ରାଞ୍ଚିରେ ପ୍ରଥମ ଦିନିକିଆରେ ରୋମାଞ୍ଚକର ବିଜୟ ପରେ ଭାରତୀୟ କ୍ରିକେଟ୍ ଦଳ ଆଜି ରାୟପୁରରେ ଦକ୍ଷିଣ ଆଫ୍ରିକା ବିପକ୍ଷରେ ତିନି ମ୍ୟାଚ୍ ବିଶିଷ୍ଟ ଶୃଙ୍ଖଳାର ଦ୍ୱିତୀୟ ମୁକାବିଲା ଖେଳିବାକୁ ପ୍ରସ୍ତୁତ ଅଛି। ବର୍ତ୍ତମାନ ଭାରତ ସିରିଜ୍ରେ ୧-୦ରେ ଆଗୁଆ ରହିଛି। ପ୍ରଥମ ଦିନିକିଆରେ ବିରାଟ କୋହଲି ତାଙ୍କର ୫୨ତମ ଦିନିକିଆ ଶତକ (୧୩୫ ରନ୍) ହାସଲ କରି ଦଳକୁ ବୃହତ୍ ସ୍କୋରରେ ପହଞ୍ଚାଇଥିଲେ। ରୋହିତ ଶର୍ମାଙ୍କ ସହ ତାଙ୍କର ଦ୍ରୁତ ଯୋଡ଼ି ଉପରେ ପୁଣି ଥରେ ସମସ୍ତଙ୍କ ନଜର ରହିଛି। ପ୍ରଥମ ମ୍ୟାଚ୍ ହାରିଥିଲେ ମଧ୍ୟ ମାର୍କୋ ଜାନସେନ୍ (୭୦ ରନ୍) ଏବଂ ମାଥ୍ୟୁ ବ୍ରିଜ୍କେ (୭୨ ରନ୍)ଙ୍କ ଲଢୁଆ ପ୍ରଦର୍ଶନ ଦଳକୁ ଲକ୍ଷ୍ୟର ନିକଟତର କରାଇଥିଲା। ଅଧିନାୟକ ତେମ୍ବା ବାଭୁମା ଏବଂ ବରିଷ୍ଠ ସ୍ପିନର କେଶବ ମହାରାଜଙ୍କ ଆଜିର ମ୍ୟାଚ୍କୁ ପ୍ରତ୍ୟାବର୍ତ୍ତନ କରିବାର ସମ୍ଭାବନା ରହିଛି, ଯାହା ଦକ୍ଷିଣ ଆଫ୍ରିକାକୁ ଶକ୍ତିଶାଳୀ କରିପାରେ। ରାୟପୁର ପିଚ୍ ସାଧାରଣତଃ ବ୍ୟାଟ୍ସମ୍ୟାନ୍ଙ୍କୁ ସହାୟତା କରେ, କିନ୍ତୁ ପୂର୍ବରୁ ଏଠାରେ ଖେଳାଯାଇଥିବା ଏକମାତ୍ର ଦିନିକିଆରେ ବୋଲରମାନେ ସଫଳତା ପାଇଥିଲେ।ଆଜିର ମୁକାବିଲାରେ ଭାରତ ବିଜୟୀ ହୋଇ ଶୃଙ୍ଖଳାକୁ ନିଜ ନାମରେ କରିବାରେ ସଫଳ ହେଉଛି କି ନାହିଁ, ତାହା ଦେଖିବାକୁ ବାକି ରହିଲା।
ରାୟପୁରରେ କିନ୍ତୁ ଶୃଙ୍ଖଳା ବାଜିରେ ଥିବାରୁ ଦକ୍ଷିଣ ଆଫ୍ରିକା ତା’ର ଶ୍ରେଷ୍ଠ ଏକାଦଶ ନେଇ ପଡ଼ିଆକୁ ଓହ୍ଲାଇବ। ଏସବୁ ସତ୍ତ୍ବେ ଭାରତ ତା’ର ଚୂଡ଼ାନ୍ତ ଏକାଦଶରେ ପରିବର୍ତ୍ତନ କରିବାର ଆଶା କମ୍ ରହିଛି। ଏଠାକାର ସହିଦ ବୀର ନାରାୟଣ ସିଂହ ଷ୍ଟାଡିୟମ୍ରେ ପୂର୍ବରୁ କେବଳ ଗୋଟିଏ ଦିବା-ରାତ୍ର ଦିନିକିଆ ମ୍ୟାଚ୍ ଖେଳାଯାଇଛି। ଏଣୁ ଏହି ଷ୍ଟାଡିୟମ୍ର ପିଚ୍ ଏକପ୍ରକାର ରହସ୍ୟ ଘେରରେ ରହିଛି। ୨୦୨୩ ମସିହାରେ ଏଠାରେ ଖେଳାଯାଇଥିବା ଭାରତ-ନ୍ୟୁଜିଲାଣ୍ଡ ମ୍ୟାଚ୍ରେ ପିଚ୍ ପେସର୍କୁ ଭରପୂର ସହାୟତା ପ୍ରଦାନ କରିଥିଲା। ଭାରତୀୟ ପେସର୍ମାନେ ସେହି ମ୍ୟାଚ୍ରେ ନ୍ୟୁଜିଲାଣ୍ଡକୁ ମାତ୍ର ୧୦୮ ରନ୍ରେ ଅଲ୍ଆଉଟ୍ କରି ଦେଇଥିଲେ। ତେବେ ଏଠାରେ ମଧ୍ୟ ରାତିରେ କାକର ପଡ଼ିବାର ଆଶଙ୍କା ଥିବାରୁ ଟସ୍ ଜିତିବା ଦଳ ପ୍ରତିପକ୍ଷକୁ ବ୍ୟାଟିଂ କରିବାକୁ ଆମନ୍ତ୍ରଣ କରିବାର ଅଧିକ ସମ୍ଭାବନା ଅଛି।
