ଭୁବନେଶ୍ୱର : ଓଡ଼ିଶାର ବିକାଶକୁ ଆଗେଇ ନେବା ପାଇଁ ଆଧୁନିକ ପ୍ରଯୁକ୍ତିବିଦ୍ୟା, ସୃଜନଶୀଳତା ଏବଂ ଶୃଙ୍ଖଳିତ କାର୍ଯ୍ୟାନ୍ୱୟନ ଅତ୍ୟାବଶ୍ୟକ। ଭବିଷ୍ୟତର କର୍ମଶକ୍ତିକୁ ସୁଦୃଢ଼ କରିବା ପାଇଁ ଯୁବପିଢ଼ି ନବସୃଜନ-ଚାଳିତ ସମାଧାନ ଉପରେ ଗୁରୁତ୍ୱ ଦେବା ଜରୁରୀ। ଭୁବନେଶ୍ୱରସ୍ଥିତ ଟ୍ରାଇଡେଣ୍ଟ ଏକାଡେମୀ ଅଫ୍ ଟେକ୍ନୋଲୋଜି ପକ୍ଷରୁ ଆୟୋଜିତ ଓଡ଼ିଶା ରାଜ୍ୟ କମ୍ପ୍ୟୁଟିଂ ଅଲିମ୍ପିଆଡ୍ ର ଉଦଘାଟନୀ ଉତ୍ସବରେ ମୁଖ୍ୟ ଅତିଥି ଭାବେ ଯୋଗଦେଇ ମାନ୍ୟବର ଖାଦ୍ୟ ଯୋଗାଣ, ଖାଉଟି କଲ୍ୟାଣ ଏବଂ ବିଜ୍ଞାନ ଓ ପ୍ରଯୁକ୍ତିବିଦ୍ୟା ମନ୍ତ୍ରୀ ଶ୍ରୀ କୃଷ୍ଣ ଚନ୍ଦ୍ର ପାତ୍ର ଏହା କହିଛନ୍ତି।
ମନ୍ତ୍ରୀ ଶ୍ରୀ ପାତ୍ର ଉଦଘାଟନୀ ଉତ୍ସବରେ ପ୍ରଦୀପ ପ୍ରଜ୍ୱଳନ କରି କାର୍ଯ୍ୟକ୍ରମର ଶୁଭାରମ୍ଭ କରିଥିଲେ। ସେ ତାଙ୍କ ସମ୍ବୋଧନରେ ଶିଳ୍ପ ଜଗତର ଆବଶ୍ୟକତା ଅନୁସାରେ ଦକ୍ଷ ପରିଚାଳନା ଏବଂ ନୂତନ ଜ୍ଞାନକୌଶଳର ବ୍ୟବହାର ଉପରେ ଗୁରୁତ୍ୱାରୋପ କରିଥିଲେ।
ଏହି ଅଲିମ୍ପିଆଡରେ ଓଡ଼ିଶାର ୧୫୦ରୁ ଅଧିକ ଶିକ୍ଷାନୁଷ୍ଠାନରୁ ଛାତ୍ରଛାତ୍ରୀମାନେ ଅଂଶଗ୍ରହଣ କରିଥିଲେ, ଯାହା ଏହାକୁ ରାଜ୍ୟର ଅନ୍ୟତମ ବୃହତ୍ତମ ଛାତ୍ର-ନେତୃତ୍ୱାଧୀନ କମ୍ପ୍ୟୁଟିଂ ଇଭେଣ୍ଟରେ ପରିଣତ କରିଛି।
ଟ୍ରାଇଡେଣ୍ଟ ଗ୍ରୁପ୍ ଅଫ୍ ଇନଷ୍ଟିଚ୍ୟୁସନର ମୁଖ୍ୟ ପରାମର୍ଶଦାତା ଡକ୍ଟର ବି.ବି. ପାଣିଗ୍ରାହୀ ସ୍ୱାଗତ ଭାଷଣ ଦେଇ ଛାତ୍ରଛାତ୍ରୀଙ୍କ ମଧ୍ୟରେ କମ୍ପ୍ୟୁଟେସନାଲ୍ ଉତ୍କର୍ଷତା ଓ ବିଶ୍ଳେଷଣାତ୍ମକ ଚିନ୍ତାଧାରା ବୃଦ୍ଧି କରିବାରେ ଏଭଳି କାର୍ଯ୍ୟକ୍ରମର ଭୂମିକା ଉପରେ ଆଲୋକପାତ କରିଥିଲେ। ସମ୍ମାନିତ ଅତିଥି ଭାବେ ଶ୍ରୀ ଶ୍ରୀ ୟୁନିଭରସିଟିର ପ୍ରଫେସର ତଥା ଡିନ୍ ଡକ୍ଟର ଆର୍.ଏନ୍. ଶତପଥୀ ଯୋଗଦେଇ ନିଜର ବକ୍ତବ୍ୟ ରଖିଥିଲେ।
ଡିନ୍ ପ୍ରଫେସର (ଡକ୍ଟର) ଏ. ବରାଳ OSCO ସମ୍ପର୍କରେ ସୂଚନା ପ୍ରଦାନ କରିଥିଲେ। ଏହି ଅଲିମ୍ପିଆଡରେ ସମସ୍ୟା ସମାଧାନ ଚ୍ୟାଲେଞ୍ଜ ଏବଂ କୋଡିଂ ପ୍ରତିଯୋଗିତାର ଅନେକ ପର୍ଯ୍ୟାୟ ଅନୁଷ୍ଠିତ ହୋଇଥିଲା।
କାର୍ଯ୍ୟକ୍ରମ ଶେଷରେ ସଂଯୋଜକ ଡକ୍ଟର ସିଦ୍ଧାର୍ଥ ଶଙ୍କର ମହାପାତ୍ର ଧନ୍ୟବାଦ ଅର୍ପଣ କରିଥିଲେ।
ଏହି କାର୍ଯ୍ୟକ୍ରମ ନବସୃଜନ ଏବଂ ଦକ୍ଷତା ବିକାଶ ମାଧ୍ୟମରେ ଏକ ‘ପ୍ରଯୁକ୍ତି-ଚାଳିତ ଓଡ଼ିଶା’ ଗଠନ ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି TAT କର୍ତ୍ତୃପକ୍ଷ ପ୍ରକାଶ କରିଛନ୍ତି।
