ଓଡ଼ିଶାରେ ଓଡ଼ିଆ ଅସ୍ମିତାର ନାରା ଦେଇ ଶାସନକୁ ଆସିଥିବା ବିଜେପି ସରକାର ଏଇ ଦୁଇ ବର୍ଷ ଭିତରେ ଅନେକ ଲୋକାଭିମୁଖୀ ଯୋଜନା ହାତକୁ ନେଇଛି I ତେବେ ମେଟ୍ରୋ ପ୍ରକଳ୍ପ ନେଇ ଲୋକଙ୍କ ଭିତରେ ଯେଉଁ ସନ୍ଦେହ ଅଛି, ତାହା ଅମୂଳକ I ଭବିଷ୍ୟତରେ ଏହି ସ୍ବପ୍ନ ନିଶ୍ଚୟ ସାକାର ହେବ I ଭୁବନେଶ୍ୱର, କଟକ , ପୁରୀ ଓ ପାରାଦୀପକୁ ନେଇ ସରକାର ଯେଉଁ ନୂଆ ଯୋଜନା ଆରମ୍ଭ କରିଛନ୍ତି, ତାହା ମଧ୍ୟ ସାକାର ହେବ I
ବାରବାଟୀ ଅର୍ଗାନାଇଜିଙ୍ଗ କମିଟି ଓ ନ୍ୟୁଜରୁମର ମିଳିତ ପ୍ରଚେଷ୍ଟାରେ ଆୟୋଜିତ ବିତର୍କ ବାରବାଟୀ ଡାଇଲଗରେ ଯୋଗଦେଇ ଆଇନ ଓ ପୂର୍ତ୍ତମନ୍ତ୍ରୀ ପୃଥ୍ଵୀରାଜ ହରିଚନ୍ଦନ ଉପରୋକ୍ତ ମନ୍ତବ୍ୟ ଦେଇଛନ୍ତି I ରେଭେନ୍ସା ବିଶ୍ୱବିଦ୍ୟାଳୟ ପରିସରରେ ଅନିଷ୍ଠିତ ଏହି ବିତର୍କରେ କେନ୍ଦ୍ରମନ୍ତ୍ରୀ ଗଜେନ୍ଦ୍ର ସିଂ ଶେଖାୱତ ଯୋଗଦେଇପାରିନଥିବାରୁ ଏକ ଭିଡ଼ିଓ ବାର୍ତା ପଠାଇଥିଲେ I
ପ୍ରଥମ ଅଧିବେଶନର ଶୀର୍ଷକ ଥିଲା, ଆଇନର ଶାସନ…କହିବା ସହଜ , କରିବା କଠିନ I ଆଇନମନ୍ତ୍ରୀଙ୍କ ସହ ମଞ୍ଚରେ ଉପସ୍ଥିତ ରହି ଏହାକୁ ସଂଚାଳନ କରିଥିଲେ ନ୍ୟୁଜରୁମର ପ୍ରତିଷ୍ଠାତା ସମ୍ପାଦକ ମନୋରଞ୍ଜନ ମିଶ୍ର I ପ୍ରାରମ୍ଭରେ ନ୍ୟୁଜରୁମର ପ୍ରତିଷ୍ଠାତା ସିଇଓ ପ୍ରିୟଦର୍ଶୀ ବଳ ସ୍ୱାଗତ ଅଭିଭାଷଣ ରଖିଥିଲେ I
ଦ୍ଵିତୀୟ ଅଧିବେଶନରେ ଗୋଟିଏ ମଞ୍ଚରେ ଏକାଠି ହୋଇଥିଲେ ରାଜ୍ୟ ବିଜେପି ସଭାପତି ମନମୋହନ ସାମଲ, ରାଜ୍ୟ କଂଗ୍ରେସ ସଭାପତି ଭକ୍ତ ଦାସ ଓ ସାଂସଦ ସଂତୃପ୍ତ ମିଶ୍ର I ଏହି ଅଧିବେଶନର ଶୀର୍ଷକ ଥିଲା ଓଡ଼ିଆ ଅସ୍ମିତା…କଥାରେ ନା କାମରେ I ରାଜ୍ୟ ସରକାର ଓଡ଼ିଆ ଅସ୍ମିତାର ସୁରକ୍ଷା ଦିଗରେ କାର୍ଯ୍ୟ କରୁଛନ୍ତି ବୋଲି ଶ୍ରୀ ସାମଲ କହିଥିବା ବେଳେ ଭକ୍ତ ଦାସ କହିଥିଲେ ସରକାର ଯାହା କହୁଛନ୍ତି ତାକୁ କାମରେ କରି ଦେଖାନ୍ତୁ I ସାଂସଦ ସଂତୃପ୍ତ ମିଶ୍ର କହିଲେ,ରାଜନୈତିକ ବୟାନବାଜି ବନ୍ଦ କରି ଏବେ ଆମକୁ ଓଡ଼ିଶାର ସାମଗ୍ରିକ ବିକାଶ ଉପରେ ଗୁରୁତ୍ୱ ଦେବାକୁ ପଡିବ I ବାରବାଟୀ ଉଭୟ ବିକାଶ ଓ ବିଲୟର ପ୍ରତୀକ ବୋଲି ସାଂସଦ ଶ୍ରୀ ମିଶ୍ର ମତ ଦେଇଥିଲେ I
ପରେ ପରେ ତୃତୀୟ ଅଧିବେଶନ ଆରମ୍ଭ ହୋଇଥିଲା I ଏହାର ଶୀର୍ଷକ ଥିଲା କଟକ…ଇତିହାସରୁ ଅସ୍ମିତା I ଏହି ଆଲୋଚନାରେ ଭାଗ ନେଇଥିଲେ ରେଭେନ୍ସାର ପୂର୍ବତନ କୁଳପତି ଦେବଦାସ ଛୋଟରାୟ, ଭାସ୍କର୍ଯ୍ୟ ଶିଳ୍ପୀ ରବିନାରାୟଣ ରଥ, ରେଭେନ୍ସା ପିଜି କାଉନ୍ସିଲ ଅଧ୍ୟକ୍ଷ ଧର୍ମବ୍ରତ ମହାପାତ୍ର, ଅଭିନେତ୍ରୀ ଅନୁ ଚୌଧୁରୀ ଓ ସଂଗୀତ ନିର୍ଦେଶକ ପ୍ରେମ ଆନନ୍ଦ I ଓଡିଶା ଲାଇଭର ପ୍ରତିଷ୍ଠାତା ସମ୍ପାଦକ ନୀଳାମ୍ବର ରଥ ଏହାର ସଂଚାଳନ କରିଥିଲେ I
ଚତୁର୍ଥ ଅଧିବେଶନର ଶୀର୍ଷକ ଥିଲା VOICE OF VISION 2036..I ଏଥିରେ ଯୋଗଦେଇ ଓଡ଼ିଶାରେ ସ୍ୱାସ୍ଥ୍ୟ ସେବାକୁ କିଭଳି ଲୋକାଭିମୁଖୀ କରାଯିବ, ସେ ବାବଦରେ ବିସ୍ତୃତ ଆଲୋଚନା କରିଥିଲେ ଡାକ୍ତର ମାୟା ଗନ୍ତାୟତ ଓ ବରିଷ୍ଠ ପ୍ରଶାସକ ଡ.ପାର୍ଥସାରଥୀ ମିଶ୍ର I ମଂଚରେ ଉପସ୍ଥାପନା ଦାୟିତ୍ୱ ନିଭାଇଥିଲେ ଅଭିନ୍ନ ଆଶୁତୋଷ ଶତପଥୀ I
