ଆମ୍ ଆଦମୀ ପାର୍ଟି (ଏଏପି) ରାଜ୍ୟସଭା ଡେପୁଟି ଲିଡର୍ ପଦବୀରୁ ରାଘବ ଚଢ଼ାଙ୍କୁ ହଟାଇବା ପରେ ଦଳ ଓ ତାଙ୍କ ମଧ୍ୟରେ ଉତ୍ତେଜନା ବଢ଼ିଛି। ଏହି ପରିପ୍ରେକ୍ଷୀରେ ରାଘବ ଚଢ଼ା ଏକ ଭିଡିଓ ବାର୍ତ୍ତା ଜାରି କରି ଦଳର ଅଭିଯୋଗଗୁଡ଼ିକୁ ପୂରାପୂରି ଖଣ୍ଡନ କରିଛନ୍ତି ଏବଂ ଫିଲ୍ମ ‘ଧୂରନ୍ଧର’ର ଏକ ଲୋକପ୍ରିୟ ଡାଇଲଗ୍ ବ୍ୟବହାର କରି କଟାକ୍ଷ କରିଛନ୍ତି।
ରାଘବ ଚଢ଼ା ଏକ୍ସ (ପୂର୍ବତନ ଟ୍ୱିଟର)ରେ ପୋଷ୍ଟ କରିଥିବା ଭିଡିଓରେ କହିଛନ୍ତି ଯେ ଦଳ ତାଙ୍କ ବିରୋଧରେ ଯେଉଁ ଅଭିଯୋଗ ଆଣିଛି ସେଗୁଡ଼ିକ ସମ୍ପୂର୍ଣ୍ଣ ମିଥ୍ୟା ଏବଂ ତାଙ୍କୁ ଚୁପ୍ କରାଇବା ପାଇଁ ଏକ ପ୍ରାୟୋଜିତ ଅଭିଯାନ। ସେ କହିଛନ୍ତି, “ମୁଁ ପ୍ରଥମେ ଭାବିଥିଲି ଯେ ଏହି ଅଭିଯୋଗଗୁଡ଼ିକୁ ଉତ୍ତର ଦେବି ନାହିଁ। କିନ୍ତୁ ପରେ ଭାବିଲି ଯେ ଗୋଟିଏ ମିଛକୁ ହଜାର ଥର କହିଲେ କେତେକ ଲୋକ ତାହାକୁ ସତ ବୋଲି ବିଶ୍ୱାସ କରିପାରନ୍ତି। ତେଣୁ ମୁଁ କହିବାକୁ ବାଧ୍ୟ ହୋଇଛି।
”ରାଘବ ଚଢ଼ା ଦଳର ତିନୋଟି ମୁଖ୍ୟ ଅଭିଯୋଗର ଉତ୍ତର ଦେଇଛନ୍ତି। ସେ କହିଛନ୍ତି ଯେ ତାଙ୍କୁ ଚୁପ୍ କରାଯାଉଛି କିନ୍ତୁ ପରାଜିତ କରାଯାଇ ନାହିଁ। ସେ ସଂସଦରେ ଲୋକଙ୍କ ସମସ୍ୟା ଉଠାଉଛନ୍ତି ବୋଲି କହି ପ୍ରଶ୍ନ କରିଛନ୍ତି, “ଆମ୍ ଆଦମୀର କଲ୍ୟାଣ ପାଇଁ ପ୍ରଶ୍ନ ଉଠାଇବା କି ଅପରାଧ ?”ଭିଡିଓର ଶେଷରେ ରାଘବ ଚଢ଼ା ‘ଧୂରନ୍ଧର’ ଫିଲ୍ମର ଏକ ଲୋକପ୍ରିୟ ଡାଇଲଗ୍ ଉଦ୍ଧୃତ କରି କହିଛନ୍ତି, “ଘାୟଲ୍ ହୁଁ ଇସିଲିୟେ ଘାତକ୍ ହୁଁ” (ମୁଁ ଆଘାତପ୍ରାପ୍ତ, ତେଣୁ ମୁଁ ବିପଜ୍ଜନକ)।
ସେ ଆହୁରି କହିଛନ୍ତି ଯେ ସମସ୍ତ ମିଛ ଶୀଘ୍ର ଉନ୍ମୋଚିତ ହେବ।ଏହି ଘଟଣା ଆପ ଭିତରେ ଗଭୀର ବିଭାଜନର ସଙ୍କେତ ଦେଉଛି। ଦଳ ରାଘବ ଚଢ଼ାଙ୍କୁ ରାଜ୍ୟସଭା ଡେପୁଟି ଲିଡର୍ ପଦବୀରୁ ହଟାଇ ଅଶୋକ ମିତ୍ତଲଙ୍କୁ ନିଯୁକ୍ତ କରିଛି ଏବଂ ତାଙ୍କୁ ସଂସଦରେ କଥା କହିବା ପାଇଁ ସମୟ ନ ଦେବାକୁ ମଧ୍ୟ ଅନୁରୋଧ କରିଛି। ରାଘବ ଚଢ଼ା ଏହାକୁ ତାଙ୍କ କଣ୍ଠସ୍ୱରକୁ ଦମନ କରିବାର ପ୍ରୟାସ ବୋଲି ବର୍ଣ୍ଣନା କରିଛନ୍ତି। ଆପ ଏହି ପରିବର୍ତ୍ତନକୁ ଏକ ରୁଟିନ୍ ସାଂଗଠନିକ ପଦକ୍ଷେପ ବୋଲି କହିଛି, କିନ୍ତୁ ରାଘବ ଚଢ଼ାଙ୍କ ପ୍ରତିକ୍ରିୟା ପରେ ଦଳ ଭିତରେ ଉତ୍ତେଜନା ଆହୁରି ବଢ଼ିଛି।
