ଛତିଶଗଡ଼ର କାଙ୍କେର ଜିଲ୍ଲାରୁ କାନ୍ଧରେ ବନ୍ଧୁକ ଆଉ ହୃଦୟରେ ପ୍ରେମ କାହାଣୀ ସାମ୍ନାକୁ ଆସିଛି । ହିଂସାରେ ଭଳି ଯାଇଥିବା ମନ ଏବଂ ପରିବର୍ତ୍ତନ ଏହି କାହାଣୀ ସମାଜକୁ ଏକ ସୁନ୍ଦର ବାର୍ତ୍ତା ଦେଇଛି । ଯେଉଁଠାରେ ଏକ ଆତ୍ମସମର୍ପଣକାରୀ ନକ୍ସଲ ଦମ୍ପତି, ପୋଲିସର ସମର୍ଥନ, ଲୋକଙ୍କ ସହଯୋଗରେ ଉତ୍ସବ ପାଳନ କରି ପୋଲିସ ଷ୍ଟେସନରେ ବିବାହ ବନ୍ଧନରେ ଆବଦ୍ଧ ହୋଇଛନ୍ତି ।
ଘଟଣା ଅନୁସାରେ ନକ୍ସଲ ଗୋଷ୍ଠୀର ସଦସ୍ୟ ଥିବା ସାଗର ହିରଡୋ ଏବଂ ସଚିଲା ମାଣ୍ଡଭି ପ୍ରେମରେ ପଡ଼ିଥିଲେ । ଶେଷରେ ସେମାନେ ଗତ ବର୍ଷ ହିଂସାର ପଥ ପରିତ୍ୟାଗ କରି ସରକାରୀ ପୁନର୍ବାସ ଯୋଜନା ଦ୍ୱାରା ଅନୁପ୍ରାଣିତ ହୋଇ ପୋଲିସ ନିକଟରେ ସରେଣ୍ଡର କରିଥିଲେ । ଏହି ବର୍ଷ, ସେମାନେ ବିବାହ କରିବାକୁ ଇଚ୍ଛା ପ୍ରକାଶ କରିଥିଲେ। ଏହା ଜାଣିବା ପରେ ପଖାଞ୍ଜୁର ପୋଲିସ ପ୍ରଶାସନ ସେମାନଙ୍କ ବିବାହ ଆୟୋଜନ କରିଥିଲା । ଖାଦ୍ୟ ଠାରୁ ଆରମ୍ଭ କରି ସାଜସଜ୍ଜା ପର୍ଯ୍ୟନ୍ତ ସବୁକିଛି ବ୍ୟବସ୍ଥା କରିଥିଲା ପୋଳିସ। ଅଧିକାରୀମାନେ ଅତିଥି ଭାବରେ ଉତ୍ସବରେ ଯୋଗଦେଇଥିଲେ । ପବିତ୍ର ଅଗ୍ନି ଚାରିପାଖରେ ଦମ୍ପତିଙ୍କ ପାରମ୍ପରିକ ପ୍ରତିଜ୍ଞା କରିଥିଲେ । ପଖାଞ୍ଜୁର ପୋଲିସ ଷ୍ଟେସନ ପ୍ରଭାରୀ ଲକ୍ଷ୍ମଣ କେୱାଟ ଏବଂ ଗୋଣ୍ଡାହୁର ପୋଲିସ ଷ୍ଟେସନ ପ୍ରଭାରୀ ଏହି ବିବାହକୁ ଆୟୋଜନ କରିଥିଲେ ।
ଦିନେ ଛତିଶଗଡ଼ର ମାଓ ପ୍ରଭାବିତ ଜଙ୍ଗଲରେ ଲୁଚି ବୁଲୁଥିଲେ ଏହି ଦୁଇ ମାଓବାଦୀ । ସେଦିନ ତାଙ୍କ ମନରେ ଥିଲା ହିଂସା । ଆଜି ଶାନ୍ତିର ପଥରେ ଚାଲିବାକୁ ସେମାନେ ନେଇଛନ୍ତି ଶପଥ । ସେମାନେ ଆଜି ଥାନାରେ ବାହା ହୋଇ ସଂସାର ଗଢ଼ିବାକୁ ଯାଉଛନ୍ତି । କାଙ୍କେର ଜିଲ୍ଲାର ପାଖଞ୍ଜୁରରୁ ଏକ ପ୍ରେରଣାଦାୟକ ଚିତ୍ର ସମସ୍ତଙ୍କ ପାଇଁ ଉଦାହରଣ ହୋଇଛି ।
ଯେଉଁମାନେ କେବେ ଜଙ୍ଗଲରେ ବନ୍ଧୁକ ଧରି ଲୋକଙ୍କ ଜୀବନ ନେଉଥିଲେ, ସେମାନଙ୍କ ହାତ ମେହେନ୍ଦି ଓ ମାଳାରେ ସଜା ହୋଇଥିଲା । ଆତ୍ମସମର୍ପଣ କରିଥିବା ମାଓବାଦୀ ସାଗର ଡିର୍ଡୋ ଓ ସଚିଲା ମଣ୍ଡାବୀଙ୍କ ଜୀବନ ଏବେ ବଦଳି ଯାଇଛି । ସେମାନଙ୍କୁ ଆଉ କେହି ମାଓବାଦୀ କହି ସନ୍ଦେହ କରୁନାହାଁନ୍ତି । ପୁରୋହିତଙ୍କ ମନ୍ତ୍ରଉଚ୍ଚାରଣ ଓ ଶଂଖଧ୍ୱନି ମଧ୍ୟରେ ସାଗର ଓ ସଚିଲା ପରସ୍ପରଙ୍କ ହାତ ଧରି ନୂତନ ଜୀବନ ଆରମ୍ଭ କରିବାକୁ ଶପଥ ନେବାପରେ ଏବେ ସେମାନେ ସମସ୍ତଙ୍କ ପାଇଁ ସାହସ ଦେଖାଇ ନୂଆ ବାର୍ତ୍ତା ଦେଇଛନ୍ତି । ପୁଲିସ ଅଧିକାରୀମାନଙ୍କ ମତାନୁସାରେ, ଏହି ବିବାହ କେବଳ ଦୁଇ ଜଣ ବ୍ୟକ୍ତିଙ୍କ ମିଳନ ନୁହେଁ, ବରଂ ହିଂସା ଉପରେ ବିଶ୍ୱାସର ବିଜୟ। ଏହା ଏହି ସନ୍ଦେଶ ଦେଉଛି ଯେ “ଶାନ୍ତିର ପଥ ଗୁଳିରେ ନୁହେଁ, ପ୍ରେମ ଓ ବିଶ୍ୱାସରେ ଅଛି।”
ଏହି ବିବାହ ଉତ୍ସବରେ ପୁଲିସ ଅଧିକାରୀ, ଗ୍ରାମବାସୀ ଓ ସାମାଜିକ କର୍ମୀମାନେ ସାମିଲ ହୋଇଥିଲେ। ଏନକାଉଣ୍ଟର ବିଶେଷଜ୍ଞ ଲକ୍ଷ୍ମଣ କେୱଟ ଓ ଇନ୍ସପେକ୍ଟର ରାମଚନ୍ଦ୍ର ସାହୁ ମଧ୍ୟ ଏହି ସ୍ପେଶାଲ ମୁହୂର୍ତ୍ତରେ ଉପସ୍ଥିତ ରହି ଆଶୀର୍ବାଦ ଦେଇଥିଲେ । ପୂର୍ବରୁ ଘଞ୍ଚ ଜଙ୍ଗଲରେ ବନ୍ଧୁକ ନେଇ ଘୁରୁଥିବା ଏହି ଦମ୍ପତି ପ୍ରେମ ଓ ଶାନ୍ତିର ପଥ ବାଛିଥିବାରୁ ପୋଲିସ ଅଧିକାରୀମାନେ ତାଙ୍କ ସହ ଫଟୋ ଉଠାଇଥିଲେ ।
ଏବେ ଏହି ଦମ୍ପତ୍ତି ପୋଲିସ ପାଇଁ ସେବାକାରୀ ଭାବେ କାର୍ଯ୍ୟ କରୁଛନ୍ତି । ଅନ୍ୟ ମାଓବାଦୀଙ୍କୁ ମୁଖ୍ୟ ସ୍ରୋତରେ ଫେରିବା ପାଇଁ କାମ କରୁଛନ୍ତି । ଏହି ଅଭିନବ ପଦକ୍ଷେପ ମାଓବାଦ ପ୍ରଭାବିତ ଅଞ୍ଚଳରେ ଏକ ନୂଆ ଆଶାର କିରଣ ସୃଷ୍ଟି କରିଛି । ଯେଉଁଠାରେ ବନ୍ଧୁକ ଛାଡ଼ି ସେମାନେ ପରସ୍ପରର ହାତ ଧରି ନୂଆ ସଂସାର ଗଢ଼ିବାକୁ ଶପଥ ନେଇଛନ୍ତି । ଯାହାକୁ ନେଇ ସ୍ଥାନୀୟ ଅଞ୍ଚଳରେ ଏହି ଖବର ବେଶ ଆଲୋଚନା ହେଉଛି ।
