ବଦଳିଲେ ଏସପି, ଜିଲ୍ଲାପାଳ

ଗୁଣ୍ଡିଚା ମନ୍ଦିର ସମ୍ମୁଖରେ ରଥ ଉପରେ ମହାପ୍ରଭୁଙ୍କୁ ଦର୍ଶନ କରିବା ବେଳେ ଦଳାଚକଟା ଘଟିଥିଲା । ଦଳାଚକଟାରେ ତିନି ଜଣ ଭକ୍ତଙ୍କ ପ୍ରାଣହାନି ଘଟିଥିଲା । ଏହି ଘଟଣାରେ ବଦଳିଛନ୍ତି ପୁରୀ ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ବାଇଁ। ତୁରନ୍ତ କାର୍ଯ୍ୟରେ ଯୋଗ ଦେଇଛନ୍ତି ନୂଆ ଜିଲ୍ଲାପାଳ ଚଞ୍ଚଳ ରାଣା। ଶ୍ରୀ ରାଣା ଆଜି ଶରଧାବାଲିରେ ପହଞ୍ଚି ମହାପ୍ରଭୁଙ୍କ ଆଶୀର୍ବାଦ ଭିକ୍ଷା କରିଛନ୍ତି। ସେ କହିଛନ୍ତି, ସମସ୍ତଙ୍କ ସହଯୋଗରେ ମହାପ୍ରଭୁଙ୍କ ରଥଯାତ୍ରା ଶୃଙ୍ଖଳିତ କରିବାକୁ ଉଦ୍ୟମ କରିବୁ। ଭକ୍ତମାନେ ଯେଭଳି ଏକ ସୁଖଦ ଅନୁଭୂତି ନେଇ ଫେରିବେ ତାହା ଆମେ ନିଶ୍ଚିତ କରିବୁ। ଭକ୍ତଙ୍କ ସୁରକ୍ଷା ଓ ଶୃଙ୍ଖଳା ଆମର ପ୍ରାଥମିକତା ରହିବ ବୋଲି ସେ ଏହି ଅବସରରେ କହିଛନ୍ତି।
ରଥ ଟଣା ଦିନ ପ୍ରବଳ ଜନସମାଗମ ହୋଇଥିଲା । ପ୍ରଥମ ଦିନ ରଥ ଟଣା ହୋଇପାରିଲା ନାହିଁ । ଦ୍ବିତୀୟ ଦିନ ରଥ ଟଣା ହେଲା । କିନ୍ତୁ ରାତିରେ ରଥ ଉପରେ ମହାପ୍ରଭୁଙ୍କୁ ଦର୍ଶନ କରିବା ପାଇଁ ଲୋକଙ୍କ ଭିଡ଼ ଜମିଲା । ଏହି ସମୟରେ ବଡ଼ ଦାଣ୍ଡରେ ପୋଲିସ ନଥିଲେ । ଭୁବନେଶ୍ବର ରୁ ହଜାର ହଜାର ଦୁଇ ଚକିଆ, ଚାରି ଚକିଆ ଯାନ ପୁରୀକୁ ପ୍ରବେଶ କରିଥିଲା । ଲୋକ ସାରା ରାତି ମହାପ୍ରଭୁଙ୍କୁ ରଥ ଉପରେ ଦେଖିବାକୁ ଅପେକ୍ଷା କରିଥିଲେ । ପୁରୀ ରଥଯାତ୍ରା ୨୦୨୫ ସମୟରେ ଜୁନ ୨୯ ତାରିଖରେ ଶରଧାବାଲିରେ ଏକ ଦୁଃଖଦ ଦଳାଚକଟା ଘଟଣା ଘଟିଥିଲା । ଯାହା ଫଳରେ ତିନି ଜଣ ଶ୍ରଦ୍ଧାଳୁଙ୍କର ମୃତ୍ୟୁ ହୋଇଥିଲା । ଅନେକ ଲୋକ ଆହତ ହୋଇଥିଲେ। ଶ୍ରୀଗୁଣ୍ଡିଚା ମନ୍ଦିର ନିକଟରେ ଲକ୍ଷାଧିକ ଭକ୍ତ ମହାପ୍ରଭୁ ଶ୍ରୀଜଗନ୍ନାଥଙ୍କ ଦର୍ଶନ ପାଇଁ ଏକତ୍ରିତ ହୋଇଥିଲେ ମଧ୍ୟ ପ୍ରଶାସନ ପକ୍ଷରୁ କୈାଣସି ପଦକ୍ଷେପ ରାତିରେ ନିଆଯାଇନଥିଲା। ଭକ୍ତଙ୍କର ଉତ୍କଣ୍ଠା ଓ ବ୍ୟଗ୍ରତା ଯୋଗୁଁ ଭିଡ଼ ଅସମ୍ଭାଳ ହୋଇପଡ଼ିଥିଲା
ରଥଯାତ୍ରା ସମୟରେ ଭିଡ଼ ନିୟନ୍ତ୍ରଣରେ ପ୍ରଶାସନ ବିଫଳ ହୋଇଥିବା ଅଭିଯୋଗ ହେଉଛି। ଦ୍ୱିତୀୟା ତିଥିରେ ନନ୍ଦିଘୋଷ ରଥ ଟଣା ହୋଇନଥିଲା । ଏହା ସହିତ, ଶୃଙ୍ଖଳିତ ଦର୍ଶନ ବ୍ୟବସ୍ଥାର ଅଭାବ ଦଳାଚକଟାକୁ ଆହୁରି ବଢ଼ାଇଥିଲା । ଲୋକମାନେ ବଡ଼ ଦାଣ୍ଡକୁ ପ୍ରବେଶ କରିଥିବା ବେଳେ ବାହାରକୁ ବାହାରିପାରିନଥିଲେ ।
ପ୍ରତ୍ୟକ୍ଷଦର୍ଶୀଙ୍କ କହିବା ଅନୁଯାୟୀ, ଭିଡ଼ ମଧ୍ୟରେ ଚାରମାଳ ନେଇ ଯାଇଥିବା ଦୁଇଟି ଟ୍ରକ ପଶିଥିଲା । ଯାହା ଠେଲାପେଲାକୁ ଆହୁରି ଜଟିଳ କରିଥିଲା। ଏହା ଘଟଣାକୁ ଆହୁରି ଭୟାବହ କରିଥିଲା। ରଥ ସମ୍ମୁଖରେ ପୋଲିସ କର୍ମୀଙ୍କ ଅନୁପସ୍ଥିତି ମଧ୍ୟ ଏହି ଅଘଟଣର ଏକ କାରଣ ଥିଲା। ପହୁଡ଼ ଖୋଲିବା ପରେ ଭିଡ଼ ଅସମ୍ଭାଳ ହୋଇଥିଲା । ଯାହା ନିୟନ୍ତ୍ରଣ କରିବାରେ ଅସୁବିଧା ହୋଇଥିଲା।