ଅପରେସନ ସ୍ପାଇଡର ଓ୍ବେବ୍

ଅପରେସନ ସ୍ପାଇଡର ଓ୍ବେବ୍ ଯାହାକୁ ଓଡ଼ିଆରେ ଆମେ ବୁଢ଼ିଆଣି ଜାଲ ବୋଲି କହିପାରିବା । ଏହି ବୁଢ଼ିଆଣୀ ଜାଲ ଏତେ ବିଷାକ୍ତ ଆଉ ଭୟଙ୍କର ହୋଇପାରେ ତାହା ରୁଷ କେବେ ଅନୁଭବ କରିନଥିଲା । ତିନି ବର୍ଷ ଧରି ରୁଷ ଆଉ ୟୁକ୍ରେନ ଭିତରେ ଯୁଦ୍ଧ ଚାଲିଛି । ୟୁକ୍ରେନ ବୁଲି ବୁଲି ୟୁରୋପ ଆଉ ଆମେରିକାଠାରୁ ସାହାଯ୍ୟ ମାଗୁଛି, କିନ୍ତୁ ଯୁଦ୍ଧ ବନ୍ଦ ହେଉନାହିଁ । ଏହା ଭିତରେ ଅପରେସନ ସ୍ପାଇଡର ଓ୍ବେବ ବା ବୁଢ଼ିଆଣି ଜାଲ ୟୁକ୍ରେନର ବୁଦ୍ଧିମତା ଆଉ ଶକ୍ତିକୁ ପୁଣି ଥରେ ପ୍ରଦର୍ଶନ କରିଛି । ଯୁଦ୍ଧ ଯେ କେବଳ ବଡ଼ ବଡ଼ ମିଜାଇଲ ବା ଅସ୍ରରେ ଲଢ଼ାଯାଏ ନାହିଁ । ଯୁଦ୍ଧ ମୁଣ୍ଡରେ ଲଢ଼ାଯାଏ । ଆଉ ଡ୍ରୋନରେ ବି ଲଢ଼ାଯାଇପାରେ । ରୁଷ ଯେ ୟୁକ୍ରେନକୁ ଧୂଳିସାତ କରିଦେବ । ୟୁକ୍ରେନକୁ ନିଜ ଦେଶରେ ମିଶାଇଦେବ । ଏହା ଏତେ ସହଜ ନୁହେଁ । ଏବେ ତାହା ପ୍ରମାଣିତ ହୋଇଛି । ଚାରି ହଜାର କିଲୋମିଟର ଦୂରରୁ ୟୁକ୍ରେନ ରଷିଆ ଭିତରେ ଏକ ବଡ଼ ଧରଣର ଆଟାକ କରିଛି । ଏହି ଆଟାକ୍ ଡ୍ରୋନ ଦ୍ବାରା ହୋଇଛି । ଆଟାକରେ ରୁଷର 40 ଟି ଯୁଦ୍ଧ ବିମାନ ଧ୍ବଂସ ପାଇଛି । ଆଉ ଏସବୁ ସଂଗଠିତ ହୋଇଛି ଅତି ସତର୍କତାର ସହ । ବୁଦ୍ଧିମତାର ସହ ।
ରଷିଆ ଭିତରେ ବୁଲୁଥିଲା ଏକ ଟ୍ରକ । ଏହି ଟ୍ରକ ଭିତରେ ଥିଲା 117ଟି ଡ୍ରୋନ । ଯେଉଁ ଟ୍ରକକୁ ରଷିଆର ଗୁଇନ୍ଦା ବିଭାଗ କେବେ ସନ୍ଦେହ କରିପାରୁନଥିଲା । ଟ୍ରକ ଭିତରେ ଥିଲା ଏଫପିଭି (ଫାଷ୍ଟ ପରସନ ଭ୍ୟୁ) ଡ୍ରୋନ । ଟ୍ରକ ଭିତରେ ଥିବା ଏହି ଡ୍ରୋନ ଗୁଡ଼ିକ , ରଷିଆର ଏୟାର ବେସ ଆଡ଼କୁ ଆସୁଥିଲା । ଉପରକୁ ଜଣାପଡୁଥିଲା ଟ୍ରକରେ ସାଧାରଣ ମାଲ ପରିବହନ ହେଉଛି । କିନ୍ତୁ ଏହା ଭିତରେ ଯେ ମାରାତ୍ମକ ଅସ୍ତ୍ର ସବୁ ଯାଉଛି ଏବଂ ରଷିଆର ଟିୟୁ 95, 22 ଏମ 3 ବମରସ କୁ ଧ୍ବଂସ କରିବାର ଶକ୍ତି ରହିଥିବା ଏକଥା ରଷିଆ ଜାଣିପାରିନଥିଲା । ରଷିଆର ଏୟାର ଡିଫେନସ ସିଷ୍ଟମ ବଡ଼ ବଡ଼ ଏୟାର ଷ୍ଟ୍ରାଇକକୁ ମୁକାବିଲା କରିବା ପାଇଁ ତିଆର କରାଯାଇଛି । କିନ୍ତୁ ଅଳ୍ପ ଉଚ୍ଚରେ ଉଡୁଥିବା ଛୋଟ ଡ୍ରୋନ ପାଇଁ ଏହି ଡିଫେନସ ବ୍ୟବସ୍ଥା କାମ କରିବାରେ ଅକ୍ଷମ । ରଷିଆର ରାଡାର ବ୍ୟବସ୍ଥା ଅତି ଉପରେ ଉଡୁଥିବା ଏୟାରକ୍ରାପ୍ଟ ଆଉ ମିଜାଇଲ ପାଇଁ ଉଦ୍ଦିଷ୍ଟ । ତେଣୁ ଛୋଟ ଡ୍ରୋନଗୁଡ଼ିକୁ ଏହା ଚିହ୍ନିପାରିଲା ନାହିଁ । ତେଣୁ ଏହି 117ଟି ଡ୍ରୋନ ଯାହା ଏୟାର ବେସ ର ଅତି ନିକଟରୁ ବିସ୍ପୋରକ ସହ ଥିଲା । 4000 କିଲୋମିଟର ଦୂରରୁ ରିମୋଟ ସହାୟତାରେ ୟୁକ୍ରେନରୁ କରାଯାଇଥିବା ଆଟାକ୍ ରଷିଆର 34 ପ୍ରତିଶତ କ୍ରୁସ ମିଜାଇଲକୁ ଧ୍ବଂସ କରିବାରେ ସକ୍ଷମ ହେଲା । ଯୁଦ୍ଧର ଦିଗ ବଦଳୁଛି, ମଣିଷର ଚିନ୍ତା କରିବାର ଶକ୍ତି ଭିନ୍ନ ଢ଼ଙ୍ଗରେ କାମ କରୁଛି, ଆଉ ଡ୍ରୋନ ଯୁଦ୍ଧର ଗତିକୁ ବଦଳାଇ ଦେଉଛି । ୟୁକ୍ରେନ ଭଳି ଛୋଟ ଦେଶ ଡ୍ରୋନ ମାଧ୍ୟମରେ ରୁଷକୁ ଚ୍ୟାଲେଂଜ ଦେଉଛି । ମୁଁ ଆପଣଙ୍କୁ ଚାଇନାର ଅଦଭୂତ ଧରଣର ଡ୍ରୋନ ବିଷୟରେ କହିବାକୁ ଚାହିଁବି । ଏ କୁନି କୁନି ଡ୍ରୋନ ସବୁ ଚାଇନା ଦ୍ବାରା ତିଆରି ହୋଇଛନ୍ତି । ଯାହା ଚଢ଼େଇ ବୋବାଇଲା ଭଳି ଶବ୍ଦ କରିବେ । ଆଉ ଆକାଶରେ ଡ୍ରୋନ ଗୁଡ଼ିକର ଚଢ଼େଇ ଉଡିବା ଭଳି ଆପଣଙ୍କୁ ଦେଖାଯିବ । କିନ୍ତୁ ଚଢ଼େଇ ଭଳି ଦେଖାଯାଉଥିବା ଡ୍ରୋନଗୁଡ଼ିକ ଥିବେ ଅତ୍ୟନ୍ତ ମାରାତ୍ମକ । 2025 ମସିହାରେ ଚାଇନାର ମିଲିଟାରି ଇଣ୍ଟେଲିଜେଂଟସ ଟେକ୍ ଏକ୍ସପୋ ରେ ଏହି ସବୁ ଡ୍ରୋନ ସବୁ ପ୍ରଦର୍ଶିତ ହୋଇଥିଲା । ଡ୍ରୋନ ଗୁଡ଼ିକ ଘରଚଟିଆ ଭଳି, ହଂସ, ଇଗଲ ଭଳି ଦେଖିବାକୁ ଥିଲା । ଆଉ ଏମାନେ ବଡ଼ ବଡ଼ ଯୁଦ୍ଧ କରିବାରେ ସକ୍ଷମ । ଏହି ଡ୍ରୋନ ଗୁଡ଼ିକୁ ଏଭଳି ତିଆରି କରାଯାଇଛି ଯେ ଆପଣ ଗୋଟିଏ ଚଢ଼େଇ ଆଉ ଡ୍ରୋନ ଭିତରେ କୈାଣସି ପାର୍ଥକ୍ୟ ପାଇବେ ନାହିଁ । ଏହାରି ଭିତରେ ମାଇକ୍ରୋ କ୍ୟାମେରା ଥିବ ଏବଂ ଯୁଦ୍ଧାସ୍ତ୍ର ସବୁ ଲୁଚି ରହିଥିବ । ଯେଉଁଥିରେ ଜିପିଏସ, ସାଟେଲାଇଟ କମୁନିକେସନ ସବୁ ଥିବ । ଆଉ ଚାଇନା ଏହି ଚଢ଼େଇ ଭଳି ଦେଖାଯାଉଥିବା ଡ୍ରୋନରୁ ରକ୍ଷା ପାଇବା ପାଇଁ ମଧ୍ୟ କେ 25 ନାମରେ ଗୋଟିଏ ଏୟାର ଡିଫେନସ ବ୍ୟବସ୍ଥା ନିଜ ସୁରକ୍ଷା ପାଇଁ ତିଆରି କରିଛି । ମୁଁ ଏବେ ଆପଣମାନଙ୍କୁ ପୃଥିବୀରେ ଡ୍ରୋନ ଦ୍ବାରା ମୃତ୍ୟୁବରଣ କରିଥିବା କିଛି ବୈଜ୍ଞାନିକ ଏବଂ ଜିହାଦିଙ୍କର ଉଦାହରଣ ଦେବାପାଇଁ ଚାହିଁବି । 2020 ମସିହାରେ ଇରାନରେ ଏଭଳି ଘଟଣା ଘଟିଥିଲା । ଇରାନରେ ଆଣବିକ ବୋମା ତିଆରିରେ ମୁଖ୍ୟ ଭୂମିକାରେ ଥିବା ବୈଜ୍ଞାନିକ ଥିଲେ ଫକିରଯାଦେ । ଯାହାଙ୍କୁ ନଭେମ୍ବର27 , 2020 ରେ ହତ୍ୟା କରାଗଲା । ଏହି ହତ୍ୟାକାଣ୍ଡ ଇସରାଏଲ ଗୁଇନ୍ଦା ସଂସ୍ଥା ମୋସାଦ କରିଥିଲା । ସେହି 2020 ମସିହାରେ କ୍ବାସେମ ସୋଲେମାନଙ୍କୁ ଆମେରିକା ଡ୍ରୋନ ଦ୍ବାରା ହତ୍ୟା କରିଥିଲା । ସୋଲେମାନ ଥିଲା ଇରାନ ମିଲିଟ୍ରିର ଜଣେ ପ୍ରମୁଖ ବ୍ୟକ୍ତି । ଯାହାଙ୍କୁ ହତ୍ୟା କରିବା ପାଇଁ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ନିର୍ଦେଶ ଦେଇଥିଲେ । ଆଉ ଜଣେ ବ୍ୟକ୍ତି ହେଉଛନ୍ତି ଅଲ ଜବାହିରି ଯାହାଙ୍କର ମୃତ୍ୟୁ ହୋଇଥିଲା ଡ୍ରୋନରେ । ଯବାହିରି , ଅଲକାଏଦାର ଲଢ଼ୁଆ ନେତା ଥିଲେ । ଯିଏ ଓସମାବିନ ଲାଡେନର ଅତ୍ୟନ୍ତ ପାଖ ଲୋକ ଥିଲେ । ଜୁଲାଇ , 31, 2022ରେ ତାଙ୍କୁ ହତ୍ୟା କରାଗଲା । ସାରା ପୃଥିବୀରେ ଜିହାଦି ତିଆର କରିବା ଏବଂ ଆମେରିକାର ଟୁଇନ ଟାଓ୍ବାର ଧ୍ବଂସ କରିବାରେ ଯଓ୍ବାହିର ହାତ ଥିଲା । ଏକା ଢ଼ଙ୍ଗରେ ଅବୁ ବକର ଅଲବାଗଦାଦିକୁ ଡ୍ରୋନ ସାହାଯ୍ୟରେ ଆମେରିକା ହତ୍ୟା କଲା । ଏହା କିପରି ସଂଭବ । ଏହି ଡ୍ରୋନ ଭିତରେ ଅଛି ଅତ୍ୟାଧୁନିକ କ୍ୟାମେରା ଯାହା ସାଟେଲାଇଟ ସହ ସଂପୃକ୍ତ । ଯାହା ନିଜର ଟାର୍ଗେଟକୁ ଭଲ ଭାବରେ ନିରୀକ୍ଷଣ କରାଯାଏ । ଆଉ ନିର୍ଦିଷ୍ଟ ସ୍ଥାନରେ କେବଳ ଟାର୍ଗେଟ ଉପରେ ଆଟାକ୍ ହୁଏ । ଏହା ଦ୍ବାରା କେହି ସାଧାରଣ ଲୋକ ମୃତାହତ ହୁଅନ୍ତି ନାହିଁ, ଜନଜୀବନ କ୍ଷତି ହୁଏ ନାହିଁ । ଯେଉଁମାନଙ୍କୁ ଟାର୍ଗେଟ କରାଯାଏ ସେମାନଙ୍କ ଗତିବିଧି ଉପରେ ନିରୀକ୍ଷଣ କରାଯାଏ । ସକାଳୁ ରାତି ଭିତରେ ଯାହା କରିଥାନ୍ତି, ସେମାନଙ୍କ ଚଳପ୍ରଚଳକୁ ଲକ୍ଷ କରାଯାଏ ଏବଂ ଡ୍ରୋନ ସାହାଯ୍ୟରେ ନିର୍ଦିଷ୍ଟ ଜାଗାରେ ସେମାନଙ୍କୁ ହତ୍ୟା କରାଯାଇଥାଏ । ବାଲକୋନିରେ ବସି ଖବର କାଗଜ ପଢ଼ିବା ସମୟରେ ହେଉ, କାରରେ ଯାତ୍ରା କରିବା ବେଳେ ହେଉ, ଡ୍ରୋନ ଯୋଗେ ଏମାନଙ୍କ ମୃତ୍ୟୁ ହୋଇଛି । ଜିହାଦିମାନଙ୍କ ବଡ଼ ଭୟ ହେଉଛି ଯେ କୈାଣସି ସ୍ଥାନରେ ଯେକୈାଣସି ମୂହୁର୍ତରେ ଏଆଇ ପରିଚାଳିତ ଡ୍ରୋନ ସାହାଯ୍ୟରେ ଜୀବନ ଚାଲିଯିବ । ଯାହା ଜାଣିବା କଷ୍ଟକର । ଏହି ଡ୍ରେନ୍ ଯୁଦ୍ଧ ସବୁ ନିରବରେ ହୁଏ । ଯାହା ବଡ଼ ଧରଣର କ୍ଷତି ଘଟାଏ । ଜୀବନ ଯାଏ । ଡ୍ରୋନ ଏକ ଭୟଙ୍କର ଅସ୍ତ୍ର । ଅପରେସନ ସିନ୍ଦୂର ବେଳେ ବି ଏହାର ଭୂମିକା ଥିଲା । ମଣିଷର ବୁଦ୍ଧି ସୂକ୍ଷ୍ମ ଆଉ ସରଳ ହେଉଛି । ଯୁଦ୍ଧ କେବଳ ମିଜାଇଲ ବା ବଡ଼ ବଡ଼ ଏୟାର କ୍ରାପ୍ଟ ମାଧ୍ୟମରେ ଲଢ଼ାଯାଉନି । ଲଢ଼ାଯାଉଛି ଡ୍ରୋନ ସାହାଯ୍ୟରେ, ଯାହା ଏଗୁଡ଼ିକ ଠାରୁ ଅଧିକ ଘାତକ ।