ବିହାର ବିଧାନସଭା ନିର୍ବାଚନକୁ ନେଇ ବିଭିନ୍ନ ଦଳ ପକ୍ଷରୁ ଢ଼େର ସାରା ପ୍ରତିଶ୍ରତି ଦିଆଯାଉଛି । ପ୍ରଥମ ପର୍ଯ୍ୟାୟ ଭୋଟ୍ ଗ୍ରହଣର ଏକ ସପ୍ତାହ ପୂର୍ବରୁ ନ୍ୟାଶନାଲ୍ ଡେମୋକ୍ରାଟିକ୍ ଆଲାଇନ୍ସ୍ (ଏନ୍ଡିଏ) ନିଜର ନିର୍ବାଚନୀ ଇସ୍ତାହାର ପ୍ରକାଶ କରିଛି। ଏନ୍ଡିଏ ୧ କୋଟି ସରକାରୀ ଚାକିରି ଦେବାର ମେଗା ପ୍ରତିଶ୍ରୁତି ଦେଇଛି। ମହିଳା ସଶକ୍ତିକରଣ ପାଇଁ ୧ କୋଟି ‘ଲଖପତି ଦିଦି’ ଗଢ଼ିବେ, ଯାହାଫଳରେ ମହିଳାମାନେ ବାର୍ଷିକ ୧ ଲକ୍ଷ ଟଙ୍କା ରୋଜଗାର କରିପାରିବେ ବୋଲି ଏନଡିଏ ପକ୍ଷରୁ କୁହାଯାଇଛି । ରୋଜଗାର ସୃଷ୍ଟିକୁ ପ୍ରାଧାନ୍ୟ ଦେଇ ଏନ୍ଡିଏ ଏପରି ପ୍ରତିଶ୍ରୁତି ଦେଇଛି ।
ବିହାର ବିଧାନସଭା ନିର୍ବାଚନ ପାଇଁ ଏନଡିଏ ପକ୍ଷରୁ ଇସ୍ତାହାର ପ୍ରକାଶ କରାଯିବା ପରେ ଏବେ ଏହାକୁ ନେଇ ଚର୍ଚା ଆରମ୍ଭ ହୋଇଛି । ଏହି ଇସ୍ତାହାରରେ ବିହାରର ଜନସାଧାରଣଙ୍କୁ ଅନେକ ଗୁରୁତ୍ୱପୂର୍ଣ୍ଣ ପ୍ରତିଶ୍ରୁତି ଦିଆଯାଇଛି। ପାଟନାର ଗାନ୍ଧୀ ମୈଦାନରେ ଥିବା ହୋଟେଲ ମୌର୍ଯ୍ୟରେ ଏକ ସାମ୍ବାଦିକ ସମ୍ମିଳନୀ ମାଧ୍ୟମରେ ଇସ୍ତାହାର ସମ୍ପର୍କରେ ସୂଚନା ପ୍ରଦାନ କରାଯାଇଥିଲା। ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା, ଉପମୁଖ୍ୟମନ୍ତ୍ରୀ ସମ୍ରାଟ ଚୌଧୁରୀ, ବିହାର ବିଜେପି ରାଜ୍ୟ ସଭାପତି ଦିଲୀପ ଜୟସୱାଲ । ଏହି କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ନୀତିଶ କୁମାର, ସଞ୍ଜୟ କୁମାର ଝା ଏବଂ ଲଲନ ସିଂହ ମଧ୍ୟ ଯୋଗ ଦେଇଥିଲେ। କେନ୍ଦ୍ର ମନ୍ତ୍ରୀ ଜିତନ ରାମ ମାଞ୍ଝି ଏବଂ ଚିରାଗ ପାସୱାନ ଏବଂ ରାଷ୍ଟ୍ରୀୟ ଲୋକମୋର୍ଚ୍ଚା ସଭାପତି ଉପେନ୍ଦ୍ର କୁଶୱାହା ମଧ୍ୟ ଯୋଗ ଦେଇଥିଲେ।
ସେମାନଙ୍କ ଉପସ୍ଥିତିରେ ମିଳିତ ଇସ୍ତାହାର ପ୍ରକାଶିତ ହୋଇଥିଲା। ଇସ୍ତାହାର ସମ୍ପର୍କରେ ଉପମୁଖ୍ୟମନ୍ତ୍ରୀ ସମ୍ରାଟ ଚୌଧୁରୀ କହିଛନ୍ତି ଯେ ଏକ କୋଟିରୁ ଅଧିକ ସରକାରୀ ଚାକିରି ଏବଂ ନିଯୁକ୍ତି ସୁଯୋଗ ଯୋଗାଇ ଦିଆଯିବ। ପ୍ରତ୍ୟେକ ଜିଲ୍ଲାରେ ମେଗା ସ୍କିଲ ସେଣ୍ଟର ବିହାରକୁ ଏକ ବିଶ୍ୱସ୍ତରୀୟ ସ୍କିଲିଂ ହବ୍ ଭାବରେ ପ୍ରତିଷ୍ଠା କରିବ। ମୁଖ୍ୟମନ୍ତ୍ରୀ ମହିଳା ନିଯୁକ୍ତି ଯୋଜନାରେ ସରକାର ମହିଳାମାନଙ୍କୁ ଦୁଇ ଲକ୍ଷ ଟଙ୍କା ପର୍ଯ୍ୟନ୍ତ ସହାୟତା ପ୍ରଦାନ କରିବେ। ଏକ କୋଟି ମହିଳାଙ୍କୁ ଲକ୍ଷପତି ଦିଦି କରିବା ପାଇଁ କାର୍ଯ୍ୟ କରାଯିବ। ସବୁଠାରୁ ପଛୁଆ ବର୍ଗର ବିଭିନ୍ନ ବୃତ୍ତିଗତ ଗୋଷ୍ଠୀଙ୍କୁ ୧୦ ଲକ୍ଷ ଟଙ୍କା ପର୍ଯ୍ୟନ୍ତ ସହାୟତା ପ୍ରଦାନ କରାଯିବ। ସେହିପରି କର୍ପୂରୀ ଠାକୁର କିଷାନ ସମ୍ମାନ ନିଧି ଆରମ୍ଭ କରାଯିବ, ଯାହା ଚାଷୀମାନଙ୍କୁ ପ୍ରତିବର୍ଷ ୯୦୦୦ ଟଙ୍କା ପ୍ରଦାନ କରିବ। କୃଷି ଭିତ୍ତିଭୂମିରେ ଏକ ଲକ୍ଷ କୋଟି ଟଙ୍କା ବିନିଯୋଗ କରାଯିବ। ପଞ୍ଚାୟତ ସ୍ତରରେ ସର୍ବନିମ୍ନ ସହାୟକ ମୂଲ୍ୟ (MSP) ରେ ସମସ୍ତ ପ୍ରମୁଖ ଫସଲ କ୍ରୟ କରାଯିବ।
