ପ୍ରଧାନମନ୍ତ୍ରୀ ମୋଦିଙ୍କୁ ଭେଟି ଏମିତି ସବୁ ପ୍ରଶ୍ନ କଲେ ମହିଳା କ୍ରିକେଟ ଟିମ୍

ଦକ୍ଷିଣ ଆଫ୍ରିକାକୁ ୫୨ ରନରେ ପରାସ୍ତ କରି ପ୍ରଥମ ଥର ପାଇଁ ଆଇସିସି ମହିଳା ଦିନିକିଆ ବିଶ୍ୱକପ୍  ଟାଇଟଲ୍ ହାସଲ କରିଥିବା ଭାରତୀୟ ମହିଳା କ୍ରିକେଟ୍ ଦଳର ଖେଳାଳିମାନେ ନଭେମ୍ବର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ତାଙ୍କ ବାସଭବନ ଲୋକ କଲ୍ୟାଣ ମାର୍ଗରେ ଭେଟିଥିଲେ। ଏହି ସାକ୍ଷାତ ସମୟରେ  ହୋଇଥିବା କଥାବାର୍ତ୍ତା ଏବେ ଭାଇରାଲ ହେବାରେ ଲାଗିଛି । ବିଶ୍ୱ ବିଜେତା ଦଳର ଅଧିନାୟିକା ହରମନପ୍ରୀତ କୌର ଏହି ଅବସରରେ ୨୦୧୭ ମସିହାର ସ୍ମୃତିକୁ ମନେ ପକାଇ କହିଥିଲେ ଯେ ସେତେବେଳେ ସେମାନେ ଟ୍ରଫି ବିନା ପ୍ରଧାନମନ୍ତ୍ରୀଙ୍କୁ ଭେଟିଥିଲେ। କିନ୍ତୁ ଆଜି ସେମାନେ ଟ୍ରଫି ସହିତ ଆସିଛନ୍ତି ଏବଂ ତାଙ୍କର ଇଚ୍ଛା ରହିଛି ଯେ “ଏପରି ସାକ୍ଷାତ ବାରମ୍ବାର ହେଉ।” ସେହିପରି, ଦଳର ଉପ-ଅଧିନାୟିକା ସ୍ମୃତି ମନ୍ଧାନା ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଜଣାଇ କହିଥିଲେ ଯେ ସେ ସର୍ବଦା ଖେଳାଳିମାନଙ୍କୁ ପ୍ରେରଣା ଦେଇଛନ୍ତି ଏବଂ ଆଜି ଦେଶର ଝିଅମାନେ ପ୍ରତ୍ୟେକ କ୍ଷେତ୍ରରେ ଆଗକୁ ବଢ଼ୁଛନ୍ତି, ଯେଉଁଥିରେ ପ୍ରଧାନମନ୍ତ୍ରୀଙ୍କ ଯୋଗଦାନ ଅତୁଳନୀୟ। ଅଲରାଉଣ୍ଡର ଦୀପ୍ତି ଶର୍ମା କହିଥିଲେ ଯେ ସେ ଦୀର୍ଘ ଦିନ ହେବ ପ୍ରଧାନମନ୍ତ୍ରୀଙ୍କୁ ଭେଟିବାକୁ ଅପେକ୍ଷା କରିଥିଲେ। ସେ ୨୦୧୭ କଥା ମନେ ପକାଇ କହିଲେ ଯେ ପ୍ରଧାନମନ୍ତ୍ରୀ ସେତେବେଳେ କହିଥିଲେ, “ପରିଶ୍ରମ କରୁଥାଅ, ଦିନେ ସ୍ୱପ୍ନ ପୂରଣ ହେବ।” ଆଜି ସେହି ସ୍ୱପ୍ନ ସତ ହୋଇଛି।

କଥାବାର୍ତ୍ତା ସମୟରେ ପ୍ରଧାନମନ୍ତ୍ରୀ ମୋଦୀ, ଦୀପ୍ତିଙ୍କର ‘ଜୟ ଶ୍ରୀ ରାମ’ ଇନଷ୍ଟାଗ୍ରାମ ପୋଷ୍ଟ ଏବଂ ତାଙ୍କ ହାତରେ ଥିବା ଭଗବାନ ହନୁମାନଙ୍କ ଟାଟୁ ବିଷୟରେ ଜାଣିବାକୁ ଚାହିଁଥିଲେ। ସେ ପଚାରିଥିଲେ ଯେ “ଆପଣ ଯେଉଁ ଟାଟୁ ଲଗାଇ ବୁଲୁଛନ୍ତି ତା’ର ମହତ୍ତ୍ୱ କ’ଣ?” ଉତ୍ତରରେ ଦୀପ୍ତି ହସି କହିଥିଲେ, “ଏହା ମୋତେ ଶକ୍ତି ଦିଏ।” ପିଏମ୍ ମୋଦୀ ଅଧିନାୟିକା ହରମନପ୍ରୀତଙ୍କୁ ପଚାରିଥିଲେ ଯେ ସେ ବିଜୟ ପରେ ବଲ୍‌କୁ କାହିଁକି ନିଜ ପକେଟ୍‌ରେ ରଖିଲେ? ଏହାର ଜବାବରେ ହରମନପ୍ରୀତ କହିଥିଲେ, “ଏବେ ଏହା ମୋ ପାଖରେ ଅଛି, ତେଣୁ ଏହା ମୋ ପାଖରେ ହିଁ ରହିବ। ଏବେ ବି ମୋ ବ୍ୟାଗରେ ଅଛି।”

ସେହିପରି, ଶେଫାଳୀ ବର୍ମାଙ୍କୁ ପ୍ରଧାନମନ୍ତ୍ରୀ ପଚାରିଥିଲେ ଯେ ସେ କ୍ୟାଚ୍ ଛାଡିବା ପୂର୍ବରୁ କାହିଁକି ହସୁଥିଲେ? ଏହାର ଉତ୍ତରରେ ଯୁବ ଷ୍ଟାର ଖେଳାଳି ଜଣକ କହିଥିଲେ, “ମୁଁ ମନେ ମନେ କହୁଥିଲି, ‘ଆ’ ଯା କ୍ୟାଚ୍ ମୋ ପାଖକୁ,’ ଆଉ ତାହା ହୋଇଗଲା, ସେଥିପାଇଁ ମୋତେ ହସ ଆସିଲା ଯେ ବଲ୍ ମୋ ହାତକୁ ଆସିଗଲା।”

ଅଧିନାୟିକା ହରମନପ୍ରୀତ କୌର ୨୦୧୭ରେ ଟ୍ରଫି ବିନା ପ୍ରଧାନମନ୍ତ୍ରୀଙ୍କୁ ଭେଟିବା ଏବଂ ବର୍ତ୍ତମାନ ଟ୍ରଫି ସହିତ ଭେଟିବା ମଧ୍ୟରେ ଥିବା ପାର୍ଥକ୍ୟ ଉପରେ ଆଲୋକପାତ କରି ଆଗାମୀ ଦିନରେ କିପରି ଅଧିକ ସଫଳତା ପାଇବେ ବୋଲି ପଚାରିଥିଲେ। ଉତ୍ତରରେ ମୋଦି କହିଥିଲେ: “ଭାରତରେ କ୍ରିକେଟ୍ କେବଳ ଏକ ଖେଳ ନୁହେଁ, ଏହା ଲୋକଙ୍କର ଜୀବନ ସହ ଜଡ଼ିତ। ଆପଣମାନେ ଯେଉଁ ବଡ଼ କାମ କରିଛନ୍ତି, ତାହା ସାରା ଦେଶକୁ ଖୁସି ଦେଇଛି।” ସେ ଦଳର ମାନସିକ ଦୃଢ଼ତା କୁ ପ୍ରଶଂସା କରିଥିଲେ।

ଦଳ ପ୍ରଧାନମନ୍ତ୍ରୀଙ୍କୁ ତାଙ୍କ ନାମର ସଂକ୍ଷିପ୍ତ ରୂପ ନମୋ ନମ୍ବର ଲେଖାଥିବା ଏକ ସ୍ୱତନ୍ତ୍ର ଜର୍ସି ଉପହାର ଦେଇଥିଲେ। ପ୍ରଧାନମନ୍ତ୍ରୀ ଶେଷରେ ଖେଳାଳିମାନଙ୍କୁ ନିଜ ନିଜ ସ୍କୁଲକୁ ଯାଇ ଯୁବ ପିଢ଼ିଙ୍କୁ ପ୍ରେରଣା ଦେବାକୁ ଏବଂ ‘ଫିଟ୍ ଇଣ୍ଡିଆ’ ଅଭିଯାନକୁ ପ୍ରୋତ୍ସାହିତ କରିବାକୁ ଅନୁରୋଧ କରିଥିଲେ।

ଦଳର ଷ୍ଟାର୍ ଖେଳାଳି ହରଲୀନ୍ ଦେଓଲ ପ୍ରଧାନମନ୍ତ୍ରୀଙ୍କୁ ସିଧାସଳଖ ଏକ ବ୍ୟକ୍ତିଗତ ପ୍ରଶ୍ନ ପଚାରିଥିଲେ। ସେ ପଚାରିଥିଲେ ଯେ ଏତେ ବ୍ୟସ୍ତବହୁଳ କାର୍ଯ୍ୟକ୍ରମ ସତ୍ତ୍ୱେ ପ୍ରଧାନମନ୍ତ୍ରୀ କିପରି ଏତେ ଉଜ୍ଜ୍ୱଳ ଏବଂ ଫିଟ୍ ରୁହନ୍ତି ଏବଂ ତାଙ୍କର ‘ସ୍କିନ୍‌କେୟାର୍ ରୁଟିନ୍’ କ’ଣ? ଏହି ପ୍ରଶ୍ନ ଶୁଣି ପ୍ରଧାନମନ୍ତ୍ରୀ ମୋଦି ଜୋର୍‌ରେ ହସିଥିଲେ ଏବଂ ଉତ୍ତରରେ କହିଥିଲେ ଯେ, “ମୋର ଏହି ବିଷୟ ଉପରେ କେବେ ବିଶେଷ ଧ୍ୟାନ ଯାଇନାହିଁ।” ତେବେ ପରେ ସେ ଯୋଡ଼ିଥିଲେ ଯେ ସାଧାରଣ ଲୋକଙ୍କର ଭଲପାଇବା ଏବଂ ଆଶୀର୍ବାଦ ତାଙ୍କୁ ସର୍ବଦା ଶକ୍ତି ଏବଂ ଉତ୍ସାହ ଦେଇଥାଏ।