ନୂତନ କାର୍ଯ୍ୟସୂଚୀ ଓଡ଼ିଶାର ପ୍ରଶାସନିକ କ୍ଷେତ୍ରରେ ଏକ ବଡ଼ ପରିବର୍ତ୍ତନ ଆଣିବ ବୋଲି ଆଶା କରାଯାଉଛି। ବର୍ଷ ବର୍ଷ ଧରି ଲୋକମାନେ ଥାନାରେ ହେଉ କି ବ୍ଲକ୍, ଜିଲ୍ଳା କାର୍ଯ୍ୟାଳୟରେ ଲାଂଚ ଚାଲିଥିବା ଅଭିଯୋଗ କରିଛନ୍ତି ।
