ବିହାର ବିଧାନସଭା ନିର୍ବାଚନ ୨୦୨୫ର ପ୍ରଥମ ପର୍ଯ୍ୟାୟ ମତଦାନ ଆଜି ସକାଳ ୭ଟାରୁ କଡ଼ା ସୁରକ୍ଷା ମଧ୍ୟରେ ଆରମ୍ଭ ହୋଇଛି। ପ୍ରଥମ ପର୍ଯ୍ୟାୟରେ ୧୮ଟି ଜିଲ୍ଲାର ୧୨୧ଟି ନିର୍ବାଚନମଣ୍ଡଳୀରେ ପ୍ରାୟ ୩.୭୫ କୋଟି ଭୋଟର ୧,୩୧୪ ଜଣ ପ୍ରାର୍ଥୀଙ୍କ ଭାଗ୍ୟ ନିର୍ଣ୍ଣୟ କରିବେ। ନିର୍ବାଚନ ଆୟୋଗ (ECI) ଙ୍କ ତଥ୍ୟ ଅନୁଯାୟୀ, ସକାଳ 11ଟା ସୁଦ୍ଧା ପ୍ରଥମ ପର୍ଯ୍ୟାୟରେ ହାରାହାରି 27.65% ମତଦାନ ହୋଇଛି।
ଏହି ପର୍ଯ୍ୟାୟରେ ମଇଦାନରେ ଥିବା ପ୍ରମୁଖ ରାଜନେତାମାନେ ହେଲେ: ମହାଗଠବନ୍ଧନର ମୁଖ୍ୟମନ୍ତ୍ରୀ ପ୍ରାର୍ଥୀ ତେଜସ୍ୱୀ ଯାଦବ (ରାଘୋପୁର)। ଉପ-ମୁଖ୍ୟମନ୍ତ୍ରୀ ସମ୍ରାଟ ଚୌଧୁରୀ (ତାରାପୁର)। ଉପ-ମୁଖ୍ୟମନ୍ତ୍ରୀ ବିଜୟ କୁମାର ସିହ୍ନା (ଲକ୍ଷ୍ମୀସରାଇ)। ଜେଡିୟୁ ମନ୍ତ୍ରୀ ଶ୍ରବଣ କୁମାର ଏବଂ ବିଜୟ କୁମାର ଚୌଧୁରୀ। ଆର୍ଜେଡିରୁ ଲଢ଼ୁଥିବା ତେଜ୍ ପ୍ରତାପ ଯାଦବ ଏବଂ ବାହୁବଳୀ ନେତା ଅନନ୍ତ ସିଂହ। ପାଟନା ସାହିବରୁ ବିଜେପି ପକ୍ଷରୁ ଲୋକଗାୟିକା ମୈଥିଳୀ ଠାକୁର।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହି ନିର୍ବାଚନକୁ “ବିହାରରେ ଗଣତନ୍ତ୍ରର ଉତ୍ସବର ପ୍ରଥମ ପର୍ଯ୍ୟାୟ” ବୋଲି କହି ଭୋଟରମାନଙ୍କୁ ଉତ୍ସାହର ସହିତ ଭାଗ ନେବାକୁ ଆହ୍ୱାନ କରିଛନ୍ତି। ସେ X (ପୂର୍ବରୁ ଟ୍ୱିଟର) ରେ ଲେଖିଛନ୍ତି, “ପ୍ରଥମେ ମତଦାନ, ତାପରେ ଜଳପାନ ।
ଏହି ପର୍ଯ୍ୟାୟ ବିରୋଧୀ ମହାଗଠବନ୍ଧନ ପାଇଁ ଗୁରୁତ୍ୱପୂର୍ଣ୍ଣ । ୨୦୨୦ ନିର୍ବାଚନରେ ଏହି ୧୨୧ଟି ସିଟ୍ ମଧ୍ୟରୁ ୬୩ଟି ଜିତିଥିଲେ ମହାଗଠବନ୍ଧନ । ବିଜେପି ଏବଂ ଜେଡିୟୁ ମିଶି ୫୫ଟି ସିଟ୍ ଜିତିଥିଲେ। ପ୍ରଶାନ୍ତ କିଶୋରଙ୍କ ଜନ ସୁରାଜ ପାର୍ଟି ମଧ୍ୟ ଅନେକ ଆସନରେ ପ୍ରତିଦ୍ୱନ୍ଦ୍ୱିତା କରୁଥିବାରୁ ଏଥୀ କଣ ହେବ କହିବା ମୁସ୍କିଲ । ମତଦାନ ସକାଳ ୭ ଟାରୁ ଆରମ୍ଭ ହୋଇଛି ଏବଂ ସୁରକ୍ଷା ଦୃଷ୍ଟିରୁ କିଛି ବୁଥ୍ରେ ଏହା ସନ୍ଧ୍ୟା ୫ଟାରେ ଶେଷ ହେବ। ଦ୍ୱିତୀୟ ପର୍ଯ୍ୟାୟ ମତଦାନ ନଭେମ୍ବର ୧୧ରେ ହେବ ଏବଂ ଫଳାଫଳ ନଭେମ୍ବର ୧୪ରେ ପ୍ରକାଶ ପାଇବ।
ପ୍ରଥମ ପର୍ଯ୍ୟାୟରେ ମାଧେପୁରା, ସହରସା, ଦରଭଙ୍ଗା, ମୁଜାଫରପୁର, ଗୋପାଳଗଞ୍ଜ, ସିୱାନ, ସାରଣ, ବୈଶାଳୀ, ସମସ୍ତିପୁର, ବେଗୁସରାଇ, ଖଗାରିଆ, ମୁଙ୍ଗେର, ଲଖିସରାଇ, ଶେଖପୁରା, ନାଳନ୍ଦା, ପାଟନା, ଭୋଜପୁର ଏବଂ ବକ୍ସର ଜିଲ୍ଲାରେ ମତଦାନ ଚାଲିଛି। ପ୍ରଥମ ପର୍ଯ୍ୟାୟରେ, ରାଜ୍ୟର ୧୮ଟି ଜିଲ୍ଲାର ୧୨୧ଟି ବିଧାନସଭା ନିର୍ବାଚନମଣ୍ଡଳୀରେ ୩ କୋଟିରୁ ଅଧିକ ଭୋଟର ସେମାନଙ୍କର ମତାଧିକାର ସାବ୍ୟସ୍ତ କରିବେ।
ଏହି ୧୨୧ଟି ଆସନ ପାଇଁ ୧,୩୧୪ ଜଣ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରୁଛନ୍ତି, ଯେଉଁଥିରେ ୧,୧୯୨ ଜଣ ପୁରୁଷ ଏବଂ ୧୨୨ ଜଣ ମହିଳା ଅଛନ୍ତି। ପ୍ରଥମ ପର୍ଯ୍ୟାୟ ମତଦାନରେ ମୋଟ ୩୭.୫୧୩ ନିୟୁତ ଭୋଟର ଅଂଶଗ୍ରହଣ କରିବେ। ଏଥିରେ ୩୨୨,୦୭୭ ଜଣ ଦିବ୍ୟାଙ୍ଗ ଭୋଟର, ୬୭୩୬ ଜଣ ଶତାବ୍ଦୀ ବୟସ୍କ ଏବଂ ୯୬୦,୦୦୦ ସରକାରୀ କର୍ମଚାରୀ ଅନ୍ତର୍ଭୁକ୍ତ।
