ରାଜ୍ୟରେ ବିଜେପି ସରକାର ଦାୟିତ୍ୱ ଗ୍ରହଣ କରିବାର ୫୦୦ ଦିନ ବିତି ଯାଇଛି । ତେବେ ଶାସନର ବିଫଳତାକୁ ନେଇ ଟାର୍ଗେଟ କରିଛି ବିଜେଡି । ବିଜେପି ସରକାରଙ୍କ ସଫଳତା ଠାରୁ ବିଫଳତା ତାଲିକା ଅଧିକ ଲମ୍ୱା ରହିଛି ବୋଲି ବିଜୁ ଜନତା ଦଳ କହିଛି । ଦଳର ମୁଖପାତ୍ର ତଥା ମିଡ଼ିଆ ସଂଯୋଜକ ଡ଼ ଲେନିନ ମହାନ୍ତି କହିଛନ୍ତି, ଗତ ନିର୍ବାଚନ ସମୟରେ ବିଜେପି ବିଜେଡି ସରକାରଙ୍କ ବିରୋଧରେ ବିଭିନ୍ନ ମିଥ୍ୟା ପ୍ରଚାର ଓ ଜନସାଧାରଣଙ୍କୁ ବିଭିନ୍ନ ମିଥ୍ୟା ପ୍ରତିଶ୍ରୁତି ଦେଇ କ୍ଷମତାକୁ ଆସିଥିଲା ।
କ୍ଷମତାକୁ ଆସିବା ପରେ ବିଜେପି ତାର ଅନେକ ପ୍ରତିଶ୍ରୁତି ପାଳନ କରିଥିବା ଦାବି କରିଆସୁଥିବା ବେଳେ ବାସ୍ତବରେ ରାଜ୍ୟକୁ ସୁଶାସନ ପ୍ରଦାନ କରିବାରେ ଓ ଦେଇଥିବା ଅଧିକାଂଶ ପ୍ରତିଶ୍ରୁତି ପାଳନ କରିବାରେ ବିଫଳ ହୋଇଛି । ଏହି ୫୦୦ ଦିନର ବିଜେପି ଶାସନରେ, ଓଡ଼ିଶାର ଆଇନ ଶୃଙ୍ଖଳା ପରିସ୍ଥିତି ବିପର୍ଯ୍ୟସ୍ତ ହୋଇଛି ଓ ବିଶେଷକରି ମହିଳା ମାନେ ଅସୁରକ୍ଷିତ ହୋଇ ପଡ଼ିଛନ୍ତି । ରାଜ୍ୟରେ ଦୁଷ୍କର୍ମ, ଗଣଦୁଷ୍କର୍ମ, ଅସଦାଚରଣ, ହତ୍ୟା ଇତ୍ୟାଦି ଘଟଣା ପ୍ରତିଦିନ ଖବରକାଗଜରେ ଶିରୋନାମା ପାଲଟୁଛି । ଅପରାଧ ତାଲିକାରେ ଓଡିଶା ଦେଶରେ ଅଷ୍ଟମ ସ୍ଥାନରେ ରହିଛି । ରାଜ୍ୟରେ ଗତ ୧୫ ମାସରେ ୩୭,୫୦୦ରୁ ଊଦ୍ଧ୍ୱର୍ ମହିଳା ନିର୍ଯାତନା ମାମଲା ରୁଜୁ ହୋଇଛି । ଗୋପାଳପୁର ଗଣଦୁଷ୍କର୍ମ ଘଟଣା, ବାଲେଶ୍ୱରରେ ଛାତ୍ରୀ ଆତ୍ମାହୁତି ଘଟଣା ଓ ବଳଙ୍ଗାରେ ଜଣେ ଛାତ୍ରୀଙ୍କୁ ଜିଅନ୍ତା ଜାଳିଦେବା ଘଟଣା ଜାତୀୟ ଗଣମାଧ୍ୟମରେ ଚର୍ଚ୍ଚାକୁ ଆସିବା ପରେ, ଓଡିଶା ଜାତୀୟ ଓ ଆନ୍ତର୍ଜାତୀୟ ସ୍ତରରେ ଲଜ୍ଜିତ ଓ ନିନ୍ଦିତ ହୋଇଛି । ଦେଶର ସର୍ବୋଚ୍ଚ ନ୍ୟାୟାଳୟ ଏହି ଘଟଣାରେ ପ୍ରତିକ୍ରିୟା ଦେଇ ବ୍ୟବସ୍ଥାକୁ ଦାୟୀ କରିଛନ୍ତି ।
ଡ଼ ମହାନ୍ତି କହିଛନ୍ତି, ଡବଲ ଇଞ୍ଜିନ ଡବଲ ବିକାଶ ନାରା ଦେଇ କ୍ଷମତାକୁ ଆସିଥିବା ବିଜେପି ସରକାର ବାସ୍ତବରେ ଡବଲ ବିନାଶ ଆଡ଼କୁ ଅଗ୍ରସର ହେଉଛି । ରାଜ୍ୟକୁ ମିଳୁଥିବା କେନ୍ଦ୍ରୀୟ ଅନୁଦାନ ୨୦୨୩-୨୪ ତୁଳନାରେ ୨୦୨୪-୨୫ ଆର୍ଥିକ ବର୍ଷରେ ୧୮.୧୯% କମିଗଲା । ରାଜ୍ୟର ଅଭିବୃଦ୍ଧି ହାରରେ ଦ୍ରୁତ ହ୍ରାସ ଘଟିଥିବା ବେଳେ ରାଜ୍ୟର ଋଣବୋଝ ଅହେତୁକ ବୃଦ୍ଧି ପାଇଛି । ଆନ୍ଧ୍ର ପ୍ରଦେଶ ଓ ବିହାରକୁ କେନ୍ଦ୍ର ସରକାର ସ୍ୱତନ୍ତ୍ର ଅନୁଦାନ ଦେଲେ, କିନ୍ତୁ ଓଡିଶାକୁ ମିଳିଲା ନାହିଁ । ବିଜେପିର ୨୦ ଜଣ ଏମ୍ପି ଓ ରାଜ୍ୟ ବିଜେପି ନେତାମାନେ ଏ ବିଷୟରେ ପଦଟିଏ ମୁହଁ ଖୋଲିଲେ ନାହିଁ ।
ରାଜ୍ୟରେ ବିକାଶ କାର୍ଯ୍ୟ ତ୍ୱରାନ୍ୱିତ ହେବା ପରିବର୍ତ୍ତେ ଠପ୍ ହୋଇଯାଇଛି । କେବଳ ନବୀନ ସରକାରଙ୍କ ସମୟରେ ହୋଇଥିବା କାମରେ ରଙ୍ଗ ପରିବର୍ତ୍ତନ ଓ ପୂର୍ବ ସରକାରଙ୍କ ଯୋଜନାର ନାମ ପରିବର୍ତ୍ତନ କରାଯାଇଛି ।
ସେ ଆହୁରି କହିଛନ୍ତି, ନିର୍ବାଚନ ସମୟରେ ଦେଇଥିବା ଅଧିକାଂଶ ପ୍ରତିଶ୍ରୁତି ପାଣିର ଗାର ପାଲଟିଛି । ରାଜ୍ୟରେ ଖାଲି ପଡ଼ିଥିବା ଦେଢ଼ ଲକ୍ଷ ସରକାରୀ ଚାକିରି ୨ ବର୍ଷରେ ପୂରଣ କରିବେ ବୋଲି ଦେଇଥିବା ପ୍ରତିଶ୍ରୁତି ପ୍ରତାରଣାରେ ପରିଣତ ହୋଇଛି । ନିଯୁକ୍ତି ପାଇଁ ହେଉଥିବା ପରୀକ୍ଷା ଗୁଡିକରେ ବିଭ୍ରାଟ ଦେଖିବାକୁ ମିଳିଛି । ପ୍ରାୟ ୧୬ଟି ପରୀକ୍ଷାରେ ପ୍ରଶ୍ନପତ୍ର ଲିକ୍ ଭଳି ବିଭ୍ରାଟ ହୋଇଛି । ପୋଲିସ୍ ଏସ୍ଆଇ ନିଯୁକ୍ତି ପରୀକ୍ଷାରେ ଚାକିରି ବିକ୍ରି ଭଳି ଘଟଣା ସାମ୍ନାକୁ ଆସିଛି, ଯାହା ଘୋର ଚିନ୍ତାଜନକ । ଶ୍ରୀମନ୍ଦିର ପରିଚାଳନାରେ ଅନେକ ବିଭ୍ରାଟ ନିୟମିତ ଭାବେ ସାମ୍ନାକୁ ଆସୁଥିବା ବେଳେ ରତ୍ନଭଣ୍ଡାର ଗଣତି ମଣତି କାର୍ଯ୍ୟ ସମ୍ପୂର୍ଣ୍ଣ ହୋଇନାହିଁ । ବିନା କଟନୀ ଛଟନୀରେ ଧାନ କିଣା ପ୍ରତିଶ୍ରୁତି ମଧ୍ୟ ପ୍ରତାରଣାରେ ପରିଣତ ହୋଇଛି ।
ସାର ଗଣ୍ଡିଏ ପାଇବା ପାଇଁ ରାଜ୍ୟର ଚାଷୀ ମାନଙ୍କୁ ରାଜରାସ୍ତାକୁ ଓହ୍ଲାଇବାକୁ ପଡିଛି । ଦୁର୍ନୀତି ଓ ଦୁର୍ନୀତିଗ୍ରସ୍ତ ବ୍ୟବସ୍ଥାକୁ ସମାପ୍ତ କରାଯିବ ବୋଲି ଦେଇଥିବା ପ୍ରତିଶ୍ରୁତି ମଧ୍ୟ ପାଣିର ଗାର ପାଲଟିଛି, ଓଲଟା ଦୁର୍ନୀତି ବୃଦ୍ଧି ପାଇଛି । ଲଘୁ ଖଣିଜ ସମ୍ପଦରେ ଦୁର୍ନୀତି ବୃଦ୍ଧି ପାଇବା କାରଣରୁ ଏଥିରୁ ମିଳୁଥିବା ରାଜସ୍ୱ ୧୪୮୫ କୋଟିରୁ ୬୦୦ କୋଟିକୁ ଓ ଖଣିଜ ସଂପଦରୁ ରାଜସ୍ୱ ପରିମାଣ ୫୦,୦୦୦ କୋଟିରୁ ୩୪,୦୦୦ କୋଟିକୁ ଖସି ଆସିଛି । ଚିଟ୍ଫଣ୍ଡ ଜମାକାରୀଙ୍କୁ ଟଙ୍କା ଫେରସ୍ତ ପ୍ରତିଶ୍ରୁତି ମଧ୍ୟ ଏକ ଧୋକାରେ ପରିଣତ ହୋଇଛି ।
ଡ଼ ମହାନ୍ତି କହିଛନ୍ତି, ଗତ ୫୦୦ ଦିନର ବିଜେପି ଶାସନରେ ଆମ୍ୱ ଟାକୁଆ ଖାଇ ୫ ଜଣଙ୍କ ମୃତୁ୍ୟ, ବିଷାକ୍ତ ମଦ ପିଇ ୪ ଜଣଙ୍କ ମୃତୁ୍ୟ, ରଥଯାତ୍ରା ସମୟରେ ଦଳାଚକଟାରେ ୩ ଜଣଙ୍କ ମୃତୁ୍ୟ, ସାମ୍ପ୍ରଦାୟିକ ଉତ୍ତେଜନା ଘଟି ତିନି ତିନିଟି ସହରରେ କର୍ଫୁ୍ୟ ଲଗାଯାଇଥିବା ଭଳି ଗୋଟିଏ ପରେ ଗୋଟିଏ ବିଭିନ୍ନ ଅଘଟଣ ଘଟିଛି । ଓଡିଶାକୁ ଏକ ନମ୍ୱର ରାଜ୍ୟ କରିବା ପାଇଁ ବିଜେପି ପ୍ରତିଶ୍ରୁତି ଦେଇଥିଲା, କିନ୍ତୁ ଦାଗୀମନ୍ତ୍ରୀଙ୍କ ତାଲିକାରେ ଓଡିଶା ଦେଶରେ ଏକ ନମ୍ୱର ସ୍ଥାନ ଦଖଲ କରିବାରେ ସକ୍ଷମ ହୋଇଛି । ବିଜେପି ସରକାରଙ୍କ ବିଫଳତା ତାଲିକା ଲମ୍ୱା ହୋଇଥିବା ବେଳେ, ରାଜ୍ୟ ରାଜସ୍ୱରୁ କୋଟି କୋଟି ଟଙ୍କା ଖର୍ଚ୍ଚ କରି ବିଜେପି ସରକାର ବିଜ୍ଞାପନ ମାଧ୍ୟମରେ ନିଜ ପିଠି ନିଜେ ଥାପୁଡ଼େଇବାରେ ବ୍ୟସ୍ତ ଅଛନ୍ତି ।
