ଭୁବନେଶ୍ବର : +2 ଛାତ୍ରଛାତ୍ରୀଙ୍କ ଇନଷ୍ଟାଣ୍ଟ ପରୀକ୍ଷା ପ୍ରକାଶ ପାଇବା 20 ଦିନ ବିତିଲାଣି । ପିଲାମାନେ କିନ୍ତୁ +3 ନାମଲେଖାଇ ପାରୁନାହାଁନ୍ତି । ଉଚ୍ଚଶିକ୍ଷା ବିଭାଗର ବିଜ୍ଞପ୍ତି ପ୍ରକାଶ ପାଇନଥିବାରୁ ଛାତ୍ରଛାତ୍ରୀମାନେ ଚିନ୍ତାରେ ଅଛନ୍ତି । କେବେ ବିଜ୍ଞପ୍ତି ପାଇବ ଆଉ ପିଲାମାନେ ନାମ ଲେଖାଇବେ ସେଥିପାଇଁ ସେମାନେ ଅପେକ୍ଷା କରିଛନ୍ତି ।
ଚଳିତ ଶିକ୍ଷାବର୍ଷରେ ଉଚ୍ଚ ମାଧ୍ୟମିକ ଶିକ୍ଷା ପରିଷଦ , ଓଡ଼ିଶା ଦ୍ବାରା ପରିଚାଳିତ ଯୁକ୍ତ ଦୁଇ କଳା, ବିଜ୍ଞାନ , ବାଣିଜ୍ୟ ଓ ଧନ୍ଦାମୂଳକ ଶିକ୍ଷାର ଇନଷ୍ଟାଣ୍ଟ ପରୀକ୍ଷା ଗତ ତା 25 /06/ 2025 ରିଖରେ ରାଜ୍ୟର ବିଭିନ୍ନ ପରୀକ୍ଷା କେନ୍ଦ୍ରରେ ସୂଚାରୁ ଭାବେ ପରିଚାଳିତ ହୋଇଥିଲା । ବିଧିବଦ୍ଧ ଭାବରେ ଜୁଲାଇ ମାସ 18 ତାରିଖ ଶୁକ୍ରବାର ଠାରୁ ଫଳ ପ୍ରକାଶ ହୋଇସାରିଛି । ଉତ୍ତୀର୍ଣ୍ଣ ହୋଇଥିବା ଛାତ୍ରଛାତ୍ରୀମାନେ +3 ଶ୍ରେଣୀରେ ନାମ ଲେଖାଇବା ପାଇଁ ମନରେ ଆଶାବାନ୍ଧି ବସିଛନ୍ତି । ସେପଟେ ଉଚ୍ଚଶିକ୍ଷା ବିଭାଗରୁ ପର୍ଯ୍ୟାୟ କ୍ରମେ +3 ଶ୍ରେଣୀ ଗୁଡ଼ିକରେ ଆଡମିଶନ ପ୍ରକ୍ରିୟା ଶେଷ କରାଯାଇ କ୍ଲାସ ଆରମ୍ଭ ହୋଇସାରିଛି । କିନ୍ତୁ ଦ୍ବିତୀୟ ପର୍ଯ୍ୟାୟରେ ଖାଲି ପଡ଼ିଥିବା ସିଟ୍ ଗୁଡିକରେ ଆଡମିସନ କରିବା ପାଇଁ ଅନଲାଇନ ଆବେଦନ ପତ୍ର ପଇଠ କରିବାକୁ ଉଚ୍ଚଶିକ୍ଷା ବିଭାଗର ବିଜ୍ଞପ୍ତି ଏପର୍ଯ୍ୟନ୍ତ ପ୍ରକାଶ ପାଇନାହିଁ । ଯାହାକୁ ଅପେକ୍ଷା କରିଛନ୍ତି ଅନେକ ଆଶାୟୀ ।
ଅନଲାଇନ ଆବେଦନ ପାଇଁ ଯଥାଶୀଘ୍ର ଉଚ୍ଚଶିକ୍ଷା ବିଭାଗର ବିଜ୍ଞପ୍ତି ପ୍ରକାଶ କରିବାକୁ ବିଭିନ୍ନ ମହଲରୁ ନିବେଦନ କରାଯାଇଛି । ବିଜ୍ଞପ୍ତି ପ୍ରକାଶ ପାଇ ଆଡମିଶନ ପ୍ରକ୍ରିୟା ତୁରନ୍ତ ଶେଷ କରାଗଲେ ବିଳମ୍ଭରେ +3 ଶ୍ରେଣୀ ଗୁଡ଼ିକରେ ନାମ ଲେଖାଇଥିବା ବିଦ୍ୟାର୍ଥୀମାନେ ସେମାନଙ୍କର ପାଠ୍ୟକ୍ରମକୁ ସଠିକ୍ ସମୟରେ ଶେଷ କରିବାର ସୁଯୋଗ ପାଇବେ । ତେଣୁ ତୁରନ୍ତ +3 ଶ୍ରେଣୀରେ 2ୟ ପର୍ଯ୍ୟାୟ ନାମଲେଖା ବିଜ୍ଞପ୍ତି ପ୍ରକାଶ ପାଇବା ଆବଶ୍ୟକ ।
