ଆଇଫୋନ୍ -17 କ୍ରେଜ୍ ବଢ଼ିବାରେ ଲାଗିଛି । ଏହାକୁ କିଣିବାକୁ ଲମ୍ବା ଲାଇନ ଲାଗିଛି । ଆଜି ଲଞ୍ଚ ହୋଇଛି ଆଇଫୋନ୍-୧୭ । ଏଥିପାଇଁ ମୁମ୍ବାଇର ବିକେସି ଜିଓ ସେଣ୍ଟରରେ ଥିବା ଆପେଲ ଷ୍ଟୋର ବାହାରେ ଅସମ୍ଭାଳ ଭିଡ଼ ଦେଖିବାକୁ ମିଳିଛି । ଆଜି ଆଇଫୋନ୍ କିଣିବାକୁ ଲୋକଙ୍କ ମଧ୍ୟରେ ଠେଲାପେଲା ପରିସ୍ଥିତି ସୃଷ୍ଟି ହୋଇଥିବା ଦେଖିବାକୁ ମିଳିଛି । ଯାହା ଫଳରେ ସୁରକ୍ଷା କମୀମାନେ ଆସି ଭିଡ଼ ନିୟନ୍ତ୍ରଣ କରିବାକୁ ଚେଷ୍ଟା କରିଥିଲେ । ଏପରିକି ଗହଳି ଯୋଗୁ ସୁରକ୍ଷା କର୍ମୀ ଓ ଲୋକଙ୍କ ମଧ୍ୟରେ ମାରପିଟ୍ ପରିସ୍ଥିତି ଉପୁଜିଛି ।
ଭାରତରେ ଆଇଫୋନ୍-୧୭ ସିରିଜ୍ ବିକ୍ରୟ ଆରମ୍ଭ ହେବା ଘୋଷଣା ହେବା ପରେ ଏହାକୁ ନେଇ ଯୁବପିଢ଼ିଙ୍କ ମଧ୍ୟରେ ଉତ୍ସାହ ବଢ଼ିଛି । ମୁମ୍ବାଇ ବାନ୍ଦ୍ରା କୁର୍ଲା କମ୍ପେ୍ଲକ୍ସ ଏବଂ ଦିଲ୍ଲୀର ସାକେତରେ ଥିବା ଆପେଲ ଷ୍ଟୋରରେ ଗହଳି ଲାଗିଛି । ଅନେକ ଗ୍ରାହକ ସାରା ରାତି ଧାଡିରେ ଠିଆ ହୋଇଥିବା ଦେଖିବାକୁ ମିଳିଥିଲା । ଏପରିକି ମହାରାଷ୍ଟ୍ର ବାହାରୁ କିଛି ଲୋକ ମଧ୍ୟ ଆସିଥିବା ଜଣାପଡିଛି । ଭିଡ଼ିକୁ ଦେଖି ସ୍ପଷ୍ଟ ହେଉଛି ଯେ ଭାରତରେ ଆପେଲ ଆଇଫୋନ୍ ପ୍ରତି ଆଗ୍ରହ ନିରନ୍ତର ବୃଦ୍ଧି ପାଉଛି ।
ଆପେଲ୍ କମ୍ପାନି ସେପ୍ଟେମ୍ବର ୯ରେ ଆଇଫୋନ୍-୧୭ ବଜାରରେ ଲଞ୍ଚ କରିଥିଲା । ଏହାର ପ୍ରାରମ୍ଭିକ ମୂଲ୍ୟ ୮୨,୯୦୦ ଟଙ୍କା ରଖାଯାଇଛି । ନୂତନ ମଡେଲ୍ ଏବେ ଏକ ବଡ ୬.୩ ଇଞ୍ଚ ଡିସପ୍ଲେ ରହିଛି । କ୍ୟାମେରା ସିଷ୍ଟମରେ ମଧ୍ୟ ଏକ ବଡ ପରିବର୍ତ୍ତନ କରାଯାଇଛି । ଏଥିରେ ଏକ ୪୮-ମେଗାପିକ୍ସେଲ ଡୁଆଲ୍ ଫ୍ୟୁଜନ୍ କ୍ୟାମେରା ରହିଛି ।
