ଭୁବନେଶ୍ୱର : ଓଡ଼ିଶା ରାଜନୀତିରେ ପୁଣି ଥରେ ହଲ୍ଚଲ୍ ସୃଷ୍ଟି ହୋଇଛି। ବିଜୁ ଜନତା ଦଳ (ବିଜେଡି)ର ବରିଷ୍ଠ ନେତା ତଥା ରାଜ୍ୟସଭା ସାଂସଦ ଦେବାଶିଷ ସାମନ୍ତରାୟ ଦଳୀୟ ପଦରୁ ଇସ୍ତଫା ଦେଇଛନ୍ତି। ସେ ବିଜେଡିର ସିନିଅର ସିଟିଜେନ୍ ସେଲ୍ର ଉପସଭାପତି ପଦରୁ ଇସ୍ତଫା ଦେଇ ନିଜର ପତ୍ର ବିଜେଡି ସଭାପତି ନବୀନ ପଟ୍ଟନାୟକଙ୍କ ନିକଟକୁ ପଠାଇଛନ୍ତି। ଯାହାକୁ ନେଇ ରାଜନୀତି ସରଗରମ ହୋଇଛି ।
ତାଙ୍କର ଏହି ପଦକ୍ଷେପ ରାଜନୈତିକ ମହଲରେ ଚର୍ଚ୍ଚା ଜୋର୍ ଧରିଛି । ରାଜନୀତି ସମୀକ୍ଷକମାନେ କହୁଛନ୍ତି ଦେବାଶିଷ ସାମନ୍ତରାୟ ଖୁବ୍ ଶୀଘ୍ର ବିଜେଡି ଛାଡ଼ିପାରନ୍ତି । ଅନ୍ୟ ଦଳକୁ ଯାଇପାରନ୍ତି । ପୂର୍ବରୁ ଦୁଇ ଜଣ ରାଜ୍ୟସଭା ସାଂସଦ ମମତା ମହନ୍ତ, ସୁଜିତ କୁମାର ଏହି ପନ୍ଥା ଅବଲମ୍ବନ କରି ବିଜେପି ଟିକେଟରେ ପୁଣି ରାଜ୍ୟସଭାକୁ ନିର୍ବାଚିତ ହୋଇଛନ୍ତି । ଦେବାଶିଷଙ୍କ ଆଗାମୀ ପଦକ୍ଷେପ କଣ ହେବ ତାକୁ ନେଇ ଚର୍ଚା ହେଉଛି । ଯଦି ଏହି ଆଶଙ୍କା ସତ ହୁଏ ତେବେ ସେ ବିଜେପିରେ ସାମିଲ ହୋଇପାରନ୍ତି ।
ଦେବାଶିଷ ବର୍ତ୍ତମାନ ଦଳୀୟ କାର୍ଯ୍ୟକଳାପ ଏବଂ ନିଷ୍ପତ୍ତିରେ ସନ୍ତୁଷ୍ଟ ନୁହଁନ୍ତି। ତାଙ୍କୁ ଦୀର୍ଘ ଦିନ ଧରି ଦଳରେ ଅଣଦେଖା କରାଯାଉଥିବାରୁ ଏବଂ ତାଙ୍କୁ ଗୁରୁତ୍ୱପୂର୍ଣ୍ଣ କାର୍ଯ୍ୟରୁ ଦୂରେଇ ରଖାଯାଉଥିବାରୁ ସେ ଏହି ନିଷ୍ପତ୍ତି ନେଇଛନ୍ତି।
ବିବାଦର ମୂଳ କାରଣ
ଦେବାଶିଷ ସାମନ୍ତରାୟଙ୍କ ଇସ୍ତଫା ପଛରେ କିଛି ଦିନ ତଳେ ଦଳରେ ଘଟିଥିବା ଆଭ୍ୟନ୍ତରୀଣ ବିବାଦ ରହିଛି। ସେହି ଆଭ୍ୟନ୍ତରୀଣ ବିବାଦ ଦଳରେ ନେତୃତ୍ବକୁ ନେଇ ଏବଂ କ୍ଷମତାକୁ ନେଇ । ଦଳରେ ପାଣ୍ଡିଆନଙ୍କ କ୍ଷମତା ବୃଦ୍ଧିକୁ ନେଇ ସେ ସମାଲୋଚନା କରିଛନ୍ତି । କିଛି ଦିନ ତଳେ ଶ୍ରୀମୟୀ ମିଶ୍ରଙ୍କୁ ଦଳରୁ ବିଦା କରାଯିବା ଏବଂ ପ୍ରଫୁଲ୍ଲ କୁମାର ମଲ୍ଲିକଙ୍କୁ ନିଲମ୍ବିତ କରାଯିବା ଘଟଣାକୁ ଦେବାଶିଷ କଡ଼ା ଭାଷାରେ ନିନ୍ଦା କରିଥିଲେ।
ସେ କେବଳ ଶ୍ରୀମୟୀଙ୍କୁ ସମର୍ଥନ କରି ନଥିଲେ, ବରଂ “ନବୀନ ପଟ୍ଟନାୟକ ବି ହାରିଛନ୍ତି” ବୋଲି କହି ବିଜେଡି ନେତୃତ୍ୱକୁ ଦୋହଲାଇ ଦେଇଥିଲେ। ପୂର୍ବତନ ମନ୍ତ୍ରୀ ପ୍ରତାପ ଜେନାଙ୍କ ଦସ୍ତଖତରେ ନିଲମ୍ବନ ଆଦେଶ ହୋଇଥିବାରୁ ସେ ପ୍ରତାପ ଜେନାଙ୍କୁ ମଧ୍ୟ କଟୁ ସମାଲୋଚନା କରିଥିଲେ ।
ଦେବାଶିଷ ସାମନ୍ତରାୟଙ୍କ ଏଭଳି ଖୋଲା ବୟାନବାଜି ସତ୍ତ୍ୱେ ଦଳ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନ ନେବାକୁ ନେଇ ଦଳୀୟ ମହଲରେ ଚର୍ଚ୍ଚା ଲାଗି ରହିଥିଲା । ଦଳ ତାଙ୍କୁ କାହିଁକି କାରଣ ଦର୍ଶାଅ ନୋଟିସ ପଠାଉନଥିଲା ତାହା ମଧ୍ୟ ଆଲୋଚନା ହେଉଥିଲା ।
ରାଜନୀତି ସମୀକ୍ଷକଙ୍କ ମତରେ ଦଳର ନୀତି ନିର୍ଦ୍ଧାରଣକାରୀ ଗୋଷ୍ଠୀ ଏହି ଆଶଙ୍କା କରୁଥିଲେ ଯେ ତାଙ୍କୁ ନିଲମ୍ବନ କରାଗଲେ କଟକ ଓ ଜଗତସିଂହପୁର ଅଞ୍ଚଳରେ ଦଳ ଭାଗ ଭାଗ ହୋଇଯିବ ଏବଂ ବିଭାଜନ ପ୍ରକ୍ରିୟା ଆରମ୍ଭ ହୋଇଯିବ। ଯେଉଁଥିପାଇଁ ଦଳ ତାଙ୍କ ଉପରେ କିଛି କାର୍ଯ୍ୟାନୁଷ୍ଠାନ ଗ୍ରହଣ କରୁନଥିଲା ।
ସେ ରାଜ୍ୟସଭା ସଦସ୍ୟ ଥିବାରୁ ତାଙ୍କୁ ନିଲମ୍ବନ କରାଗଲେ ସେ କାଳେ ବିଜେପିକୁ ଚାଲିଯିବେ, ସେଭଳି ଆଶଙ୍କା ରହିଛି । ତେଣୁ ବିଜେଡି ନେତୃତ୍ୱ ନିରବ ରହିଥିବା କୁହାଯାଉଛି ।
