28 ବର୍ଷ ପୂର୍ବରୁ ମାଡ଼ ଖାଇଥିଲେ, ନ୍ୟାୟ ନମିଳିବାରୁ ବିଚାରପତିଙ୍କୁ ଚପଲ ମାଡ଼କଲେ

ବର୍ଷ ବର୍ଷ ଧରି କୋର୍ଟରେ ମାମଲା ଚାଲିଲା । କିନ୍ତୁ ଫଇସଲା କିଛି ହେଲାନି । ଦୋଷୀଙ୍କୁ ବିଚାରପତି ଦଣ୍ଡ ଦେଲେନାହିଁ । ଯାହା ଫଳରେ ରାଗି ପଞ୍ଚମ ହୋଇଗଲେ ଅଭିଯୋଗକାରୀ । ଆଉ ବିଚାରପତିଙ୍କ ଉପରକୁ ଫୋପାଡ଼ିଲେ ଚପଲ । ଏପରି ଏକ ଘଟଣା ଘଟିଛି ଅମଦାବାଦରେ । ସୁପ୍ରିମକୋର୍ଟରେ ମୁଖ୍ୟ ବିଚାରପତିଙ୍କ ଉପରକୁ ଜୋତାମାଡ଼  ଘଟଣାର ଏକ ସପ୍ତାହ ପରେ ଅହମ୍ମଦାବାଦ ବିଚାରପତିଙ୍କ ଉପରେ ଜଣେ ବ୍ୟକ୍ତି ଚପଲ ଫିଙ୍ଗିଛନ୍ତି ।  ଗୁଜୁରାଟରେ ଜଣେ ବ୍ୟକ୍ତି କେସ ଶୁଣାଣି ହେଉଥିବା ସମୟରେ ଅହମ୍ମଦାବାଦ ସେସନ୍ସ କୋର୍ଟରେ ବିଚାରପତିଙ୍କ ଉପରେ ତାଙ୍କର ଚପଲ ଫିଙ୍ଗିଥିଲେ । ଅବଶ୍ୟ ଚପଲ ବିଚାରପତିଙ୍କ ଦେହରେ ବାଜିନଥିଲା । ପୋଲିସ ଉକ୍ତ ବ୍ୟକ୍ତିଙ୍କୁ ଅଟକ ରଖିଥିଲା । ଜାତୀୟ ଗଣମାଧ୍ୟମରେ ପ୍ରକାଶିତ ଖବର ଅନୁସାରେ ଚପଲ ଫିଙ୍ଗିଥିବା ବ୍ୟକ୍ତି ତାଙ୍କ ଦ୍ୱାରା ଦାୟର କରାଯାଇଥିବା ଏକ ମାମଲାରେ ଚାରି ଅଭିଯୁକ୍ତଙ୍କୁ ନିର୍ଦ୍ଦୋଷରେ ଖଲାସ କରାଯିବା ଉପରେ ରାଗି ଯାଇ ଏପରି ଆଚରଣ କରିଥିଲେ ।

କରଞ୍ଜ  ସିଟି ପୋଲିସ ଷ୍ଟେସନର ଇନ୍ସପେକ୍ଟର ପି.ଏଚ୍. ଭାଟି ଏହି ଖବରକୁ ନେଇ କହିଛନ୍ତି ଯେ ଜଣେ ବ୍ୟକ୍ତିଙ୍କ  ଆବେଦନ ଖାରଜ ହେବା ପରେ ବ୍ୟକ୍ତି ଜଣକ ରାଗି ଯାଇ ବିଚାରପତିଙ୍କ ଉପରେ ଜୋତା ଫିଙ୍ଗିଥିଲେ।” “ଯଦିଓ ତାଙ୍କୁ କୋର୍ଟ କର୍ମଚାରୀମାନେ ଧରିଥିଲେ, ବିଚାରପତି ତାଙ୍କୁ ଛାଡି ଦେବାକୁ କହିଥିଲେ । ବିଚାରପତି  କର୍ମଚାରୀମାନଙ୍କୁ ନିର୍ଦ୍ଦେଶ ଦେଇଥିଲେ ଯେ ତାଙ୍କ ବିରୁଦ୍ଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ୍ ନୁହେଁ,”  ।

ମାମଲା କ’ଣ ଥିଲା?

ପୋଲିସ କହିବା ଅନୁସାରେ ଏହି ମାମଲା ୧୯୯୭ ମସିହାର ।  ଯେତେବେଳେ କିଛି ଯୁବକ ଗୁଜୁରାଟର ଗୋମତୀପୁରରେ କ୍ରିକେଟ୍ ଖେଳୁଥିଲେ। ସେହି ସମୟରେ ପନିପରିବା କିଣିବାକୁ ବାହାରୁଥିବା ଆବେଦନକାରୀଙ୍କ ଉପରେ ବଲ୍ ଲାଗିଥିଲା। ବଲ ବାଜିବାରୁ ସେ ଏନେଇ ଯୁବକମାନଙ୍କୁ ପ୍ରଶ୍ନ କରିଥିଲେ । ପରେ ସେମାନଙ୍କ ମଧ୍ୟରେ ଯୁକ୍ତିତର୍କ ଆରମ୍ଭ ହୋଇଥିଲା, ତା’ପରେ ଯୁବକମାନେ ତାଙ୍କ ଆକ୍ରମଣ କରିଥିଲେ । ଯୁବକମାନେ ତାଙ୍କୁ ବାଡ଼ିରେ ପିଟିଥିଲେ ।

ଉକ୍ତ ବ୍ୟକ୍ତି ଜଣକ ଗୋମତୀପୁର ପୋଲିସ ଷ୍ଟେସନରେ ଅଭିଯୋଗ କରିଥିଲେ ।  ଚାରି ଜଣଙ୍କ ବିରୁଦ୍ଧରେ ଅସ୍ତ୍ରଶସ୍ତ୍ରରେ ଆକ୍ରମଣ ସମେତ ବିଭିନ୍ନ ଧାରା ଅନୁଯାୟୀ ଅଭିଯୋଗ ଦାଖଲ କରିଥିଲେ। ସେବେଠାରୁ ମାମଲା ଚାଲିଥିଲା । ମାମଲାର ଚାର୍ଜସିଟ୍ ଦାଖଲ କରାଯାଇଥିଲା, ଏବଂ ମାମଲା ୨୦୦୯ ମସିହାରେ ମେଟ୍ରୋ କୋର୍ଟକୁ ଯାଇଥିଲା। ମାମଲାର ଶୁଣାଣି ଶେଷରେ କୋର୍ଟ ଫେବୃଆରୀ ୧୫, ୨୦୧୭ ରେ ଚାରି ଜଣଙ୍କୁ ନିର୍ଦ୍ଦୋଷରେ ଖଲାସ କରିଥିଲେ।

ତା’ପରେ ଆବେଦନକାରୀ ୧୯ ମଇ ୨୦୧୭ ରେ ସେସନ୍ସ କୋର୍ଟରେ ପୁଣି ଆବେଦନ କରିଥିଲେ। ଆବେଦନର ଶୁଣାଣି ପରେ, ସେସନ୍ସ କୋର୍ଟ ନିମ୍ନ ଅଦାଲତର ନିଷ୍ପତ୍ତିକୁ ସମର୍ଥନ କରିଥିଲେ ଏବଂ ୧୩ ଅକ୍ଟୋବର ୨୦୨୫ ରେ ଆବେଦନକୁ ଖାରଜ କରିଥିଲେ। ସେସନ୍ସ କୋର୍ଟର ନିଷ୍ପତ୍ତିରେ ବିରକ୍ତ ହୋଇ ଆବେଦନକାରୀ ଉଚ୍ଚ ସ୍ୱରରେ କହିବା ଆରମ୍ଭ କରିଥିଲେ ଏବଂ କୋର୍ଟରେ ଖରାପ ବ୍ୟବହାର କରିଥିଲେ। ତାଙ୍କୁ ଶାନ୍ତ କରିବାକୁ ଚେଷ୍ଟା କରାଯାଇଥିଲା। ତଥାପି, ବ୍ୟକ୍ତି ଜଣକ ତୁରନ୍ତ ବିଚାରପତିଙ୍କ ଉପରକୁ ତାଙ୍କ ଚପଲ ଫିଙ୍ଗି ଦେଇଥିଲେ। ବିଚାରପତି ସେଠାରୁ ଉଠି ପଳାଇଥିଲେ, ଏବଂ କୋର୍ଟ କର୍ମଚାରୀ ଏବଂ ପୋଲିସ ତୁରନ୍ତ ଅଭିଯୋଗକାରୀଙ୍କୁ ଧରିଥିଲେ। ପରେ ତାଙ୍କୁ କୋର୍ଟରୁମରେ କିଛି ସମୟ ବସାଇ ଦିଆଯାଇଥିଲା । ପରେ ପୋଲିସ ତାଙ୍କୁ ଅଟକ ରଖି କିଛି ସମୟ ପରେ ଛାଡିଥିଲା ।

ଗତ ସପ୍ତାହରେ ମୁଖ୍ୟ ବିଚାରପତିଙ୍କ ଉପରକୁ ଜଣେ ଓକିଲ ଜୋତା ଫିଙ୍ଗି ଚର୍ଚାରେ ଥିଲେ ।  ବିଚାରପତି (CJI) ବି.ଆର. ଗଭାଇଙ୍କ ଉପରେ ସୁପ୍ରିମକୋର୍ଟ ଭିତରେ ଜୋତା ଆକ୍ରମଣକୁ ସମସ୍ତେ ନିନ୍ଦା କରିଥିଲେ । ଏଭଳି ଅଘଟଣ ଅକ୍ଟୋବର 6 ତାରିଖରେ ଘଟିଥିଲା ​​ଯେତେବେଳେ ମୁଖ୍ୟ ବିଚାରପତି ଗଭାଇ ଦିନର ପ୍ରଥମ ମାମଲାର ଶୁଣାଣି ଆରମ୍ଭ କରିଥିଲେ। ରାକେଶ କିଶୋର ନାମକ ଜଣେ ବୟସ୍କ ଓକିଲ ହଠାତ୍ ତାଙ୍କ ଜୋତା କାଢ଼ି ବେଞ୍ଚ ଆଡକୁ ଫିଙ୍ଗି ଦେଇଥିଲେ ଏବଂ ଚିତ୍କାର କରିଥିଲେ, “ସନାତନ କା ଅପମାନ ନେହିଁ ସହେଙ୍ଗେ”  । ଏବେ ପୁଣି ବିଚାରପତିଙ୍କ ଉପରକୁ ଜୋତା ମାଡ଼ ହୋଇଥିବାରୁ ଜାତୀୟ ଗଣମାଧ୍ୟମରେ ବିତର୍କ ଆରମ୍ଭ ହୋଇଛି ।