ନୂଆଦିଲ୍ଲୀ : ବାଂଲାଦେଶର ପ୍ରଥମ ମହିଳା ପ୍ରଧାନମନ୍ତ୍ରୀ ତଥା ବାଂଲାଦେଶ ନ୍ୟାସନାଲିଷ୍ଟ ପାର୍ଟି (BNP)ର ଅଧ୍ୟକ୍ଷା ବେଗମ ଖାଲିଦା ଜିଆଙ୍କ ଆଜି ଦେହାନ୍ତ ହୋଇଛି। ମୃତ୍ୟୁ ବେଳକୁ ତାଙ୍କୁ ୮୦ ବର୍ଷ ହୋଇଥିଲା। ଦୀର୍ଘ ଦିନ ଧରି ଅସୁସ୍ଥତା ପରେ ଆଜି ତାଙ୍କର ଜୀବନଦୀପ ଲିଭିଯାଇଛି। ତାଙ୍କ ବିୟୋଗରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗଭୀର ଶୋକ ପ୍ରକାଶ କରିବା ସହ ବାଂଲାଦେଶର ବିକାଶ ଓ ଭାରତ-ବାଂଲାଦେଶ ସମ୍ପର୍କ ପ୍ରତି ତାଙ୍କର ଅବଦାନକୁ ମନେ ପକାଇଛନ୍ତି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ (X)ରେ ପୋଷ୍ଟ କରି ଲେଖିଛନ୍ତି ଯେ, “ଢାକାରେ ପୂର୍ବତନ ପ୍ରଧାନମନ୍ତ୍ରୀ ବେଗମ ଖାଲେଦା ଜିଆଙ୍କ ଦେହାନ୍ତ ବିଷୟରେ ଜାଣି ମୁଁ ଗଭୀର ଦୁଃଖିତ। ବାଂଲାଦେଶର ବିକାଶ ଏବଂ ଉଭୟ ଦେଶ ମଧ୍ୟରେ ଥିବା ସମ୍ପର୍କ ପ୍ରତି ତାଙ୍କର ଗୁରୁତ୍ୱପୂର୍ଣ୍ଣ ଅବଦାନ ସର୍ବଦା ସ୍ମରଣୀୟ ହୋଇ ରହିବ।” ପ୍ରଧାନମନ୍ତ୍ରୀ ୨୦୧୫ ମସିହାରେ ଢାକା ଗସ୍ତ ସମୟରେ ଖାଲିଦା ଜିଆଙ୍କ ସହ ହୋଇଥିବା ସାକ୍ଷାତକୁ ମନେ ପକାଇବା ସହ ତାଙ୍କ ପରିବାର ଓ ବାଂଲାଦେଶବାସୀଙ୍କ ପ୍ରତି ସମବେଦନା ଜଣାଇଛନ୍ତି।
ସୂଚନା ଅନୁଯାୟୀ, ଖାଲିଦା ଜିଆ ଦୀର୍ଘ ଦିନ ଧରି ଲିଭର ସିରୋସିସ୍ ରୋଗରେ ପୀଡ଼ିତ ଥିଲେ। ଏଥିସହ ସେ ଆର୍ଥ୍ରାଇଟିସ୍, ହୃଦରୋଗ ଏବଂ ମଧୁମେହ ଭଳି ଜଟିଳ ରୋଗରେ ମଧ୍ୟ ଆକ୍ରାନ୍ତ ଥିଲେ। ଉନ୍ନତ ଚିକିତ୍ସା ପାଇଁ ସେ ଲଣ୍ଡନ ଯାଇଥିଲେ ଏବଂ ଚାରି ମାସ ପରେ ଗତ ମେ ୬ ତାରିଖରେ ବାଂଲାଦେଶ ଫେରିଥିଲେ।
ଖାଲିଦା ଜିଆ ଦୁଇଟି ପର୍ଯ୍ୟାୟରେ (୧୯୯୧-୧୯୯୬ ଏବଂ ୨୦୦୧-୨୦୦୬) ବାଂଲାଦେଶର ପ୍ରଧାନମନ୍ତ୍ରୀ ଭାବେ କାର୍ଯ୍ୟ କରିଥିଲେ।
ସେ ବାଂଲାଦେଶର ପୂର୍ବତନ ରାଷ୍ଟ୍ରପତି ତଥା ବିଏନପି ପ୍ରତିଷ୍ଠାତା ଜିଆଉର ରହମାନଙ୍କ ପତ୍ନୀ ଥିଲେ। ତାଙ୍କର ଦୁଇ ପୁଅଙ୍କ ମଧ୍ୟରୁ ବଡ଼ ପୁଅ ତାରିକ ରହମାନ ବର୍ତ୍ତମାନ ବିଏନପିର କାର୍ଯ୍ୟକାରୀ ଅଧ୍ୟକ୍ଷ ଅଛନ୍ତି। ସେ ଦୀର୍ଘ ବର୍ଷ ଲଣ୍ଡନରେ ରହିବା ପରେ ଏହି ମାସରେ ଦେଶକୁ ଫେରିଛନ୍ତି। ସାନ ପୁଅ ଆରାଫାତ ରହମାନଙ୍କର ୨୦୧୫ରେ ମୃତ୍ୟୁ ଘଟିଥିଲା। ଦେଶରେ ରାଜନୈତିକ ଅସ୍ଥିରତା ମଧ୍ୟରେ ୨୦୨୪ ଅଗଷ୍ଟ ୬ ତାରିଖରେ ସେ ଜେଲ୍ରୁ ମୁକ୍ତ ହୋଇଥିଲେ। ପ୍ରଧାନମନ୍ତ୍ରୀ ମୋଦୀ ଆଶା ପ୍ରକାଶ କରିଛନ୍ତି ଯେ, ବେଗମ ଖାଲିଦାଙ୍କ ଦୂରଦୃଷ୍ଟି ଏବଂ ଐତିହ୍ୟ ଆଗାମୀ ଦିନରେ ଭାରତ-ବାଂଲାଦେଶର ସହଭାଗୀତାକୁ ଏକ ନୂଆ ଦିଗ ଦେଖାଇବ। ତାଙ୍କ ଦେହାନ୍ତରେ ବାଂଲାଦେଶ ରାଜନୀତିରେ ଏକ ଯୁଗର ଅବସାନ ଘଟିଛି।
