ଧର୍ମେନ୍ଦ୍ରଙ୍କ ପ୍ରାର୍ଥନା ସଭା: ହେମା ମାଳିନୀ ଓ ଉଭୟ ଝିଅ ଅନୁପସ୍ଥିତ

ବରିଷ୍ଠ ଅଭିନେତା ଧର୍ମେନ୍ଦ୍ରଙ୍କ ଦେହାନ୍ତ ପରେ, ନଭେମ୍ବର ୨୭ ତାରିଖରେ ମୁମ୍ବାଇରେ ଦେଓଲ ପରିବାର ପକ୍ଷରୁ ତାଙ୍କର ପ୍ରାର୍ଥନା ସଭା (ପ୍ରେୟାର୍ ମିଟ୍) ଆୟୋଜିତ ହୋଇଥିଲା। ଏହି ସମୟରେ ଧର୍ମେନ୍ଦ୍ରଙ୍କ ପୁଅ ସନି ଦେଓଲ ଏବଂ ବବି ଦେଓଲ ସମସ୍ତ ଅତିଥିଙ୍କୁ ସାମ୍ନା କରିବା ସହ ଧନ୍ୟବାଦ ଜଣାଉଥିବାର ଫଟୋ ସୋସିଆଲ ମିଡିଆରେ ବହୁଳ ଭାବରେ ଭାଇରାଲ ହେବାରେ ଲାଗିଛି।  ଅଭିନେତ୍ରୀ ହେମା ମାଳିନୀ ଏବଂ ତାଙ୍କର ଉଭୟ ଝିଅ—ଈଶା ଦେଓଲ ଓ ଅହନା ଦେଓଲ—ଏହି ପ୍ରାର୍ଥନା ସଭାରେ ଶାମିଲ ହୋଇନଥିଲେ। ବଲିଉଡର ଅନେକ ବଡ଼ କଳାକାର ଏହି ସଭାରେ ଉପସ୍ଥିତ ଥିବାବେଳେ ହେମା ମାଳିନୀ ଓ ତାଙ୍କ ଝିଅମାନେ ଅନୁପସ୍ଥିତ ରହିବା ପାରିବାରିକ ସମ୍ପର୍କକୁ ନେଇ ପୁଣି ଥରେ ଚର୍ଚ୍ଚା ସୃଷ୍ଟି କରିଛି।  ତେବେ ଏହା ମଧ୍ୟ ଜଣାପଡ଼ିଛି ଯେ ଅନେକ ସେଲିବ୍ରିଟି ପ୍ରାର୍ଥନା ସଭାରେ ଯୋଗ ନଦେଇ ପରେ ହେମା ମାଳିନୀଙ୍କ ଘରକୁ ଯାଇ ତାଙ୍କୁ ବ୍ୟକ୍ତିଗତ ଭାବେ ଭେଟି ସମବେଦନା ଜଣାଇଥିଲେ।  ଉଲ୍ଲେଖନୀୟ ବିଷୟ ହେଉଛି, ଈଶା ଦେଓଲଙ୍କ ପୂର୍ବତନ ସ୍ୱାମୀ ଭରତ ତଖ୍ତାନୀ କିନ୍ତୁ ପ୍ରାର୍ଥନା ସଭାରେ ଉପସ୍ଥିତ ଥିଲେ।