‘ପାର୍ଶ୍ଵସ୍ରୋତ’ ପୁସ୍ତକଟି କେବଳ ଏକ କାଳ୍ପନିକ କାହାଣୀ ନୁହେଁ, ବରଂ କୁଟିଆ କନ୍ଧ ସମ୍ପ୍ରଦାୟର ଏକ ଜୀବନ୍ତ ଦଲିଲ୍

‘ପାର୍ଶ୍ଵସ୍ରୋତ’ ପୁସ୍ତକଟି କେବଳ ଏକ କାଳ୍ପନିକ କାହାଣୀ ନୁହେଁ, ବରଂ କୁଟିଆ କନ୍ଧ ସମ୍ପ୍ରଦାୟର ଏକ ଜୀବନ୍ତ ଦଲିଲ୍। ଜନଜାତି ଅଞ୍ଚଳରେ କାର୍ଯ୍ୟ କରିବା ସମୟରେ, ଖୋର୍ଧା ଜିଲ୍ଲାପାଳ ଅମ୍ରିତ ଋତୁରାଜ ସେମାନଙ୍କୁ ନିକଟରୁ ଦେଖିଥିବା ଅନୁଭୂତିକୁ ଏହି ପୁସ୍ତକରେ ଶବ୍ଦର ରୂପ ଦେଇଛନ୍ତି। ଏଥିରେ ସେମାନଙ୍କର ପ୍ରାଚୀନ ପ୍ରଥା, ବିଶ୍ୱାସ ଏବଂ ପ୍ରକୃତି ସହ ଥିବା ନିବିଡ଼ ସମ୍ପର୍କକୁ ଅତି ହୃଦୟସ୍ପର୍ଶୀ ଭାବେ ବର୍ଣ୍ଣନା କରାଯାଇଥିବା ଅତିଥିମାନେ ପ୍ରକାଶ କରିଛନ୍ତି । ପ୍ରଶାସନିକ ଦାୟିତ୍ୱର ବ୍ୟସ୍ତତା ଭିତରେ ଜିଲ୍ଲାପାଳଙ୍କ ସାରସ୍ୱତ ସାଧନାକୁ ଉଚ୍ଚ ପ୍ରଶଂସା କରିଛନ୍ତି ବୁଦ୍ଧିଜୀବୀ । ଓଡ଼ିଶାର ଅନ୍ୟତମ ବିରଳ ଜନଜାତି ‘କୁଟିଆ କନ୍ଧ’ଙ୍କ ଅନାଲୋଚିତ ଜୀବନଶୈଳୀ, ସଂସ୍କୃତି ଓ ପରମ୍ପରାକୁ ନେଇ ରଚିତ ଉପନ୍ୟାସ ‘ପାର୍ଶ୍ଵସ୍ରୋତ’ ବୁଧବାର ସନ୍ଧ୍ୟାରେ ଉନ୍ମୋଚିତ ହେବା ଅବସରରେ ଅତିଥିମାନେ ଏହି ପୁସ୍ତକ ଉପରେ ଆଲୋଚନା କରିଛନ୍ତି । ଖୋର୍ଦ୍ଧା ଜିଲ୍ଲାପାଳ ଅମ୍ରିତ ଋତୁରାଜଙ୍କ ଦ୍ୱାରା ଲିଖିତ ଏହି ପ୍ରଥମ ଉପନ୍ୟାସଟି ଭୁବନେଶ୍ୱର ସ୍ଥିତ ବୁଦ୍ଧ ମନ୍ଦିର ଅଡିଟୋରିୟମଠାରେ ଏକ ସ୍ୱତନ୍ତ୍ର ସାରସ୍ୱତ ସମାରୋହରେ ଉନ୍ମୋଚିତ ହୋଇଛି।

ସମ୍ମାନିତ ଅତିଥିମାନେ ଜିଲ୍ଲାପାଳଙ୍କ ଏହି ପ୍ରୟାସକୁ ଉଚ୍ଚ ପ୍ରଶଂସା କରିଥିଲେ। ସେମାନେ କହିଥିଲେ ଯେ, ଜନଜାତିଙ୍କୁ କେବଳ ମୁଖ୍ୟସ୍ରୋତକୁ ଆଣିବା ନୁହେଁ, ବରଂ ସେମାନଙ୍କୁ ସମ୍ମାନର ସହ ଆଗକୁ ବଢ଼ାଇବାରେ ଏହି ପୁସ୍ତକ ସହାୟକ ହେବ। ଆଧୁନିକ ସମାଜରେ କୁଟିଆ କନ୍ଧମାନେ କିଭଳି ଆହ୍ୱାନର ସାମ୍ନା କରୁଛନ୍ତି, ତାହାର ପ୍ରାମାଣିକ ଚିତ୍ର ଏଥିରେ ଉପସ୍ଥାପନ କରାଯାଇଛି। ଅତିଥିମାନେ ପୁସ୍ତକର ବିଷୟବସ୍ତୁକୁ ନେଇ କହିଥିଲେ ଯେ, ଜନଜାତି ସମ୍ପ୍ରଦାୟର ଯେଉଁ ସବୁ ଦିଗ ସମାଜରେ ଅନାଲୋଚିତ ହୋଇ ରହିଯାଇଛି, ଏହି ପୁସ୍ତକ ସେହି ସବୁ ଗୂଢ଼ ରହସ୍ୟ, ସେମାନଙ୍କର ପ୍ରାଚୀନ ପ୍ରଥା ଏବଂ ବିଶ୍ୱାସ ଉପରେ ଆଲୋକପାତ କରିବାରେ ସଫଳ ହୋଇଛି। ଜନଜାତିଙ୍କୁ କେବଳ ସମାଜର ମୁଖ୍ୟସ୍ରୋତକୁ ଆଣିବା ଯଥେଷ୍ଟ ନୁହେଁ, ବରଂ ସେମାନଙ୍କୁ ସମ୍ମାନର ସହ ଆଗକୁ ବଢ଼ାଇବା ପାଇଁ ଏହି ଉପନ୍ୟାସ ଏକ ପ୍ରୟାସ ବୋଲି ସେମାନେ ମତ ଦେଇଥିଲେ। ପୁସ୍ତକରେ କୁଟିଆ କନ୍ଧମାନେ ଆଧୁନିକ ସମୟରେ ସାମ୍ନା କରୁଥିବା ଆହ୍ୱାନଗୁଡ଼ିକୁ ଯେଭଳି ହୃଦୟସ୍ପର୍ଶୀ ଭାବେ ବର୍ଣ୍ଣନା କରାଯାଇଛି, ତାହାକୁ ଅତିଥିମାନେ ଉଚ୍ଚ ପ୍ରଶଂସା କରିଥିଲେ। ଅତିଥିମାନେ ସେମାନଙ୍କ ବକ୍ତବ୍ୟରେ କହିଥିଲେ ଯେ ଶ୍ରୀ ଋତୁରାଜ ଜଣେ ପ୍ରଶାସକ ଭାବେ ଜନଜାତି ଅଞ୍ଚଳରେ କାର୍ଯ୍ୟ କଲାବେଳେ ସେମାନଙ୍କୁ କେବଳ ଦୂରରୁ ଦେଖିନାହାନ୍ତି, ବରଂ ସେମାନଙ୍କ ଜୀବନକୁ ଅତି ନିକଟରୁ ଅନୁଭବ କରିଛନ୍ତି। ସେହି ନିଚ୍ଛକ ଅନୁଭୂତି ହିଁ ଏହି ଉପନ୍ୟାସରେ ଶବ୍ଦର ରୂପ ନେଇଛି।

ଜଣେ ଆଇଏଏସ୍ (IAS) ଅଫିସର ହୋଇ ମଧ୍ୟ ସାମାଜିକ ଦାୟିତ୍ୱବୋଧରୁ ଏଭଳି ଏକ ସମ୍ବେଦନଶୀଳ ବିଷୟବସ୍ତୁ ଚୟନ କରିଥିବାରୁ ଶ୍ରୀ ଋତୁରାଜଙ୍କୁ ସର୍ବତ୍ର ସ୍ୱାଗତ କରାଯାଉଛି। ଏହି ପୁସ୍ତକଟି ସାଧାରଣ ପାଠକଙ୍କ ସହ ଜନଜାତି ଗବେଷଣା କରୁଥିବା ଛାତ୍ରଛାତ୍ରୀଙ୍କ ପାଇଁ ବେଶ୍ ଉପାଦେୟ ହେବ ବୋଲି ଆଶା କରାଯାଉଛି।
ଆଦିତ୍ୟ ଭାରତ ପ୍ରକାଶନୀ ଦ୍ୱାରା ପ୍ରକାଶିତ ଏହି ପୁସ୍ତକ ଉନ୍ମୋଚନ ଉତ୍ସବରେ ଅତିଥି ଭାବେ, ବିଶିଷ୍ଟ ଔପନ୍ୟାସିକା ସରୋଜିନୀ ସାହୁ, ସାହିତ୍ୟିକ ଅଜୟ ସ୍ୱାଇଁ ,କଥାଶିଳ୍ପୀ ଚିରଶ୍ରୀ ଇନ୍ଦରସିଂ ,ପ୍ରକାଶକ ଦେବାଶିଷ ସାମନ୍ତରାୟ ପ୍ରମୁଖ ଯୋଗ ଦେଇଥିଲେ।