ମନୋରଞ୍ଜନ ମିଶ୍ର
ପୁଟିନଙ୍କ ଲିମୋସିନରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ସାରା ବିଶ୍ବରେ ଏହି ଫଟୋଟିର ଝଲକ କୂଟନୀତି ଆଉ ରାଜନୀତି କେମିତି କଡ଼ ଲେଉଟାଏ ତାର ସୂଚନା ଦେଉଛି । ପୁଟିନ 10 ମିନିଟରୁ ଅଧିକ ସମୟ ନରେନ୍ଦ୍ର ମୋଦିଙ୍କୁ ଅପେକ୍ଷା କରିବା । ଏସସିଓ ସମିଟ ସ୍ଥାନରୁ ମୋଦିଙ୍କୁ କାରରେ ନେବା । ଆଉ 45 ମିନିଟ ତାଙ୍କ ସହ କାରରେ କଥା ହେବା । ଏ କଣ ଇଙ୍ଗିତ କରୁଛି । ଆଉ ଗୋଟିଏ ପାଖକୁ ଦେଖନ୍ତୁ । ସି ଜିନପିଙ୍ଗ ଆଉ ମୋଦିଙ୍କ ଭିତରେ ସ୍ମିତ ହାସ୍ୟ । ଆଉ ଏକ ନିବିଡ଼ ସଂପର୍କର ସୂଚନା ।
ଇଏ ସେହି ପୁଟିନ ଯାହାଙ୍କ ହାତରେ ନରସଂହାରର ରକ୍ତ ଲାଗିଛି । ଯାହାଙ୍କୁ ୟୁରୋପିୟ ଦେଶମାନେ ଖଳନାୟକ କହୁଛନ୍ତି । ଯିଏ 3 ବର୍ଷ ଧରି ଗୋଟିଏ ଛୋଟ ଦେଶ ଉପରେ ଆକ୍ରମଣ କରିଚାଲିଛନ୍ତି । ଆମେରିକାର ମଧ୍ୟସ୍ଥି ୟୁକ୍ରେନ ସହ ରୁଷ ଯୁଦ୍ଧ ବନ୍ଦ କରିପାରୁନି । ରୁଷିଆରୁ ତେଲ କିଣି ଭାରତ ଯୁଦ୍ଧ ପାଇଁ ଅର୍ଥ ଦେଉଛି । ପୁଟିନଙ୍କ ଏକଛତ୍ରବାଦକୁ ସମର୍ଥନ କରୁଛି ବୋଲି ପଶ୍ଚିମ ଦେଶମାନେ ଅଭିଯୋଗ କରୁଛନ୍ତି । ଚାଇନାର ବିସ୍ତାରବାଦୀ ନୀତିକୁ ଜାପାନଠାରୁ ଆରମ୍ଭ କରି ଭାରତ ପର୍ଯ୍ୟନ୍ତ ଅନେକ ଦେଶ ବିରୋଧ କରି ଆସିଛନ୍ତି ।
ଚୀନର ଦାଦାଗିରି ଏବଂ ବାଣିଜ୍ୟ ଆଧିପତ୍ୟକୁ ଚ୍ୟାଲେଂଜ ଦେବାକୁ ଭାରତକୁ ଏକ ଅସ୍ତ୍ର ଭାବେ ଆମେରିକା ଗ୍ରହଣ କରିଆସିଛି । ପାକିସ୍ତାନ ଭଳି ଦେଶ ତଥା ଭାରତର ପଡ଼ୋଶୀ ରାଷ୍ଟ୍ରମାନେ ଏବେ ଚାଇନା କବଳରେ ଅଛନ୍ତି । ଋଣ ଦେଇ ଏହି ସବୁ ଦେଶକୁ ଋଣ ଯନ୍ତାରେ ପକାଇବା । ସେମାନଙ୍କ ଅର୍ଥନୈତିକ ସାର୍ବଭୈାମତକୁ ନଷ୍ଟ କରିବା । ଏମାନଙ୍କୁ କବଳିତ କରି ନିଜର ଶକ୍ତି ବୃଦ୍ଧି କରିବା ଚାଇନାର ଅନ୍ୟତମ ନୀତି ।
ରୁଷ ଆଉ ଚାଇନାର ବିରୋଧରେ ପଶ୍ଚିମ ଦେଶରେ ଏକ ବଡ଼ ବିରକ୍ତି ଭାବ ରହିଛି । ଆମେରିକା ଏ ଦୁଇଟି ରାଷ୍ଟ୍ର ଉପରେ ଅନେକ ଦିନ ହେବ ଖଡ଼ଗହସ୍ତ ରହିଛି । କିନ୍ତୁ ନରେନ୍ଦ୍ର ମୋଦି ଏହାକୁ ଭୁକ୍ଷେପ ନକରି ପୁଟିନ ଙ୍କ ସହ ମନ ଖୋଲି କଥା ହେଉଛନ୍ତି । ଲିମୋସିନରେ ବୁଲି ଏକ ସ୍ବାଧୀନ ଦେଶ ନିଜ ଇଚ୍ଛାରେ ନିଷ୍ପତ୍ତି ନେଇପାରିବ ବୋଲି ସାରା ବିଶ୍ବକୁ ବାର୍ତା ଦେଉଛନ୍ତି । ଚାଇନା ସହ ହାତ ମିଳାଉଛନ୍ତି, ରଷିଆର ସମର୍ଥନ ହାସଲ କରୁଛନ୍ତି । ଆମେରିକାକୁ ଇଙ୍ଗିତ କରି ତୁମ ଦାଦାଗିରିକୁ ସହିବୁ ନାହିଁ ବୋଲି ପରୋକ୍ଷରେ ଆକ୍ଷେପ କରୁଛନ୍ତି ।
ବଦଳିଯାଉଥିବା ରାଜନୀତିକୁ ଲକ୍ଷ୍ୟ କରନ୍ତୁ । ପାଣିପାଗର ମିଜାଜ ସବୁବେଳେ ବଦଳୁଥାଏ । ପାଣିପାଗ ଭଳି ଦେଶର ମିଜାଜ ମଧ୍ୟ ବଦଳିଯାଏ । ରାଷ୍ଟ୍ରର ନୀତି ବି ବଦଳିଯାଇପାରେ । ଅବକି ବାର ଟ୍ରମ୍ପ ସରକାର କହି ମୋଦି, ଆମେରିକାର ଲୋକଙ୍କୁ , ଟ୍ରମ୍ପଙ୍କୁ ଭୋଟ ଦେବାପାଇଁ କହୁଥିଲେ । ଆଜି ସେହି ମୋଦି ଟ୍ରମ୍ପଙ୍କ ପାଇଁ ଜଣେ ଖଳନାୟକ । ଆଉ ଡୋନାଲ୍ଡ ଟ୍ରମ୍ପ ଭାରତ ପାଇଁ ଜଣେ ନିଷ୍ଠୁର ମନମାନି କରୁଥିବା ଅଗଣତାନ୍ତ୍ରିକ ବ୍ୟକ୍ତି । ବିଶ୍ବକୁ ନାଲି ଆଖି ଦେଖାଇ ଡରାଇବାର ଯୁଗ ସରିଯାଇଛି ବୋଲି ଭାରତ ଏକ ବଡ଼ ବାର୍ତ୍ତା ଦେଉଛି । ଯେତେବେଳେ ଚୀନର ଏସସିଓ ବୈଠକରୁ ଫଟୋ ଆଉ ଭିଡିଓ ଭାଇରାଲ ହେଉଛି । ଏହା ଭିତରେ ଜଟିଳ ପ୍ରଶ୍ନମାନ ଲୁଚି ରହିଛି । ଏ ସଂପର୍କର ଦିଗକୁ କୋଉ ଭାଷାରେ ବୁଝାଇ ହେବ ସତେ ।
ଚାଇନାର ବାଣିଜ୍ୟ ଆଉ ସୀମା ବିବାଦକୁ ଭାରତ କିମିତି ଗ୍ରହଣ କରିବ । ଯଦି ୟୁକ୍ରେନ ଯୁଦ୍ଧକୁ ନେଇ ଆମେରିକା ତଥା ୟୁରୋପର ଦେଶମାନେ ଅଧିକରୁ ଅଧିକ ବାସନ୍ଦ ବ୍ୟବସ୍ଥା ଗ୍ରହଣ କରନ୍ତି । ତେବେ ଦେଶ ଏହାକୁ କିମିତି ସାମନା କରିବ । ରଷିଆ ଉପରେ ଯେଉଁଭଳି ସାଂକ୍ସନ ଲାଗିଛି । ଯଦି ସହଯୋଗୀ ରାଷ୍ଟ୍ର ଭାବେ ଭାରତକୁ ଦଣ୍ଡିତ କରାଯାଏ, ତେବେ ଦେଶ ଏହାକୁ କିଭଳି ଗ୍ରହଣ କରିବ । ଚୀନର ଭରସାରେ ଭାରତ ପଶ୍ଚିମ ଦେଶଗୁଡ଼ିକର ମୁକାବିଲା କରିବା ପାଇଁ ସମର୍ଥ ହେବ କି ? ଚୀନ ଏକ ବିଶ୍ବାସୀ ବନ୍ଧୁ କି ? ଆମେରିକାଠାରୁ ଚୀନ ଅଧିକ ବିଶ୍ବାସ ଯୋଗ୍ୟ କି ?ଆମେରିକାର ରାଜନୀତି ବି ପାଣିପାଗ ଭଳି ବଦଳିଯାଇପାରେ । ଅସ୍ଥିର ଟ୍ରମ୍ପ ଯେ ସବୁଦିନ ପାଇଁ ରାଷ୍ଟ୍ରପତି ହୋଇ ରହିବେ ତାହା ସତ ନୁହେଁ । ବ୍ୟକ୍ତି ବଦଳିଲେ ନୀତି ବଦଳିଯାଇପାରେ । ଏହା ଏକ ଅସ୍ଥାୟୀ ପରିସ୍ଥିତି ହୋଇପାରେ । ତେଣୁ ଆମେରିକା ଜାଗାରେ ଚୀନକୁ ରଖିବା ଉଚିତ କି ? ଏକଛତ୍ରବାଦୀ ଚୀନ , ଏକଛତ୍ରବାଦୀ ପୁଟିନ, ଆଉ ଗଣତନ୍ତ୍ରରେ ବିଶ୍ବାସ କରୁଥିବା ଭାରତ ଏମାନଙ୍କ ଭିତରେ ସୁସଂପର୍କ ସମ୍ଭବ କି ? ବିଚାରଧାରାରେ ଭିନ୍ନତା, ଏକଛତ୍ରବାଦୀ ଶାସକ ଭାରତ ପାଇଁ ବିଶ୍ବାସଯୋଗ୍ୟ କି ? ଭାରତର ନୂଆ ସଂପର୍କ ନୂଆ ବନ୍ଧୁ ଆମେରିକା ଭଳି ଗ୍ରହଣଯୋଗ୍ୟ ହେବେ କି ? ବହୁତ ଗୁଡ଼ିଏ ପ୍ରଶ୍ନ ଉପରେ ମୋଦି ପୁଟିନ ଆଉ ସି ଜିନପିଙ୍ଗଙ୍କର ସଂପର୍କ , ଆଲୋଚନା, ଘୁରିବୁଲୁଛି । ଦେଶର ରାଜନୀତି ମଧ୍ୟ ସେହି ପ୍ରଶ୍ନ ପଚାରୁଛି , ରାହୁଲ ଗାନ୍ଧୀଙ୍କୁ ଆଉ ଚୀନର ଏଜେଣ୍ଟ କହିହେବ କି ? ଚାଇନାକୁ ସାବଧାନ ବୋଲି ଆଉ ସତର୍କ ଘଣ୍ଟି ବଜାଇ ହେବ କି ? ଏକଛତ୍ରବାଦୀ ପୁଟିନଙ୍କଠାରୁ ପ୍ରତିରକ୍ଷା ନେଇ ଆମେରିକା ସହାୟତାରେ ଚାଲୁଥିବା ପାକିସ୍ତାନ ସହ ଲଢ଼ିବା ସଂଭବ ହେବ କି ? ଏହି ସମୟରେ ଆଉ ଏକ କଥା ଆସେ । ଏହି ନୂଆ ସଂପର୍କ କରିବା ପୂର୍ବରୁ ଅନ୍ୟ ବିକଳ୍ପ ସବୁ ଆମେ ଭାବିଥିଲେ କି? ନା ଆମେରିକାକୁ ଚକମା ଦେଖାଇବା ପାଇଁ ଏଭଳି ଏକ ସଂପର୍କର ଆବଶ୍ୟକତା ଥିଲା । ସମୟ କହିବ ନୂଆ ବନ୍ଧୁ ଚୀନ ଆଉ ରଷିଆ ଭଲ ବନ୍ଧୁ ନା ଲୋକଦେଖାଣିଆ ବନ୍ଧୁ ।
