୧୪ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରିବେ ମତଦାତା। ନୂଆପଡ଼ା ଓ କୋମନା ବ୍ଲକ ସମେତ ନୂଆପଡ଼ା ଓ ଖରିଆର ରୋଡ଼ ଏନଏସିରେ ୩୫୮ଟି ମତଦାନ କେନ୍ଦ୍ର କରାଯାଇଛି । ସକାଳୁ ମତଦାନ ଆରମ୍ଭ ହୋଇଛି।
ନୂଆପଡ଼ାରେ ବିଜେପି, ବିଜେଡ଼ି ଓ କଂଗ୍ରେସ ତିନି ପ୍ରମୁଖ ଦଳ ଭିତରେ ନିର୍ଣ୍ଣାୟକ ଲଢ଼େଇ । ଶାସକ ଦଳ ବିଜେପିରୁ ଜୟ ଢୋଲକିଆ, ବିଜେଡ଼ିରୁ ସ୍ନେହାଙ୍ଗିନୀ ଛୁରିଆ ଓ କଂଗ୍ରେସରୁ ଘାସିରାମ ମାଝିଙ୍କ ମଧ୍ୟରେ କଡ଼ା ଟକ୍କର ହେଉଛି । ଏହା ବ୍ୟତୀତ ସମାଜବାଦୀ ପାର୍ଟିରୁ ରମାକାନ୍ତ ହାତୀ, ବହୁଜନ ମୁକ୍ତି ପାର୍ଟିରୁ ହେମନ୍ତ ତାଣ୍ଡି, ଓଡ଼ିଶା ଜନତା ଦଳରୁ ଶୁକଧର ଦଣ୍ଡସେନା, ସ୍ୱାଧୀନ ପ୍ରାର୍ଥୀ ଭାବେ ଭକ୍ତବନ୍ଧୁ ଧରୁଆ, ନୀତା ବାଗ, ଇଂ ଚକ୍ରାନ୍ତ ଜେନା, ଆଶ୍ରୟ ମହାନନ୍ଦ, ଭୁବନଲାଲ ସାହୁ, ଲୋଚନ ମାଝି, କିଶୋର କୁମାର ବାଗ, ଲକ୍ଷ୍ମୀକାନ୍ତ ତାଣ୍ଡି ପ୍ରମୁଖ ଲଢ଼େଇ ମଇଦାନରେ ଓହ୍ଲାଇଛନ୍ତି ।
ସୂଚନା ଅନୁଯାୟୀ, ସକାଳ ସାଢ଼େ ୫ଟାରୁ ମକ୍ ପୋଲ୍ ଆରମ୍ଭ ହୋଇଥିଲା । ମକ୍ ପୋଲ୍ ପରେ ୭ଟାରୁ ମତଦାନ ଚାଲିଛି। । ସୁନାବେଡ଼ାର ୮ଟି ଉତ୍ତେଜନାପ୍ରବଣ ବୁଥରେ ଅପରାହ୍ନ ୪ଟାରେ ସରିବ ମତଦାନ । ଅନ୍ୟ ବୁଥ୍ମାନଙ୍କରେ ଅପରାହ୍ନ ୫ଟା ପର୍ଯ୍ୟନ୍ତ ମତଦାନ । ସମୟ ସରିବା ପୂର୍ବରୁ ଯେଉଁମାନେ ଧାଡ଼ିରେ ଥିବେ ଭୋଟ୍ ଦେଇପାରିବେ । ଇଭିଏମରେ ତ୍ରୁଟି ସାମ୍ନାକୁ ଆସିଲେ ସଙ୍ଗେ ସଙ୍ଗେ ରିଜର୍ଭ ରୁମରୁ ଆସିବ ବୋଲି ମୁଖ୍ୟ ନିର୍ବାଚନ ଅଧିକାରୀ ଆର ଏସ୍ ଗୋପାଳନ କହିଛନ୍ତି । ତେବେ ନୂଆପଡ଼ା ନିର୍ବାଚନ ମଣ୍ଡଳୀର ୨ ଲକ୍ଷ ୫୩ ହଜାର ୬୨୪ଜଣ ଭୋଟର ନିଜର ମତାଧିକାର ସାବ୍ୟସ୍ତ କରିବେ ।
ନୂଆପଡ଼ା ବିଧାନସଭା ନୂଆପଡ଼ା ଓ କୋମନା ବ୍ଲକ ସମେତ ଖରିଆରରୋଡ଼ ଓ ନୂଆପଡ଼ା ଏନଏସିକୁ ନେଇ ଗଠିତ । କୋମନା ବ୍ଲକର ୩୨ଟି ଓ ନୂଆପଡ଼ା ବ୍ଲକର ୩୧ଟି ପଞ୍ଚାୟତ ସମେତ ଖରିଆର ରୋଡ଼ ଏନଏସିରେ ୧୯ଟି ଓ ନୂଆପଡ଼ା ଏନଏସିରେ ୧୪ଟି ୱାର୍ଡ଼ ରହିଛି । ସମୁଦାୟ ୩୫୮ଟି ମତଦାନ କେନ୍ଦ୍ରରୁ ନୂଆପଡ଼ା ଏନଏସିରେ ୧୭ଟି, ଖରିଆର ରୋଡ଼ ଏନଏସିରେ ୧୯ଟି, ନୂଆପଡ଼ା ବ୍ଲକରେ ୧୫୭ ଓ କୋମନା ବ୍ଲକରେ ୧୬୫ଟି ବୁଥ୍ କରାଯାଇଛି । ୧ଲକ୍ଷ ୨୪ ହଜାର ୫୪୪ ଜଣ ପୁରୁଷ ଭୋଟର୍ ଥିବାବେଳେ ୧ ଲକ୍ଷ ୨୯ ହଜାର ୯୩୨ ମହିଳା ଓ ୨୧ ଜଣ ତୃତୀୟ ଲିଙ୍ଗ ମତଦାତା ରହିଛନ୍ତି । ମତଦାନ ପାଇଁ ଜିଲ୍ଲା ପ୍ରଶାସନ ବ୍ୟାପକ ବ୍ୟବସ୍ଥା ଗ୍ରହଣ କରାଯାଇଛି । ୩୯୬ଟି ପୁଲିଂ ପାର୍ଟିରେ ୧୫୮୪ ଜଣ କର୍ମଚାରୀ ନିୟୋଜିତ ହୋଇଛନ୍ତି ।
