ଆଜି ଏପ୍ରିଲ୍ ୧୬ ତାରିଖ ଠାରୁ ରାଜ୍ୟର ୩୦ଟି ଜିଲ୍ଲାରେ ପ୍ରଥମ ପର୍ଯ୍ୟାୟ ଡିଜିଟାଲ୍ ଜନଗଣନା (ହାଉସ୍ ଲିଷ୍ଟିଂ ଅପରେସନ୍) ଆରମ୍ଭ ହୋଇଛି। ଏହି ଐତିହାସିକ ଡିଜିଟାଲ୍ ଜନଗଣନା ପ୍ରକ୍ରିୟାରେ ୯୦ ହଜାରରୁ ଊର୍ଦ୍ଧ୍ୱ ପ୍ରଶିକ୍ଷିତ ଅଧିକାରୀ ଓ ଗଣନାକାରୀ ଘର ଘର ବୁଲି ତଥ୍ୟ ସଂଗ୍ରହ କରୁଛନ୍ତି।
ଏହା ହେଉଛି ଦେଶର ପ୍ରଥମ ପୂର୍ଣ୍ଣ ଡିଜିଟାଲ୍ ଜନଗଣନା। ପ୍ରଥମ ପର୍ଯ୍ୟାୟରେ ଘର ତାଲିକା ଓ ଗୃହ ସମ୍ବନ୍ଧୀୟ ତଥ୍ୟ ସଂଗ୍ରହ କରାଯିବ। ଆପଣଙ୍କ ପରିବାରର ସବିଶେଷ ତଥ୍ୟ ପଚରାଯିବ। ଏପ୍ରିଲ୍ ୧୬ ରୁ ମଇ ୧୫ ତାରିଖ ପର୍ଯ୍ୟନ୍ତ ଏହି କାର୍ଯ୍ୟ ଚାଲିବ। ପୂର୍ବରୁ ଏପ୍ରିଲ୍ ୧ ରୁ ୧୫ ତାରିଖ ପର୍ଯ୍ୟନ୍ତ ସ୍ୱୟଂ ଗଣନା (ସେଲ୍ଫ୍ ଏନୁମେରେସନ୍) ପାଇଁ ଅନଲାଇନ୍ ପୋର୍ଟାଲ୍ ଖୋଲା ଥିଲା। ଭୁବନେଶ୍ୱର ମୁନିସିପାଲ୍ କର୍ପୋରେସନ୍ (ବିଏମ୍ସି) ମେୟର ସୁଲୋଚନା ଦାସ ଏହି ଗଣନା ପ୍ରକ୍ରିୟାର ପ୍ରାରମ୍ଭିକ ପର୍ଯ୍ୟାୟରେ ସାମିଲ୍ ହୋଇ ନାଗରିକଙ୍କୁ ସହଯୋଗ କରିବାକୁ ଆହ୍ୱାନ ଦେଇଛନ୍ତି।
ସେ କହିଛନ୍ତି ଯେ, ସଠିକ୍ ତଥ୍ୟ ସଂଗ୍ରହ ହେଲେ ହିଁ ରାଜ୍ୟ ଓ ଦେଶର ଉନ୍ନୟନ ପାଇଁ ଯୋଜନା ପ୍ରସ୍ତୁତ କରିବାରେ ସୁବିଧା ହେବ। ସମସ୍ତ ନାଗରିକ ଗଣନାକାରୀଙ୍କୁ ପୂର୍ଣ୍ଣ ସହଯୋଗ କରିବା ଉଚିତ୍ ବୋଲି ସେ ଅନୁରୋଧ କରିଛନ୍ତି।ଏହି ଡିଜିଟାଲ୍ ପ୍ରକ୍ରିୟାରେ ମୋବାଇଲ୍ ଆପ୍ ବ୍ୟବହାର କରାଯାଉଛି, ଯାହା ତଥ୍ୟ ସଂଗ୍ରହକୁ ଅଧିକ ସହଜ, ସ୍ୱଚ୍ଛ ଏବଂ ଦ୍ରୁତ କରିବ।
ରାଜ୍ୟ ସରକାର ଏହି ଗଣନାକୁ ସଫଳ କରିବା ପାଇଁ ସମସ୍ତ ପ୍ରସ୍ତୁତି ସମ୍ପୂର୍ଣ୍ଣ କରିଛନ୍ତି।ନାଗରିକଙ୍କୁ ଅନୁରୋଧ କରାଯାଉଛି ଯେ, ଗଣନାକାରୀଙ୍କୁ ଘରେ ପ୍ରବେଶ କରିବାକୁ ଦେବା ସହ ସଠିକ୍ ଓ ପୂର୍ଣ୍ଣ ତଥ୍ୟ ପ୍ରଦାନ କରନ୍ତୁ। କୌଣସି ପରିବାର ଯେପରି ଛାଡ଼ି ନ ଯାଏ ସେଦିଗରେ ସଚେତନ ରହିବାକୁ ଅନୁରୋଧ କରାଯାଇଛି।
