ସୌମ୍ୟଙ୍କ ନୂଆ ସ୍ବପ୍ନ…ବିଜୁଶ୍ରାଦ୍ଧ ଦିବସରେ ଗଠନ ହେବ ‘ଓଡ଼ିଶା ନାଗରିକ ମଞ୍ଚ’

ଆସନ୍ତା ୧୭ ରେ ବିଜୁ ପଟ୍ଟନାୟକଙ୍କ ଶ୍ରାଦ୍ଧ ଦିବସ ଅବସରରେ ଏକ ନୂଆ ରାଜନୈତିକ ପ୍ଲାଟଫର୍ମ ‘ଓଡ଼ିଶା ନାଗରିକ ମଞ୍ଚ’ ଗଠନ ହେବ। ଏହି ସୂଚନା ଦେଇଛନ୍ତି ପୂର୍ବତନ ବିଧାୟକ ସୌମ୍ୟରଞ୍ଜନ ପଟ୍ଟନାୟକ। ସେ କହିଛନ୍ତି, “ଆମେ ଓଡ଼ିଶାକୁ ଭଲ ପାଉଥିବା ସମସ୍ତ ବ୍ୟକ୍ତି ମିଳିତ ହୋଇ ଓଡ଼ିଶା ନାଗରିକ ମଞ୍ଚ ଗଠନ କରିବାକୁ ନିଷ୍ପତ୍ତି ନେଇଛୁ। ଏହା କୌଣସି ବ୍ୟକ୍ତି କିମ୍ବା ପରିବାର କେନ୍ଦ୍ରିକ ନୁହେଁ, ବରଂ ଓଡ଼ିଶାର ସାଧାରଣ ନାଗରିକଙ୍କ ସ୍ୱାର୍ଥ ଓ ବିକାଶ ପାଇଁ ଗଠିତ ହେବ।

ସୌମ୍ୟ କହିଛନ୍ତି, ”ଏହି ମଞ୍ଚ ଗଠନ ପଛର ମୁଖ୍ୟ ଉଦ୍ଦେଶ୍ୟ ହେଉଛି ଓଡ଼ିଶାର ବିଭିନ୍ନ ସମସ୍ୟା ନେଇ ସାଧାରଣ ଲୋକଙ୍କ ମତାମତ ସଂଗ୍ରହ କରି ସରକାରଙ୍କ ଦୃଷ୍ଟି ଆକର୍ଷଣ କରିବା। ବିଜୁ ପଟ୍ଟନାୟକଙ୍କ ଆଦର୍ଶ ଓ ଲିଗାସିକୁ ସମ୍ମାନ ଦେଇ ଓଡ଼ିଶାର ସାମଗ୍ରିକ ବିକାଶ ପାଇଁ ଏହି ମଞ୍ଚ କାର୍ଯ୍ୟ କରିବ ବୋଲି ସୌମ୍ୟ ପଟ୍ଟନାୟକ କହିଛନ୍ତି।

ଏହା ସହିତ ସେ ବିଜୁ ଲିଗାସି ନେଇ ପୂର୍ବରୁ ଦେଇଥିବା ମନ୍ତବ୍ୟର ପୁନରାବୃତ୍ତି କରି କହିଛନ୍ତି ଯେ, ବିଜୁ ବାବୁଙ୍କ ଲିଗାସି କେବଳ ଏକ ପରିବାରର ନୁହେଁ, ବରଂ ସମଗ୍ର ଓଡ଼ିଶାର।ଏପ୍ରିଲ୍ ୧୭ ତାରିଖରେ ଭୁବନେଶ୍ୱରରେ ଏକ ବିରାଟ ସମାବେଶ ମାଧ୍ୟମରେ ଓଡ଼ିଶା ନାଗରିକ ମଞ୍ଚର ଆନୁଷ୍ଠାନିକ ଘୋଷଣା କରାଯିବ ବୋଲି ଜଣାପଡ଼ିଛି। ଏହି ମଞ୍ଚରେ ଓଡ଼ିଶାର ବିଭିନ୍ନ କ୍ଷେତ୍ରର ପ୍ରମୁଖ ବ୍ୟକ୍ତିତ୍ୱ ଓ ନାଗରିକ ସମାଜର ସଦସ୍ୟମାନେ ଯୋଗ ଦେବେ ବୋଲି ଆଶା କରାଯାଉଛି।