କଟକ, ଡିସେମ୍ବର ୯: ବାରବାଟୀରେ ଭାରତୀୟ କ୍ରିକେଟ୍ ଟିମ୍ ଦକ୍ଷିଣ ଆଫ୍ରିକା ବିପକ୍ଷରେ ଦମ୍ଦାର ବିଜୟ ହାସଲ କରିଛି। ହାର୍ଦ୍ଦିକ ପାଣ୍ଡ୍ୟାଙ୍କର ବିସ୍ଫୋରକ ବ୍ୟାଟିଂ ଓ ବୋଲରଙ୍କ ଦମଦାର ବୋଲିଂ ଫଳରେ ୫ ମ୍ୟାଚ୍ ବିଶିଷ୍ଟ ଟି-୨୦ ଶୃଙ୍ଖଳାର ପ୍ରଥମ ମ୍ୟାଚ୍କୁ ସୂର୍ଯ୍ୟକୁମାର ଯାଦବଙ୍କ ଟିମ୍ ୧୦୧ ରନ୍ରେ ଜିତିଛି।
୧୭୬ ରନ୍ର ବିଜୟ ଲକ୍ଷ୍ୟ ନେଇ ବ୍ୟାଟିଂ କରିଥିବା ଦକ୍ଷିଣ ଆଫ୍ରିକା ୧୨.୩ ଓଭରରେ ସମସ୍ତ ୱିକେଟ୍ ହରାଇ ୭୪ ରନ୍ କରିବାକୁ ସକ୍ଷମ ହୋଇଥିଲା । ଟସ ହାରି ପ୍ରଥମେ ବ୍ୟାଟିଂ କରିଥିବା ଭାରତୀୟ ଦଳ ନିର୍ଦ୍ଧାରିତ ୨୦ ଓଭରରେ ୬ ୱିକେଟ୍ ହରାଇ ୧୭୫ ରନ୍ ସଂଗ୍ରହ କରିଥିଲା। ଏହି ବିଜୟ ସହିତ ଭାରତ ଶୃଙ୍ଖଳାରେ ୧-୦ରେ ଅଗ୍ରଣୀଲାଭ କରିଛି।
ଟିମ୍ ଇଣ୍ଡିଆର ଇନିଂସ୍କ କୁ ହାର୍ଦ୍ଦିକ ପାଣ୍ଡ୍ୟା ଚମତ୍କାରୀ ବ୍ୟାଟିଂ ବଳରେ ପୂରା ବଦଳାଇ ଦେଇଥିଲେ। ହାର୍ଦ୍ଦିକପାଣ୍ଡ୍ୟା ବିସ୍ଫୋରକ ଅର୍ଦ୍ଧଶତକ ହାସଲ କରିଥିଲେ। ହାର୍ଦ୍ଦିକ ଅପରାଜିତ ୫୯ ରନ୍ ସଂଗ୍ରହ କରିଥିଲେ। ସେ ୨୮ଟି ବଲ୍ ଖେଳି ୬ଟି ଚୌକା ଓ ୪ଟି ଛକା ମାରିଥିଲେ।
ପିଚ୍ ସାମାନ୍ୟ କଷ୍ଟକର ଥିବାରୁ ଅନ୍ୟ ବ୍ୟାଟ୍ସମ୍ୟାନ୍ମାନେ ରନ୍ କରିବାକୁ ସଂଘର୍ଷ କରୁଥିବା ବେଳେ, ହାର୍ଦ୍ଦିକ ପାଣ୍ଡ୍ୟାଙ୍କ ଧୈର୍ଯ୍ୟପୂର୍ଣ୍ଣ ,ଆକ୍ରମଣାତ୍ମକ ପାଳି ଭାରତକୁ ଏକ ସମ୍ମାନଜନକ ସ୍କୋର୍ ଆଡକୁ ନେଇଯାଇଥିଲା। ତାଙ୍କ ଇନିଂସ୍ ଦଳକୁ ଏକ ସାଧାରଣ ସ୍କୋରରୁ ବହୁତ ଉପରକୁ ଉଠାଇବାରେ ସାହାଯ୍ୟ କରିଥିଲା।
ବ୍ୟାଟିଂ ପରେ ଯେତେବେଳେ ବୋଲରମାନେ ପଡିଆକୁ ଆସିଲେ, ସେତେବେଳେ ମ୍ୟାଚ୍ ସମ୍ପୂର୍ଣ୍ଣ ରୂପେ ଭାରତ ସପକ୍ଷରେ ପରିବର୍ତ୍ତନ ହୋଇଯାଇଥିଲା। ଭାରତୀୟ ବୋଲରଙ୍କ ଆଗରେ ଦକ୍ଷିଣ ଆଫ୍ରିକାର ଟପ୍-ଅର୍ଡର ସମ୍ପୂର୍ଣ୍ଣ ଭୁଶୁଡ଼ି ପଡ଼ିଥିଲା। ୫୦ ରନ୍ ପୂରଣ ହେବା ପୂର୍ବରୁ ହିଁ ଡି କକ୍, ଷ୍ଟବ୍ସ, ମାର୍କରମ୍ ଏବଂ ମିଲର୍ଙ୍କ ପରି ମୁଖ୍ୟ ଖେଳାଳିମାନେ ଆଉଟ୍ ହୋଇ ପାଭିଲିୟନ୍ ଫେରିଥିଲେ।
କେବଳ ବ୍ରେଭିସ୍ ଏକାକୀ ଗୋଟିଏ ପଟେ ଲଢ଼େଇ ଜାରି ରଖିଥିଲେ, କିନ୍ତୁ ତାଙ୍କ ଚାରିପଟେ ଉଇକେଟ୍ ପତନ ହେବା ଏବଂ ଆବଶ୍ୟକୀୟ ରନ୍ ହାର ଅଧିକ ହେବା କାରଣରୁ ଦକ୍ଷିଣ ଆଫ୍ରିକା ପୂରା ଚେଜ୍ ସମୟରେ ପଛରେ ପଡ଼ି ରହିଥିଲା। ଶେଷରେ ଦକ୍ଷିଣ ଆଫ୍ରିକା ଦଳ ମାତ୍ର ୭୪ ରନ୍ରେ ଅଲ୍ଆଉଟ୍ ହୋଇଯାଇଥିଲା।
