ସୁଶାସନ ସପ୍ତାହ ଓ ବିଜେପିର ରଣନୀତି

ଭୁବନେଶ୍ୱର: ଓଡ଼ିଶାରେ ପ୍ରଥମ ଥର ପାଇଁ ପୂର୍ଣ୍ଣ ବହୁମତରେ ସରକାର ଗଢ଼ିଛି ଭାରତୀୟ ଜନତା ପାର୍ଟି । ମୁଖ୍ୟମନ୍ତ୍ରୀ ମୋହନ ମାଝୀଙ୍କ ସରକାର ଏବେ ଶାସନକୁ ତୃଣମୂଳ ସ୍ତରରେ ପହଞ୍ଚାଇବା ପାଇଁ ଅଣ୍ଟା ଭିଡ଼ିଛି। ମୋହନ ଚରଣ ମାଝୀଙ୍କ ନେତୃତ୍ୱରେ ଚାଲିଥିବା ‘ସୁଶାସନ ସପ୍ତାହ’ ମାଧ୍ୟମରେ ସରକାର ସିଧାସଳଖ ହିତାଧିକାରୀଙ୍କ ଦ୍ୱାର ଦେଶରେ ପହଞ୍ଚୁଛନ୍ତି। ଏହି ପଦକ୍ଷେପକୁ ରାଜନୈତିକ ବିଶ୍ଳେଷକମାନେ ୨୦୨୭ ପୌର ନିର୍ବାଚନ ପାଇଁ ବିଜେପିର ଏକ ଶକ୍ତିଶାଳୀ ରଣନୀତି ଭାବେ ଦେଖୁଛନ୍ତି। ସୁଶାସନ ସପ୍ତାହର ମୂଳ ଲକ୍ଷ୍ୟ ହେଉଛି ‘ଅନ୍ତ୍ୟୋଦୟ’। ଅର୍ଥାତ୍ ସରକାରୀ ଯୋଜନା ଯେପରି ସମାଜର ଶେଷ ସୀମାରେ ଠିଆ ହୋଇଥିବା ବ୍ୟକ୍ତିଙ୍କ ପାଖରେ ପହଞ୍ଚିବ, ତାହା ସୁନିଶ୍ଚିତ କରିବା। ସରକାରଙ୍କ ବିଭିନ୍ନ ଯୋଜନା ଯେପରିକି ସୁଭଦ୍ରା ଯୋଜନା, ଆୟୁଷ୍ମାନ ଭାରତ, ଏବଂ ପ୍ରଧାନମନ୍ତ୍ରୀ ଆବାସ ଯୋଜନା ଭଳି ପ୍ରମୁଖ କାର୍ଯ୍ୟକ୍ରମଗୁଡ଼ିକର ଲାଭ କେତେ ଜଣ ପାଇଛନ୍ତି ଏବଂ କେଉଁମାନେ ବାଦ୍ ପଡ଼ିଛନ୍ତି, ତାହାର ତଦାରଖ ଏହି ସପ୍ତାହରେ କରାଯାଉଛି। ବ୍ଲକ ଓ ପଞ୍ଚାୟତ ସ୍ତରରେ ଶିବିର ଆୟୋଜନ କରି ସାଧାରଣ ଜନତାଙ୍କ ଅଭିଯୋଗ ଶୁଣାଯିବା ସହ ତୁରନ୍ତ ସମାଧାନ ପାଇଁ ନିର୍ଦ୍ଦେଶ ଦିଆଯାଉଛି। ବିଜେପି ଜାଣିଛି ଯେ ନିର୍ବାଚନ ଜିତିବା ପାଇଁ ‘ହିତାଧିକାରୀ’ ଗୋଷ୍ଠୀ ହେଉଛନ୍ତି ସବୁଠାରୁ ବଡ଼ ସମ୍ବଳ। ତାଙ୍କ ସହ ଯୋଗାଯୋଗ ରଖିଲେ ତାହା ନିର୍ବାଚନ ବେଳେ ଭଲ ଫଳ ଦେବ । ସୁଶାସନ ସପ୍ତାହ ମାଧ୍ୟମରେ ଦଳର କର୍ମୀ ଓ ସରକାରୀ ପ୍ରତିନିଧିମାନେ ଘରକୁ ଘର ବୁଲି ଲୋକଙ୍କ ସହ ସମ୍ପର୍କ ଯୋଡ଼ୁଛନ୍ତି। ସେମାନଙ୍କ ସୁଃଖ ଦୁଃଖରେ ସାମିଲ ହେବାକୁ ପ୍ରତିଶ୍ରୁତି ଦେଉଛନ୍ତି । ପୂର୍ବ ସରକାରଙ୍କ ସମୟରେ ଥିବା ‘ପିସି କାରବାର’ ବା ଦୁର୍ନୀତିକୁ ହଟାଇ ସ୍ୱଚ୍ଛ ଶାସନ ଦେବାର ପ୍ରତିଶ୍ରୁତିକୁ ଏହି ଅଭିଯାନ ମାଧ୍ୟମରେ ପ୍ରମାଣିତ କରିବାକୁ ଚେଷ୍ଟା କରୁଛନ୍ତି । ଓଡ଼ିଶାର ସହରାଞ୍ଚଳରେ ବିଜେପିର ସ୍ଥିତି ପୂର୍ବରୁ ମଧ୍ୟ ଭଲ ରହିଛି, କିନ୍ତୁ ପୌର ନିର୍ବାଚନରେ ସମ୍ପୂର୍ଣ୍ଣ ପ୍ରାଧାନ୍ୟ ବିସ୍ତାର କରିବା ପାଇଁ ଦଳ ଏବେଠାରୁ ପ୍ରସ୍ତୁତି ଆରମ୍ଭ କରିଛି।