ଚଳିତବର୍ଷ ମାର୍ଚ୍ଚ ୧୩ ତାରିଖରେ ଓଡିଶା ଜୁଡିସିଆଲ ସର୍ଭିସ (ଓଜେଏସ), ୨୦୨୩ର ଫଳାଫଳ ପ୍ରକାଶ ପାଇଛି ଓ ୩୩ଜଣ ଛାତ୍ରଛାତ୍ରୀ ନ୍ୟାୟିକ ଅଧିକାରୀ ଭାବେ ସଫଳତା ପାଇଛନ୍ତି। ଆଜି ଏହି କୃତି ଛାତ୍ରଛାତ୍ରୀମାନଙ୍କୁ ଭୁବନେଶ୍ୱର ସ୍ଥିତ ପ୍ରମୁଖ ଆଇନ ଶିକ୍ଷା ଅନୁଷ୍ଠାନ ‘ନୃପଦ ଲ କ୍ଳାସେସ’ ତରଫରୁ ଏହି ପ୍ରତିଷ୍ଠାନର ମୁଖ୍ୟ ମମତା ଦେବୀଙ୍କ ଅଧ୍ୟକ୍ଷତାରେ ଆୟୋଜିତ ସଭାରେ ସମ୍ବର୍ଦ୍ଧିତ କରାଯାଇଥିଲା।
ଏଥିରେ ମୁଖ୍ୟ ଅତିଥି ଭାବେ ଓଡିଶା ବାର କାଉନ୍ସିଲର ସଭ୍ୟ ତଥା ବରିଷ୍ଠ ଆଇନଜୀବୀ ବିଭୁ ପ୍ରସାଦ ତ୍ରିପାଠୀ, ସମ୍ମାନିତ ଅତିଥି ଭାବେ ସମ୍ବଲପୁର ବିଶ୍ୱ ବିଦ୍ୟାଳୟର ପ୍ରଫେସର ଡ଼ଃ ମୀନକେତନ ସାହୁ ଓ ମୁଖ୍ୟ ବକ୍ତା ଭାବେ ସମାଜସେବୀ ନୀଳମଣି ମିଶ୍ର ଯୋଗ ଦେଇଥିଲେ ।
ଏହି ଶିକ୍ଷାନୁଷ୍ଠାନର ବିଗତ ଦିନର ସଫଳତା କଥା ବର୍ଣ୍ଣନା କରିବା ସହ ଏଥର କୃତିତ୍ୱ ହାସଲ କରିଥିବା ୩ଜଣ ନ୍ୟାୟିକ ଅଧିକାରୀ ଶ୍ରୀତା ଛୋଟରାୟ, ଦେବଦତ୍ତ ଜେନା ଓ ସ୍ମୃତି ପଟ୍ଟନାୟକଙ୍କୁ ଉପସ୍ଥିତ ଥିବା ଛାତ୍ରଛାତ୍ରୀଙ୍କ ସମ୍ମୁଖରେ ମାନପତ୍ର ଦେଇ ସମ୍ମାନିତ କରିଥିଲେ । ଭବିଷ୍ୟତରେ ଜଣେ ଭଲ ନ୍ୟାୟିକ ଅଧିକାରୀ ହେବାକୁ ନେଇ ସେମାନଙ୍କୁ ଉପଦେଶ ଦେଇଥିଲେ ।
ସୂଚନାଯୋଗ୍ୟ, ବିଗତ ୩ ବର୍ଷ ଧରି ଏହି ଅନୁଷ୍ଠାନର ଫଳାଫଳ ବେଶ ଆଖିଦୃଶିଆ ହେବାରେ ଲାଗିଛି। ଏହି ଅନୁଷ୍ଠାନରେ ଏକମାତ୍ର ଶିକ୍ଷୟତ୍ରୀ ମମତା ଦେବୀ ସମସ୍ତଙ୍କୁ ପଢ଼ାଉଥିବା ବେଳେ ତାଙ୍କର ସ୍ୱାମୀ ରାଜେଶ କୁମାର ମିଶ୍ର ତାଙ୍କୁ ଏଥିରେ ସହଯୋଗ କରିଥାନ୍ତି ବୋଲି ମମତା ଦେବୀ ସୂଚନା ଦେଇଛନ୍ତି।
ବିଗତ ବର୍ଷ ପ୍ରଥମ ବ୍ୟାଚରେ ୫ଜଣ, ଗତବର୍ଷ ୧୧ଜଣ ଓ ଏ ବର୍ଷ ୪ଜଣ ନ୍ୟାୟିକ ଅଧିକାରୀ ଏହି ଶିକ୍ଷ୍ୟାନୁଷ୍ଠାନରୁ ସୃଷ୍ଟି ହୋଇଛନ୍ତି। ସେହିପରି ଏହି ଶିକ୍ଷାନୁଷ୍ଠାନରୁ ଆଜି ପର୍ଯ୍ୟନ୍ତ ବହୁ ଅଭିଯୋଜନ ଅଧିକାରୀ, ଶିକ୍ଷକ ମଧ୍ୟ ସୃଷ୍ଟି ହୋଇଛନ୍ତି। ପୁରୁଷ ପ୍ରଧାନ ସମାଜରେ ଏକାକୀ ମହିଳା ଭାବେ ଆଇନ ଶିକ୍ଷାକୁ ଏକ ସ୍ଥରକୁ ନେଇଥିବା ମମତା ଦେବୀଙ୍କୁ ସମସ୍ତ ମହଲରୁ ପ୍ରଶଂସା ମିଳୁଥିବାର ସୂଚନା ମିଳୁଛି।
