ଭୁବନେଶ୍ୱର, ଡିଜିଟାଲ ପ୍ଲାଟଫର୍ମ ନିଉଜ ରୁମ ପକ୍ଷରୁ ମନି ମ୍ୟାଟର୍ସର ତୃତୀୟ ସଂସ୍କରଣ କନକ୍ଲେଭ୍ ଆୟୋଜିତ ହୋଇଯାଇଛି । ଓଡ଼ିଶାର ବ୍ୟବସାୟୀମାନେ କିପରି ଜାତୀୟସ୍ତରରେ ପରିଚୟ ପାଇପାରିବେ, ସେମାନଙ୍କୁ କିପରି ସହଜରେ ଲୋନମିଳିପାରିବ, ବଜାରରେ କିପରି ଓଡ଼ିଶାର ସାମଗ୍ରୀର ବିକ୍ରି ବଢ଼ିବ ତାହା ଉପରେ ଅତିଥିମାନେ ମତ ରଖିଥିଲେ । ଆଇନ ମନ୍ତ୍ରୀ ପୃଥୀରାଜ ହରିଚନ୍ଦନ କହିଥିଲେ ଯେ, ଜିଡିପିର ବଡ଼ ଯୋଗଦାନ ଏମଏସଏମଇ ସେକ୍ଟରରେ ରହିଛି । ଏହାର ଗ୍ରୋଥ ହେଲେ ବିକଶିତ ଭାରତ, ବିକଶିତ ଓଡ଼ିଶାର ସ୍ବପ୍ନ ପୂରଣ ହେବ । ସ୍ବୟଂସହାୟକ ଗୋଷ୍ଠୀମାନେ ଆଜି ଯେଉଁଭଳି ଭାବରେ ଛୋଟ ଛୋଟ ଉଦ୍ୟୋଗ କରି ଲାଭବାନ ହେଉଛନ୍ତି ତାହା ଆଗାମୀ ଦିନରୁ ଓଡ଼ିଶାର ଅର୍ଥନୀତିକୁ ସୁଦୃଢ଼ କରିବ । ଆପଣଙ୍କର ଉତ୍ପାଦନ କ୍ଲାଲିଟି ଯେତେ ଭଲ ହେବ ବିଜିନେସ ସେତେ ଆଦୃତ ହେବ । ଯେଉଁ ଏମଏସଏମଇ ଗୁଡିକ ଭଲ କାମ କରୁଛନ୍ତି ତାଙ୍କୁ ପ୍ରୋତ୍ସାହନ ଦେବା ଏବଂ ବନ୍ଦ ପଡ଼ିଥିବା ଶିଳ୍ପକୁ ଚାଲୁ କରିବାକୁ ପଡିବ । ଏବେ ରାଜ୍ୟ ସରକାର ଜୈବିକ କୃଷିର ବିକାଶ ପାଇଁ ଅନେକ ପଦକ୍ଷେପ ନେଉଥିବା ମନ୍ତ୍ରୀ କହିଥିଲେ ।
ଉଦ୍ୟୋଗୀମାନଙ୍କୁ ଶକ୍ତିଶାଳୀ କରିବା, ନୂଆ ଭାବନାକୁ ସୁଯୋଗ ସହିତ ଯୋଡ଼ିବା ଓ MSME (କ୍ଷୁଦ୍ର, ଲଘୁ ଓ ମଧ୍ୟମ ଶିଳ୍ପ) ବିକାଶ ପାଇଁ ନୂଆ ଦିଗ ଦେଖାଇବାର ଏକ ପ୍ଲାଟଫର୍ମ ବୋଲି ଏଥିରେ ଯୋଗଦେଇଥିବା ଅନ୍ୟ ଅତିଥିମାନେ ପ୍ରକାଶ କରିଥିଲେ ।
ଏହି କାର୍ଯ୍ୟକ୍ରମର ପ୍ରଥମ ଅଧିବେଶନରେ ପ୍ରିୟଦର୍ଶୀ ବଳ, ନାସନାଲ ହେଡ, Pace Stock, ଏହି କନକ୍ଲେଭର ମୂଳ ଉଦ୍ଦେଶ୍ୟ ଓ ଲକ୍ଷ୍ୟ ବିଷୟରେ ବୁଝାଇଥିଲେ। ବିଷୟ ଥିଲା “ଛୋଟ ବ୍ୟବସାୟ, ବଡ଼ ଚ୍ୟାଲେଞ୍ଜ – ଲୋନ ପାଇବାର ସହଜ ବାଟ”। ଏଥିରେ ଅତିଥି ଭାବେ ଅଂଶଗ୍ରହଣ କରିଥିଲେ ପ୍ରଦ୍ୟୁମ୍ନ ଚୌଧୁରୀ, ରିଜିଓନାଲ ହେଡ, SIDBI ଓଡ଼ିଶା । ସେ କିପରି ଉଦ୍ୟୋଗୀମାନେ ଲୋନ ପାଇପାରିବେ ତାହା ଉପରେ କହିଥିଲେ ।
ପରବର୍ତ୍ତୀ ବିଷୟ ଥିଲା “କ୍ଷୁଦ୍ର ଶିଳ୍ପ, ବଡ଼ ସ୍ବପ୍ନ – ଆଗକୁ ଯିବ କି ଓଡ଼ିଶା?”। ଏଥିରେ ସାମିଲ ହୋଇଥିଲେ ପ୍ରଦୀପ ମହାନ୍ତି ଓ CA ପୁରୁଷୋତ୍ତମ ଲାଲ କଣ୍ଡୋଇ । ଆଲୋଚନାରେ ଯୋଗ ଦେଇ ଓଡ଼ିଶାର ଏମଏସଏମଇ କ୍ଷେତ୍ରର ଭବିଷ୍ୟତ ବିଷୟରେ ଆଲୋଚନା କରିଥିଲେ ।
ଏହାପରେ “କ୍ଷୁଦ୍ର ଶିଳ୍ପର ବିକାଶ – ଓଡ଼ିଶାର ସ୍ଥାନ କେଉଁଠି?” ବିଷୟରେ ଆଲୋଚନା ହୋଇଥିଲା । ଏଥିରେ ଅତିଥି ଭାବେ ଗୋକୁଳାନନ୍ଦ ମଲ୍ଲିକ, ମାନ୍ୟବର ଏମଏସଏମଇ ମନ୍ତ୍ରୀ ସାମିଲ ହୋଇ ମତ ରଖିଥିଲେ। ରାଜ୍ୟରେ ଶିଳ୍ପ ପାଇଁ ଥିବା ସୁଯୋଗ ଉପରେ ମନ୍ତ୍ରୀ ଅନେକ ଉଦାହରଣ ଦେଇଥିଲେ । କେନ୍ଦ୍ର ସରକାର ଏବଂ ରାଜ୍ୟ ସରକାର କିପରି ଉଦ୍ୟୋଗୀମାନଙ୍କୁ ସମସ୍ତ ପ୍ରକାର ସହଯୋଗ କରୁଛନ୍ତି ତାହା ଉପରେ ଆଲୋଚନା କରିଥିଲେ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ । ସରକାରଙ୍କ ଲକ୍ଷ୍ୟ ଆତ୍ମନିର୍ଭର ଭାରତ, ଆତ୍ମନିର୍ଭର ଓଡ଼ିଶା , ତେଣୁ ସେହି ଦୃଷ୍ଟିରୁ ସରକାର କାମ କରୁଥିବା କହିଥିଲେ ମନ୍ତ୍ରୀ । ଶିଳ୍ପର ବିକାଶ ପାଇଁ କେବଳ ଡିଗ୍ରୀ ନୁହେଁ ସଠିକ ତାଲିମ ଉପରେ ଗୁରୁତ୍ବ ଦେବାକୁ ପଡ଼ିବ ବୋଲି କହିଥିଲେ । ଏପରି କରିପାରିଲେ ଷ୍ଟାର୍ଟ ଅପ୍ ସଫଳ ହେବ । ଏବେ ଯୁବକମାନେ ଷ୍ଟାର୍ଟ ଅପ୍ କରିବା ପାଇଁ ଆଗ୍ରହୀ ଥିବା ସେ କହିଛନ୍ତି । ମନ୍ତ୍ରୀ କହିଥିଲେ ଗତ ବର୍ଷ କେବଳ 275 ଜଣ ନୂଆ ଷ୍ଟାର୍ଟ ଅପ୍ ସୃଷ୍ଟି କରିଛନ୍ତି । ଯେଉଁମାନେ ଆତ୍ମନିର୍ଭର ହେବା ପାଇଁ ଚାହୁଁଛନ୍ତି ତାଙ୍କୁ ଆମେ ସମସ୍ତ ପ୍ରକାର ସାହାଯ୍ୟ କରୁଛୁ । ସରକାର ଜମି ଦେଉଛନ୍ତି, ସବସିଡ ଦେଉଛନ୍ତି, ପ୍ରଡକ୍ଟ ମଧ୍ୟ ବିକ୍ରି କରିବା ପାଇଁ ବଜାର ସୃଷ୍ଟି କରାଯାଉଛି । ଭୋକାଲ ଫର ଲୋକାଲ ଉପରେ ସରକାର ଗୁୁରୁତ୍ବ ଦେଉଛନ୍ତି । ମୁଖ୍ୟମନ୍ତ୍ରୀ କାମଧେନୁ ଯୋଜନାର ଉଦାହରଣ ଦେଇଥିଲେ ମନ୍ତ୍ରୀ । କହିଥିଲେ ଏହି ଯୋଜନା କୃଷକମାନଙ୍କୁ ସ୍ବାବଲମ୍ବୀ କରିପାରିଛି । ଯୁବ ଉଦ୍ୟୋଗୀଙ୍କୁ ସଫଳ କରିବା ପାଇଁ ସରକାର ଯତ୍ନବାନ ଥିବା ମନ୍ତ୍ରୀ କହିଥିଲେ ।
ଏହାପରେ “ବ୍ୟବସାୟ ପରିବେଶ – ସେଦିନର ଓଡ଼ିଶା, ଆଜିର ଓଡ଼ିଶା” ବିଷୟରେ ଆଲୋଚନା କରିଥିଲେ ପୃଥ୍ବୀରାଜ ହରିଚନ୍ଦନ, ମାନ୍ୟବର ଆଇନ ମନ୍ତ୍ରୀ ମନୋରଞ୍ଜନ ମିଶ୍ରଙ୍କ ଅନେକ ପ୍ରଶ୍ନର ଉତ୍ତର ଦେଇଥିଲେ । ମନ୍ତ୍ରୀ ଶ୍ରୀ ହରିଚନ୍ଦନ କହିଥିଲେ ଯେ ଓଡ଼ିଶାରେ ବ୍ୟବସାୟ କରିବା ପାଇଁ ଭଲ ସୁଯୋଗ ରହିଛି । ସରକାର ସବୁ ପ୍ରକାର ସାହାଯ୍ୟ ଦେଉଛନ୍ତି । ଯେଉଁମାନ ବାହାରୁ ଆସି ଏଠି ଶିଳ୍ପ ପ୍ରତିଷ୍ଠା କରୁଛନ୍ତି ସେମାନଙ୍କୁ ମଧ୍ୟ ସରକାର ସମସ୍ତ ପ୍ରକାର ସହଯୋଗ କରୁଛନ୍ତି । ଓଡ଼ିଶା ଏବେ ଏମଏସଏମଇ କ୍ଷେତ୍ରରେ ଦ୍ରୁତ ବିକାଶ କରୁଛି । ଓଡ଼ିଶାର ଆର୍ଥିକ ଉନ୍ନତି ପାଇଁ ଉଦ୍ୟୋଗୀମାନଙ୍କୁ ସବୁ ପ୍ରକାର ସହଯୋଗ ସରକାର କରିବା ପାଇଁ ପ୍ରୟାସ କରୁଛନ୍ତି । ଯୁବପିଢ଼ି ଉଦ୍ୟୋଗୀ ବନିବା ପାଇଁ ଆଜି ସମୟର ଆବଶ୍ୟକତାକୁ ଅନଭୁବ କରିବା ଆବଶ୍ୟକ । ମନ୍ତ୍ରୀ ହରିଚନ୍ଦନ କହିଥିଲେ ଯେ, ଓଡ଼ିଶା ଆଗାମୀ ଦିନରେ ଆର୍ଥିକ ଉନ୍ନତି କ୍ଷେତ୍ରରେ ଅନ୍ୟ ରାଜ୍ୟକୁ ପଛରେ ପକାଇବ । ଏଥିପାଇଁ ସରକାର ଅନେକ ନୂଆ ଯୋଜନା କରୁଛନ୍ତି । ଶିଳ୍ପାୟନ ପାଇଁ ସରକାର ଅଗ୍ରାଧିକାର ଦେଉଛନ୍ତି ବୋଲି କହିଥିଲେ ମନ୍ତ୍ରୀ ପୃଥିରାଜ ହରିଚନ୍ଦନ । ସଂପାଦକ, ମନୋରଞ୍ଜନ ମିଶ୍ର ମନ୍ତ୍ରୀଙ୍କୁ ଅନେକ ପ୍ରଶ୍ନ କରିଥିଲେ ଯାହାର ସହଜ ଉତ୍ତର ଦେଇ ମନ୍ତ୍ରୀ ଏପରି କହିଥିଲେ ।
ଏହା ପରେ ଆଉ ଏକ ଆଲୋଚନା ହୋଇଥିଲା । “ଓଡ଼ିଶାର କ୍ଷୁଦ୍ର ଶିଳ୍ପ – ସାରା ଦେଶରେ କେମିତି ପାଇବ ପରିଚୟ?” ଏଥିରେ ସନ୍ଦୀପ ମୋର, ରିଜିଓନାଲ ହେଡ (ପୂର୍ବ), BSE, ଆଲୋଚନା କରି ନିଜର ମତ ରଖିଥିଲେ ।
ଏହାପରେ “ସ୍ୱଦେଶୀ ବନାମ ବିଦେଶୀ – ଆମ ନଜର କୁଆଡ଼େ? ବଞ୍ଚିବ ତ କ୍ଷୁଦ୍ର ଶିଳ୍ପ?” ଏଥିରେ ଅତିଥି ଭାବେ ଯୋଗଦେଇଥିଲେ ପଞ୍ଚାନନ କାନୁନଗୋ, ପୂର୍ବତନ ଅର୍ଥ ମନ୍ତ୍ରୀ, ଓଡ଼ିଶା ଏବଂ ପ୍ରତାପ ଚନ୍ଦ୍ର ଷଡ଼ଙ୍ଗୀ, ପୂର୍ବତନ କେନ୍ଦ୍ରୀୟ MSME ମନ୍ତ୍ରୀ । ଏହି ଅଧିବେଶନରେ ସ୍ବଦେଶୀ ଦ୍ରବ୍ୟ, ବିଦେଶୀ ଦ୍ରବ୍ୟର ବ୍ୟବହାର ଚାହିଦାକୁ ନେଇ ଆଲୋଚନା ହୋଇଥିଲା । ଇଂରାଜୀ ଭାଷାକୁ ନେଇ ଅତିଥିମାନେ ମତ ରଖିଥିଲେ । ଭାଷା, ସାହିତ୍ୟ, ସଂସ୍କତି ପ୍ରଚାର ପ୍ରସାର ଉପରେ କହିଥିଲେ । ସାଂସଦ ପ୍ରତାପ ଷଡ଼ଙ୍ଗୀ କହିଥିଲେ ସ୍ବାଧୀନତା ସହ ସ୍ବଦେଶୀ ଅଙ୍ଗାଙ୍ଗୀ ଭାବେ ଜଡ଼ିତ । ଦିନେ ବ୍ରେନ ଡେଡ ହେଉଥିଲା ଏବେ ବ୍ରେନ ଗ୍ରେନ ହେଉଛି । ସ୍ବଦେଶୀ ସାମଗ୍ରୀ ଯେତେ ଅଧିକ ବ୍ୟବହାର ହେବ ଦେଶର ଅର୍ଥନୀତି ସେତେ ଅଧିକ ବୃଦ୍ଧି ପାଇବ । ସ୍ବଦେଶୀ ଜିନିଷ କିଣିବା ଦ୍ବାରା ଆମ ଦେଶର ଶକ୍ତି ବୃଦ୍ଧି ହେବ । ଆମ ସେନାର ଶକ୍ତି ବୃଦ୍ଧି ହେବ । ପୂର୍ବତନ ଅର୍ଥମନ୍ତ୍ରୀ ପଂଚାନନ କାନୁନଗୋ କହିଥିଲେ ଯେ ଯାହା ଆମ ପାଖରେ ଅଛି ତାହା ସ୍ବଦେଶୀ । ଆମଠୁ ଦୂରରେ ପ୍ରସ୍ତୁତି ହେଉଥିବା ଜିନିଷ ବିଦେଶୀ । ତେଣୁ ଆଜି ଆମେ ଏପରି ଭାବନାରେ ଉନ୍ନତି କରିପାରିବ ନାହିଁ । ମୁକ୍ତ ଅର୍ଥନୀତି ହେଲେ ରାଜ୍ୟ ଆଗେଇବ, ଦେଶ ଆଗେଇବ । ଭଲ ଜିନିଷ, କମ ଦାମରେ ହେଲେ ଲୋକେ କିଣିବେ, ବିକିବେ ।
ବିଶେଷ କରି ଏହି କନକ୍ଲେଭରେ ମାଇକ୍ରୋ, ସ୍ମଲ୍ ଆଣ୍ଡ ମିଡିଅମ ଏଣ୍ଟରପ୍ରାଇଜେସ ସଫଳ ହେବା ପାଇଁ ଅତିଥିମାନେ ନିଜ ନିଜର ସୁଚିନ୍ତିତ ମତାମତ ରଖିଥିଲେ । ଅନେକ ଗୁରୁତ୍ୱପୂର୍ଣ୍ଣ ପଦକ୍ଷେପ ବିଷୟରେ ଆଲୋଚନା ହୋଇଥିଲା । ଏହି କ୍ଷେତ୍ରପାଇଁ ଏକ ସ୍ପଷ୍ଟ ବ୍ୟବସାୟ ଯୋଜନା ପ୍ରସ୍ତୁତ କରିବା, ଲକ୍ଷ୍ୟ, ବଜାର ବିଶ୍ଲେଷଣ ଓ ଆର୍ଥିକ ଯୋଜନା ଉପରେ ଗୁରୁତ୍ବ ଦେବା ଉପରେ ଅତିଥିମାନେ ଆଲୋଚନା କରିଥିଲେ । ବଜାରର ଚାହିଦା ଓ ଗ୍ରାହକଙ୍କ ଆବଶ୍ୟକତା ବୁଝି ଉତ୍ପାଦ ବା ସେବା ଦେବା ଉପରେ ମତ ରଖିଥିଲେ । ଦ୍ରବ୍ୟ ଓ ସାମଗ୍ରୀର ଗୁଣବତ୍ତା ଓ ଗ୍ରାହକ ସେବା ଉପରେ ଗୁରୁତ୍ୱ ଦେବାପାଇଁ ଆଲୋଚନା ହୋଇଥିଲା । ସବୁଠୁ ବଡ଼ ଗ୍ରାହକଙ୍କ ବିଶ୍ୱାସ ଅର୍ଜନ କରିପାରିଲେ ବ୍ୟବସାୟ ସଫଳ ହେବ । ଆର୍ଥିକ ପରିଚାଳନା, ସରକାରୀ ଯୋଜନା ଓ ଋଣ ସୁବିଧା ବ୍ୟବହାର, ମାର୍କେଟିଂ ଉପରେ ମତ ରଖିଥିଲେ ଅତିଥି । ଯୁବ ଉଦ୍ୟୋଗୀମାନେ ନିଜର ଦକ୍ଷତା ବୃଦ୍ଧି ପାଇଁ ତାଲିମ ନେବା ଓ ଅଭିଜ୍ଞ ବ୍ୟକ୍ତିଙ୍କ ପରାମର୍ଶ ଗ୍ରହଣ କଲେ ଏମଏସଏମଇ ନିଶ୍ଚିତ ଭାବେ ସଫଳ ହେବ ଏହା କାର୍ଯ୍ୟକ୍ରମରେ ସାମିଲ ହୋଇଥିବା ଅତିଥିମାନେ ମତବ୍ୟକ୍ତ କରିଥିଲେ ।
