ପୁଣି ତେଜିଲା ମେଟ୍ରୋ ରାଜନୀତି…ମୁଖ୍ୟମନ୍ତ୍ରୀଙ୍କୁ ସାଂସଦ ଅପରାଜିତାଙ୍କ ଚିଠି

ଭୁବନେଶ୍ୱର ମେଟ୍ରୋ ରେଲ୍ ପ୍ରକଳ୍ପକୁ ରଦ୍ଦ କରିବା ନେଇ ରାଜ୍ୟ କ୍ୟାବିନେଟ୍ ନିଷ୍ପତ୍ତି ପରେ ରାଜନୈତିକ ବିତର୍କ ପୁଣି ଥରେ ମୁଣ୍ଡ ଟେକିଛି। ଭୁବନେଶ୍ୱର ଲୋକସଭା ସାଂସଦ ଅପରାଜିତା ଷଡଙ୍ଗୀ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଏକ ବିସ୍ତୃତ ଚିଠି ଲେଖି ଏହି ନିଷ୍ପତ୍ତିର ପୁନଃବିଚାର କରିବାକୁ ନିବେଦନ କରିଛନ୍ତି।

ଏପ୍ରିଲ୍ ୪ ତାରିଖରେ ରାଜ୍ୟ କ୍ୟାବିନେଟ୍ ଭୁବନେଶ୍ୱର ମେଟ୍ରୋ ପ୍ରକଳ୍ପ ପାଇଁ ଦିଲ୍ଲୀ ମେଟ୍ରୋ ରେଲ୍ କର୍ପୋରେସନ୍ (ଡିଏମ୍‌ଆର୍‌ସି) ସହିତ ଥିବା ଚୁକ୍ତିକୁ ସ୍ଥଗିତ ରଖିବାର ନିଷ୍ପତ୍ତି ନେଇଥିଲା। ଏହା ପରେ ରାଜଧାନୀରେ ମେଟ୍ରୋ ପ୍ରକଳ୍ପ ନେଇ ବିତର୍କ ଆରମ୍ଭ ହୋଇଥିଲା। ଏହି ପରିପ୍ରେକ୍ଷୀରେ ବିଜେପି ସାଂସଦ ଅପରାଜିତା ଷଡଙ୍ଗୀ ଏପ୍ରିଲ୍ ୮ ତାରିଖରେ ମୁଖ୍ୟମନ୍ତ୍ରୀଙ୍କୁ ଚିଠି ଲେଖି ପ୍ରକଳ୍ପର ପୁନଃବିଚାର କରିବାକୁ ଅନୁରୋଧ କରିଛନ୍ତି।

ଚିଠିରେ ସାଂସଦ ଷଡଙ୍ଗୀ ଲେଖିଛନ୍ତି ଯେ, ସାମ୍ପ୍ରତିକ ବର୍ଷଗୁଡ଼ିକରେ ଭୁବନେଶ୍ୱର ଓ ଆଖପାଖ ଅଞ୍ଚଳରେ ଜନସଂଖ୍ୟା ଦ୍ରୁତ ଗତିରେ ବୃଦ୍ଧି ପାଇଛି। ଏହା ସହିତ ଟ୍ରାଫିକ୍ ଜାମ୍ ଓ ପରିବହନ ଉପରେ ଚାପ ବଢ଼ିଛି। ମେଟ୍ରୋ ପ୍ରକଳ୍ପ କେବଳ ଏକ ଲାଭଜନକ ପ୍ରକଳ୍ପ ନୁହେଁ, ବରଂ ଜନସାଧାରଣଙ୍କ ସୁବିଧା ପାଇଁ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ। ବର୍ତ୍ତମାନର ନିଷ୍ପତ୍ତି ଜନସାଧାରଣଙ୍କ ଦାବି ଓ ରାଜଧାନୀର ଦୀର୍ଘକାଳୀନ ନଗର ଯୋଜନା ସହିତ ମେଳ ଖାଉନାହିଁ ବୋଲି ସେ ଉଲ୍ଲେଖ କରିଛନ୍ତି।

ସାଂସଦ ଷଡଙ୍ଗୀ ଆହୁରି କହିଛନ୍ତି ଯେ, ମେଟ୍ରୋ ରେଲ୍ ବରିଷ୍ଠ ନାଗରିକ, ମହିଳା, ଛାତ୍ର-ଛାତ୍ରୀ ଓ କର୍ମଜୀବୀଙ୍କ ପାଇଁ ଅତ୍ୟନ୍ତ ଉପଯୋଗୀ ହେବ। ଏହା ଯାତାୟାତ ସମସ୍ୟାର ସ୍ଥାୟୀ ସମାଧାନ ଆଣିପାରିବ। ସେ ମୁଖ୍ୟମନ୍ତ୍ରୀଙ୍କୁ ଅନୁରୋଧ କରିଛନ୍ତି ଯେ, ଏପ୍ରିଲ୍ ୪ ତାରିଖର କ୍ୟାବିନେଟ୍ ନିଷ୍ପତ୍ତିକୁ ପୁନଃବିଚାର କରି ପ୍ରକଳ୍ପକୁ ଆଗକୁ ବଢ଼ାଯାଉ। ଏଥିରେ କେନ୍ଦ୍ର ସରକାରଙ୍କ ସହିତ ଯୋଗାଯୋଗ ଓ ଅର୍ଥ ସହାୟତା ପାଇଁ ସେ ସମସ୍ତ ସହଯୋଗ କରିବେ ବୋଲି ପ୍ରତିଶ୍ରୁତି ଦେଇଛନ୍ତି।

ଏହି ଚିଠି ପରେ ସାଂସଦ ଷଡଙ୍ଗୀ ନିଜର ଏକ୍ସ ଆକାଉଣ୍ଟରେ ପୋଷ୍ଟ କରି ଲେଖିଛନ୍ତି, “ମୁଁ ମାନ୍ୟବର ମୁଖ୍ୟମନ୍ତ୍ରୀ ଶ୍ରୀ ମୋହନ ମାଝୀଙ୍କ ସହିତ କଥା ହୋଇଛି ଏବଂ ଭୁବନେଶ୍ୱର ମେଟ୍ରୋ ରେଲ୍ ପ୍ରକଳ୍ପ ସ୍ଥଗିତ କରିବାର ରାଜ୍ୟ କ୍ୟାବିନେଟ୍ ନିଷ୍ପତ୍ତିକୁ ପୁନଃବିଚାର କରିବାକୁ ଅନୁରୋଧ କରିଛି। କେତେକ ପ୍ରକଳ୍ପ ଜନହିତ ପାଇଁ କରାଯାଏ, ଲାଭ ପାଇଁ ନୁହେଁ।

ଏହି ଘଟଣା ପରେ ରାଜ୍ୟରେ ମେଟ୍ରୋ ପ୍ରକଳ୍ପ ନେଇ ଆଲୋଚନା ପୁଣି ତେଜିଛି। ବିରୋଧୀ ଦଳ ଓ ସାଧାରଣ ଜନତା ମଧ୍ୟରେ ମିଶ୍ର ପ୍ରତିକ୍ରିୟା ଦେଖାଦେଇଛି। କେହି କେହି ପ୍ରକଳ୍ପର ଆର୍ଥିକ ଦିଗ ନେଇ ପ୍ରଶ୍ନ ଉଠାଉଛନ୍ତି ତ ଆଉ କେହି ଜନସାଧାରଣଙ୍କ ସୁବିଧା ଓ ନଗର ବିକାଶ ଦୃଷ୍ଟିରୁ ଏହାକୁ ଆଗକୁ ବଢ଼ାଇବାକୁ ଦାବି କରୁଛନ୍ତି।ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ଏ ବିଷୟରେ ଏ ଯାଏଁ କୌଣସି ପ୍ରତିକ୍ରିୟା ମିଳିନାହିଁ। ସାଂସଦଙ୍କ ଚିଠି ଉପରେ ସରକାର କି ନିଷ୍ପତ୍ତି ନେବେ, ତାହା ଏବେ ଦେଖିବାକୁ ବାକି ରହିଲା।