OTT ନିୟନ୍ତ୍ରଣରେ ସୁପ୍ରିମକୋର୍ଟଙ୍କ କଡ଼ା ମନ୍ତବ୍ୟ

ଅନଲାଇନ୍ ଏବଂ OTT ପ୍ଲାଟଫର୍ମରେ ଅଶ୍ଳୀଳ ତଥା ଆପତ୍ତିଜନକ କଣ୍ଟେଣ୍ଟ୍ ନିୟନ୍ତ୍ରଣକୁ ନେଇ ଗୁରୁବାର ସୁପ୍ରିମକୋର୍ଟ ଏକ ଗୁରୁତ୍ୱପୂର୍ଣ୍ଣ ଶୁଣାଣି କରିଛନ୍ତି। ପ୍ରଧାନ ବିଚାରପତି (CJI) ସୂର୍ଯ୍ୟକାନ୍ତ ଅନଲାଇନ୍ କଣ୍ଟେଣ୍ଟ୍ ନିର୍ମାତାଙ୍କର ଉତ୍ତରଦାୟିତ୍ୱ ନଥିବା ଉପରେ ତୀବ୍ର ପ୍ରଶ୍ନ ଉଠାଇଛନ୍ତି। ପ୍ରଧାନ ବିଚାରପତି କହିଥିଲେ, “ମୁଁ ମୋର ଚ୍ୟାନେଲ ଖୋଲିଲେ, ମୁଁ କାହା ପାଖରେ ଉତ୍ତରଦାୟୀ ନୁହେଁ। ଏହା ଠିକ୍ ନୁହେଁ… କାହାକୁ ତ ଉତ୍ତରଦାୟୀ ହେବାକୁ ପଡ଼ିବ!”  କୋର୍ଟ ପରାମର୍ଶ ଦେଇଛନ୍ତି ଯେ ଅନଲାଇନ୍ ବିଷୟବସ୍ତୁ ନିୟନ୍ତ୍ରଣ ପାଇଁ ଏକ “ନିରପେକ୍ଷ, ସ୍ୱାଧୀନ ଏବଂ ସ୍ୱୟଂଶାସିତ” ନିୟାମକ ସଂସ୍ଥା ଆବଶ୍ୟକ, ଯାହାକି ଶୋଷଣ କରୁଥିବା ଲୋକଙ୍କ ପ୍ରଭାବରୁ ମୁକ୍ତ ଥିବ। OTT ପ୍ଲାଟଫର୍ମରେ ଅଶ୍ଳୀଳ କିମ୍ବା ବୟସ୍କଙ୍କ ପାଇଁ ଉଦ୍ଦିଷ୍ଟ ବିଷୟବସ୍ତୁ ଦେଖିବା ପୂର୍ବରୁ ଆଧାର  ଜରିଆରେ ଉପଭୋକ୍ତାଙ୍କ ବୟସ ଯାଞ୍ଚ  ବ୍ୟବସ୍ଥା ହେବା ଦରକାର। ଆଟର୍ଣ୍ଣି ଜେନେରାଲ୍ ଆର୍. ଭେଙ୍କଟରମଣି ଏବଂ ସଲିସିଟର ଜେନେରାଲ୍ ତୁଷାର ମେହେତା କୋର୍ଟଙ୍କୁ ସୂଚନା ଦେଇଛନ୍ତି ଯେ କେନ୍ଦ୍ର ସରକାର ନୂତନ ଗାଇଡଲାଇନ ପ୍ରସ୍ତୁତ କରୁଛନ୍ତି।  ସଲିସିଟର ଜେନେରାଲ୍ କହିଥିଲେ ଯେ ଏହି ସମସ୍ୟା କେବଳ “ଅଶ୍ଳୀଳତା” ମଧ୍ୟରେ ସୀମିତ ନାହିଁ, ବରଂ ୟୁଜର୍ ଜେନେରେଟେଡ୍ କଣ୍ଟେଣ୍ଟ୍‌ରେ ଥିବା “ବିକୃତି”  ପର୍ଯ୍ୟନ୍ତ ବ୍ୟାପିଛି।  SG ମେହେତା କହିଛନ୍ତି, “ବାକ୍ ସ୍ୱାଧୀନତା ଏକ ମୂଲ୍ୟବାନ ଅଧିକାର, କିନ୍ତୁ ଏହା ବିକୃତିକୁ ନେଇ ଯାଇପାରିବ ନାହିଁ।”