ପାଟନା: ବିହାର ବିଧାନସଭା ନିର୍ବାଚନରେ ବିଜୟ ପରେ ରାଜ୍ୟ ଏବେ ନୂଆ ସରକାର ଗଠନକୁ ଅପେକ୍ଷା କରିଛି। ସାମ୍ବିଧାନିକ ଦୃଷ୍ଟିକୋଣରୁ ନୂଆ ସରକାର ଗଠନ ନଭେମ୍ବର ୨୪, ୨୦୨୫ ସୁଦ୍ଧା ହେବା ଆବଶ୍ୟକ ଥିବାବେଳେ, ମୁଖ୍ୟମନ୍ତ୍ରୀ ନୀତୀଶ କୁମାର ଶୀଘ୍ର କାର୍ଯ୍ୟଭାର ସମ୍ଭାଳିବାକୁ ପ୍ରସ୍ତୁତି କରୁଛନ୍ତି। ତେବେ ଆସନ୍ତାକାଲି ସେ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବାର କୁହାଯାଉଛି ।
ନୂଆ ସରକାରର ମୁଖ୍ୟ ଭାବରେ ନୀତୀଶ କୁମାରଙ୍କ ନାମ ସ୍ଥିର ହୋଇଛି। ଯଦି ସେ ଶପଥ ଗ୍ରହଣ କରନ୍ତି, ତେବେ ଏହା ତାଙ୍କର ରେକର୍ଡ ପଞ୍ଚମ ଥର ମୁଖ୍ୟମନ୍ତ୍ରୀ ପଦ ସମ୍ଭାଳିବେ । ସରକାର ଗଠନକୁ ନେଇ ଜେଡିୟୁର ଶୀର୍ଷ ନେତାମାନେ ଦିଲ୍ଲୀରେ ଡେରା ପକାଇଛନ୍ତି। ଖବର ମିଳିଛି ଯେ କେନ୍ଦ୍ର ମନ୍ତ୍ରୀ ରାଜୀବ ରଞ୍ଜନ ଓରଫ ଲଲନ ସିଂହ ଏବଂ ଜେଡିୟୁର କାର୍ଯ୍ୟକାରୀ ଅଧ୍ୟକ୍ଷ ସଞ୍ଜୟ ଝା ଶନିବାର ଦିନ ହିଁ ଦିଲ୍ଲୀରେ ପହଞ୍ଚିଛନ୍ତି। NDA ମେଣ୍ଟ ଭିତରେ ଆସନ ବଣ୍ଟନ ଓ ମନ୍ତ୍ରୀମଣ୍ଡଳର ସ୍ୱରୂପ ଉପରେ ଏହି ନେତାମାନଙ୍କ ମଧ୍ୟରେ ଆଲୋଚନା ଚାଲିଛି।
ସୋମବାର ଦିନ କ୍ୟାବିନେଟ୍ ବୈଠକ ଅନୁଷ୍ଠିତ ହେବ ଏବଂ ଏହା ପରେ ସମସ୍ତ ବିଧାୟକ ରାଜ୍ୟପାଳଙ୍କୁ ନିଜର ଇସ୍ତଫା ପତ୍ର ପ୍ରଦାନ କରିବେ। ଏହା ପରେ ମୁଖ୍ୟମନ୍ତ୍ରୀ ଆବାସରେ NDAର ବିଧାୟକ ଦଳ ବୈଠକ ହେବ। ଏହି ବୈଠକରେ ବିଧାୟକ ଦଳର ନେତା ଭାବେ ନୀତୀଶ କୁମାରଙ୍କୁ ପୁଣି ଥରେ ଚୟନ କରାଯିବ। ନେତା ଚୟନ ପରେ ନୀତୀଶ କୁମାର ରାଜଭବନ ଯାଇ ସରକାର ଗଠନ ପାଇଁ ଦାବି ଉପସ୍ଥାପନ କରିବେ। ମୁଖ୍ୟମନ୍ତ୍ରୀ ନୀତୀଶ କୁମାର ବିଳମ୍ବ ନ କରି ନଭେମ୍ବର ୨୦ ରୁ ୨୨ ତାରିଖ ମଧ୍ୟରେ ନୂଆ ମନ୍ତ୍ରୀମଣ୍ଡଳ ଗଠନ କରି କାର୍ଯ୍ୟ ଆରମ୍ଭ କରିପାରନ୍ତି।
ବିହାରର ଜନତା NDAକୁ ଯେଉଁ ବିପୁଳ ଜନମତ ଦେଇଛନ୍ତି, ତାହାର ସମ୍ମାନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ନୀତୀଶ କୁମାର ଉଭୟ ରଖିବେ। ମୋଦି ଏପରି କରିବେ ନାହିଁ ଯାହା ବିହାରବାସୀଙ୍କୁ ଅସନ୍ତୁଷ୍ଟ କରିବ । ତେଣୁ ନୀତିଶଙ୍କୁ ବିଜେପି ସମର୍ଥନ କରିବ । ଏହା ଏକ ପ୍ରକାର ସ୍ଥିର ହୋଇଛି ଯେ ବିହାରରେ ନୂଆ ସରକାର ନୀତୀଶ କୁମାରଙ୍କ ନେତୃତ୍ୱରେ ହିଁ ଗଠିତ ହେବାକୁ ଯାଉଛି। ଯାହା କି ପୂର୍ବରୁ ମୋଦି-ଶାହ ଅନେକ ଥର କହିଛନ୍ତି । ଉପମୁଖ୍ୟମନ୍ତ୍ରୀ ବିଜେପିରୁ ହୋଇପାରନ୍ତି । ମନ୍ତ୍ରୀମଣ୍ଡଳର ଅନ୍ୟ ସଦସ୍ୟମାନଙ୍କ ଉପରେ ଚୂଡ଼ାନ୍ତ ନିଷ୍ପତ୍ତି ଖୁବ୍ ଶୀଘ୍ର ନିଆଯିବ।
