ଆଜିର ଭାରତ ପ୍ରଯୁକ୍ତିବିଦ୍ୟାକୁ ନେଇ ଆଗଉଛି :ମୋଦୀ

ଭାରତ ଡିଜିଟାଲ ପ୍ରଯୁକ୍ତିବିଦ୍ୟାକୁ ଗଣତାନ୍ତ୍ରିକ କରିଛି । ଏହାକୁ ଦେଶର ପ୍ରତ୍ୟେକ ନାଗରିକ ଏବଂ ପ୍ରତ୍ୟେକ କ୍ଷେତ୍ର ପାଇଁ ସୁଗମ କରିଛି ବୋଲି ଗୁରୁତ୍ୱାରୋପ କରିଛନ୍ତି ପ୍ରଧାନମନ୍ତ୍ରୀ ।  ଏବେ ଭାରତର ସୁଶାସନର ମଡେଲ ପାଲଟିଛି। ଏହି ମଡେଲରେ, ସରକାର ଜନସାଧାରଣଙ୍କ ହିତ ପାଇଁ ଡିଜିଟାଲ ଭିତ୍ତିଭୂମି ବିକଶିତ କରୁଛନ୍ତି ଏବଂ ଘରୋଇ କ୍ଷେତ୍ର ସେହି ପ୍ଲାଟଫର୍ମରେ ଅଭିନବ ଉତ୍ପାଦ ନିର୍ମାଣ କରୁଛନ୍ତି।  ଭାରତ ଦେଖାଇ ଦେଇଛି ଯେ କିପରି ପ୍ରଯୁକ୍ତିବିଦ୍ୟା କେବଳ ସୁବିଧାର ଏକ ମାଧ୍ୟମ ଭାବରେ ନୁହେଁ , ବରଂ ସମାନତାର ଏକ ମାଧ୍ୟମ ଭାବରେ ମଧ୍ୟ କାର୍ଯ୍ୟ କରିପାରିବ। ପ୍ରଧାନମନ୍ତ୍ରୀ  ନରେନ୍ଦ୍ର ମୋଦୀ  ମହାରାଷ୍ଟ୍ରର ମୁମ୍ବାଇଠାରେ ‘ଗ୍ଲୋବାଲ୍ ଫିନଟେକ୍ ଫେଷ୍ଟ ୨୦୨୫’କୁ ସମ୍ବୋଧିତ କରି ଏହା କହିଛନ୍ତି।

ଉପସ୍ଥିତ ସମସ୍ତଙ୍କୁ ସ୍ୱାଗତ ଜଣାଇ ଶ୍ରୀ ମୋଦୀ ମୁମ୍ବାଇକୁ ଶକ୍ତି, ଉଦ୍ୟୋଗ ଏବଂ ଅସୀମ ସମ୍ଭାବନାର ସହର ଭାବେ ବର୍ଣ୍ଣନା କରିଛନ୍ତି। ବ୍ରିଟେନର ପ୍ରଧାନମନ୍ତ୍ରୀ ମହାମହିମ ଶ୍ରୀ କୀର ଷ୍ଟାରମରଙ୍କୁ ସ୍ୱତନ୍ତ୍ର ଭାବରେ ସ୍ୱାଗତ କରିଥିଲେ ଏବଂ ‘ଗ୍ଲୋବାଲ୍ ଫିନଟେକ୍ ଫେଷ୍ଟିଭାଲ’ରେ ତାଙ୍କର ଉପସ୍ଥିତି ଏବଂ କାର୍ଯ୍ୟକ୍ରମରେ ସେ ଦେଇଥିବା ସମୟ ପାଇଁ ଧନ୍ୟବାଦ ଜଣାଇଥିଲେ।

ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ ଯେ, ଆଜି ଏହି ମହୋତ୍ସବ ଆର୍ଥିକ  ସହଯୋଗ ପାଇଁ ଏକ ବିଶ୍ୱସ୍ତରୀୟ ପ୍ଲାଟଫର୍ମରେ ପରିଣତ ହୋଇଛି। ସେ ଉଲ୍ଲେଖ କରିଥିଲେ ଯେ, ଏହି ବର୍ଷ, ଯୁକ୍ତରାଜ୍ୟ ଏକ ଅଂଶୀଦାର ଦେଶ ଭାବରେ ଅଂଶଗ୍ରହଣ କରୁଛି, ଏବଂ ଦୁଇ ଅଗ୍ରଣୀ ଗଣତନ୍ତ୍ର ମଧ୍ୟରେ ସହଭାଗୀତା ବିଶ୍ୱସ୍ତରୀୟ ଆର୍ଥିକ ପରିଦୃଶ୍ୟକୁ ଆହୁରି ସୁଦୃଢ଼ କରିବ । ଶ୍ରୀ ମୋଦୀ ଏହି ସ୍ଥାନରେ ସ୍ପନ୍ଦନଶୀଳ ପରିବେଶ, ଶକ୍ତି ଏବଂ ଗତିଶୀଳତାର ପ୍ରଶଂସା ମଧ୍ୟ କରିଥିଲେ। ସେ କହିଥିଲେ ଯେ, ଏହା ଭାରତର ଅର୍ଥନୀତି ଏବଂ ଅଭିବୃଦ୍ଧି ପ୍ରତି ବିଶ୍ୱସ୍ତରୀୟ ବିଶ୍ୱାସକୁ ପ୍ରତିଫଳିତ କରେ। ପ୍ରଧାନମନ୍ତ୍ରୀ ଶ୍ରୀ କ୍ରିସ୍ ଗୋପାଳକୃଷ୍ଣନ, ସମସ୍ତ ଆୟୋଜକ ଏବଂ ଅଂଶଗ୍ରହଣକାରୀଙ୍କୁ ଏହି କାର୍ଯ୍ୟକ୍ରମର ସଫଳ ଆୟୋଜନ ପାଇଁ ଅଭିନନ୍ଦନ ଜଣାଇଥିଲେ।

“ଭାରତ ଗଣତନ୍ତ୍ରର ଜନନୀ ଏବଂ ଭାରତରେ ଗଣତନ୍ତ୍ର କେବଳ ନିର୍ବାଚନ କିମ୍ବା ନୀତି ନିର୍ଦ୍ଧାରଣ ପର୍ଯ୍ୟନ୍ତ ସୀମିତ ନୁହେଁ, ବରଂ ଶାସନର ଏକ ଦୃଢ଼ ସ୍ତମ୍ଭ ଭାବରେ ପ୍ରତିଷ୍ଠିତ ହୋଇଛି” ବୋଲି ଶ୍ରୀ ମୋଦୀ ଦୃଢ଼ ଭାବରେ କହିବା ସହିତ, ପ୍ରଯୁକ୍ତିବିଦ୍ୟାକୁ ଏହି ଗଣତାନ୍ତ୍ରିକ ଭାବନାର ଏକ ପ୍ରମୁଖ ଉଦାହରଣ ଭାବରେ ଉଲ୍ଲେଖ କରିଥିଲେ। ବିଶ୍ୱ ବହୁ ଦିନ ଧରି ପ୍ରଯୁକ୍ତିବିଦ୍ୟା ବିଭାଜନ ବିଷୟରେ ଆଲୋଚନା କରିଆସୁଛି – ଏବଂ ଭାରତ ମଧ୍ୟ ଥରେ ପ୍ରଭାବିତ ହୋଇଥିଲା – ଗତ ଦଶନ୍ଧି ଧରି, ଭାରତ ସଫଳତାର ସହିତ ପ୍ରଯୁକ୍ତିବିଦ୍ୟାକୁ ଗଣତାନ୍ତ୍ରିକ କରିଛି।

“ଭାରତର  ଆଭିମୁଖ୍ୟ ବ୍ୟାଙ୍କିଙ୍ଗ ଇକୋସିଷ୍ଟମକୁ ପରିବର୍ତ୍ତନ କରିଛି”, ବୋଲି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ। ସେ ମନ୍ତବ୍ୟ ଦେଇଥିଲେ ଯେ , ବ୍ୟାଙ୍କିଙ୍ଗ ଏକ ସମୟରେ ଏକ ସୁବିଧା ଥିଲା, କିନ୍ତୁ ଡିଜିଟାଲ ପ୍ରଯୁକ୍ତି ଏହାକୁ ସଶକ୍ତିକରଣର ଏକ ମାଧ୍ୟମ କରିଦେଇଛି। ଭାରତରେ ଡିଜିଟାଲ ପେମେଣ୍ଟ ଏକ ସାଧାରଣ କାର୍ଯ୍ୟ ହୋଇଗଲାଣି, ସେ ଏହି ସଫଳତାର ଶ୍ରେୟ ଜେଏଏମ୍ ତ୍ରିମୂର୍ତ୍ତି – ଜନଧନ, ଆଧାର ଏବଂ ମୋବାଇଲକୁ ଦେଇଥିଲ। କେବଳ ୟୁପିଆଇ ପ୍ରତି ମାସରେ କୋଡ଼ିଏ ବିଲିୟନ କାରବାରକୁ ସହଜ କରିଥାଏ, ଯାହାର କାରବାର ମୂଲ୍ୟ ପଚିଶ ଲକ୍ଷ କୋଟି ଟଙ୍କାରୁ ଅଧିକ ବୋଲି ଶ୍ରୀ ମୋଦୀ ଗୁରୁତ୍ୱାରୋପ କରିଥିଲେ। ବିଶ୍ୱ ସ୍ତରରେ ପ୍ରତି ଶହେ ରିଅଲ୍-ଟାଇମ୍ ଡିଜିଟାଲ କାରବାର ମଧ୍ୟରୁ ପଚାଶ କେବଳ ଭାରତରେ ହୋଇଥାଏ।

ଚଳିତ ବର୍ଷର ଗ୍ଲୋବାଲ୍ ଫିନଟେକ୍ ଫେଷ୍ଟର ବିଷୟବସ୍ତୁ ଭାରତର ଗଣତାନ୍ତ୍ରିକ ଭାବନାକୁ ସୁଦୃଢ଼ ​​କରିଛି ଏବଂ ଆଗକୁ ବଢ଼ାଉଛି ବୋଲି ଉଲ୍ଲେଖ କରି ଶ୍ରୀ ମୋଦୀ କହିଥିଲେ ଯେ, ଭାରତର ଡିଜିଟାଲ୍ ଷ୍ଟାକ୍ ସମ୍ପର୍କରେ ବିଶ୍ୱବ୍ୟାପୀ ଆଲୋଚନା ହେଉଛି। ସେ ୟୁନିଫାଏଡ୍ ପେମେଣ୍ଟ୍ସ ଇଣ୍ଟରଫେସ୍ (ୟୁପିଆଇ), ଆଧାର ସକ୍ଷମ ପେମେଣ୍ଟ୍ ସିଷ୍ଟମ୍, ଭାରତ ବିଲ୍ ପେମେଣ୍ଟ୍ ସିଷ୍ଟମ୍, ଭାରତ-QR, ଡିଜିଲକର୍, ଡିଜିଯାତ୍ରା ଏବଂ ସରକାରୀ ଇ – ମାର୍କେଟ୍ ପ୍ଲେସ୍ (ଜିଇଏମ୍) ଭଳି ପ୍ରମୁଖ ଉପାଦାନଗୁଡ଼ିକୁ ଭାରତର ଡିଜିଟାଲ୍ ଅର୍ଥନୀତିର ମେରୁଦଣ୍ଡ ଭାବେ ଉଲ୍ଳେଖ କରିଥିଲେ। ଇଣ୍ଡିଆ ଷ୍ଟାକ୍ ବର୍ତ୍ତମାନ ନୂତନ ଖୋଲା ପାରିବେଶିକ ବ୍ୟବସ୍ଥା ସୃଷ୍ଟି କରୁଛି ବୋଲି ଉଲ୍ଲେଖ କରିବା ସହିତ ଏହାକୁ ନେଇ ପ୍ରଧାନମନ୍ତ୍ରୀ ସନ୍ତୋଷ ପ୍ରକାଶ କରିଥିଲେ। ସେ ଉଲ୍ଲେଖ କରିଛନ୍ତି ଯେ ଓଏନଡିସି – ଓପନ୍ ନେଟୱାର୍କ ଫର୍ ଡିଜିଟାଲ୍ କମର୍ସ – ଛୋଟ ଦୋକାନୀ ଏବଂ ଏମଏସଏମଇ ପାଇଁ ଏକ ବରଦାନ ପ୍ରମାଣିତ ହେଉଛି, ଯାହା ସେମାନଙ୍କୁ ଦେଶବ୍ୟାପୀ ବଜାର ପ୍ରବେଶ କରିବାକୁ ସକ୍ଷମ କରୁଛି। ସେ ଆହୁରି ମଧ୍ୟ କହିଛନ୍ତି ଯେ, ଓସିଇଏନ୍ – ଓପନ୍ କ୍ରେଡିଟ୍ ସକ୍ଷମ ନେଟୱାର୍କ – କ୍ଷୁଦ୍ର ଉଦ୍ୟୋଗୀମାନଙ୍କ ପାଇଁ ଋଣ ଉପଲବ୍ଧତାକୁ ସରଳ କରୁଛି ଏବଂ ଏମଏସଏମଇ ପାଇଁ ଋଣ ଅଭାବ ସମସ୍ୟାର ସମାଧାନ କରୁଛି। ପ୍ରଧାନମନ୍ତ୍ରୀ ବିଶ୍ୱାସ ପ୍ରକାଶ କରିଛନ୍ତି ଯେ ଆରବିଆଇ ଦ୍ୱାରା ଅନୁସରଣ କରାଯାଉଥିବା ଡିଜିଟାଲ୍ ମୁଦ୍ରା ପଦକ୍ଷେପ ଫଳାଫଳକୁ ଆହୁରି ବୃଦ୍ଧି କରିବ। ସେ ଆହୁରି ମଧ୍ୟ କହିଛନ୍ତି ଯେ ଏହି ସମସ୍ତ ପ୍ରୟାସ ଭାରତର ବ୍ୟବହାର ହୋଇନଥିବା ସମ୍ଭାବନାକୁ ଦେଶର ଅଭିବୃଦ୍ଧି କାହାଣୀ ପାଇଁ ଏକ ପ୍ରେରଣାଦାୟକ ଶକ୍ତିରେ ପରିଣତ କରିବ।