ବେଙ୍ଗାଲୁରୁ ଇଂଜିନିୟରିଂ କ୍ୟାମ୍ପସ ଭିତରେ ଛାତ୍ରୀଙ୍କୁ ଦୁଷ୍କର୍ମ କଲା ସହପାଠୀ ବନ୍ଧୁ

ବେଙ୍ଗାଲୁରୁର ଏକ ଘରୋଇ ଇଞ୍ଜିନିୟରିଂ କଲେଜରେ ଛାତି ଥରିଲା ଭଳି ଅଘଟଣ ଘଟିଛି । ଦୁର୍ଗାପୁରରେ ଓଡ଼ିଆ ଡାକ୍ତରୀ ଛାତ୍ରୀଙ୍କ ଉପରେ ନିର୍ଯାତନାକୁ ନେଇ ସାରା ଦେଶରେ ଅସନ୍ତୋଷ ପ୍ରକାଶ ପାଇଥିବା ବେଳେ ବେଙ୍ଗାଲୁରରେ ସେପରି ଜଣେ ଛାତ୍ରୀଙ୍କ ଉପରେ ନିର୍ଯାତନା ଘଟଣା ଘଟିଛି । ବେଙ୍ଗାଲୁରର ଏକ ଘରୋଇ ଇଂଜିନିୟରିଂ କଲେଜ କ୍ୟାମ୍ପସରେ ଜଣେ ଛାତ୍ରୀଙ୍କୁ ଦୁଷ୍କର୍ମ କରାଯାଇଥିବା ଅଭିଯୋଗ ହୋଇଛି । ଛାତ୍ରୀଙ୍କ  ସହପାଠୀ ଥିବା ଯୁବକ   କ୍ୟାମ୍ପସ ଭିତରେ ତାଙ୍କ ଉପରେ ଆକ୍ରମଣ କରିବା ସହ ଛାତ୍ରୀଙ୍କୁ ଦୁଷ୍କର୍ମ କରିଛନ୍ତି । ଶୈାଚାଳୟ ଭିତରେ ଜଣେ 21 ବର୍ଷୀୟ ଇଞ୍ଜିନିୟରିଂ ଛାତ୍ରୀଙ୍କୁ ପୂର୍ବରୁ ତାଙ୍କର ସହପାଠୀ ଥିବା ଜୀବନ ଗୈାଡ଼ ଆକ୍ରମଣ କରି ଦୁଷ୍କର୍ମ କରିବା ଅଭିଯୋଗରେ ଗିରଫ ହୋଇଛି । ଏହି ଘଟଣାକୁ ନେଇ ରାଜନୀତି ଜୋର ଧରିଛି ।

ଅଭିଯୁକ୍ତ ଜୀବନ ଗୌଡ ହେଉଛି ଷଷ୍ଠ ସେମିଷ୍ଟର ଛାତ୍ର  । ଅକ୍ଟୋବର ୧୦ ତାରିଖରେ ସପ୍ତମ ସେମିଷ୍ଟରର ଛାତ୍ରୀଙ୍କୁ ଅଭିଯୁକ୍ତ ଦୁଷ୍କର୍ମ କରିଥିଲା ।  ପାଞ୍ଚ ଦିନ ପରେ ଅକ୍ଟୋବର ୧୫ ତାରିଖରେ ପୀଡ଼ିତା ଏନେଇ ଥାନାରେ ଅଭିଯୋଗ କରିଥିଲେ । ଏଫଆଇଆରରେ ପୀଡ଼ିତା ଛାତ୍ରୀ ଲେଖିଛନ୍ତି ଯେ  ଅଭିଯୁକ୍ତ ତାଙ୍କ ସହ ପୂର୍ବରୁ ପଢ଼ୁଥିଲେ । କିନ୍ତୁ ଖରାପ ରେଜଲ୍ଟ ହେବାରୁ ସେ ଷଷ୍ଠ ସେମିଷ୍ଟାରରେ ରହିଯାଇଥିଲେ । ତେଣୁ ସେ ପରସ୍ପରକୁ ଜାଣିଥିଲେ । ଘଟଣା ଦିନ, ପୀଡିତା କିଛି ପଢ଼ା ଜିନିଷପତ୍ର ସଂଗ୍ରହ କରିବା ପାଇଁ ଗୌଡଙ୍କୁ ଭେଟିଥିଲେ  । ମଧ୍ୟାହ୍ନ ଭୋଜନ ବିରତି ସମୟରେ, ଅଭିଯୁକ୍ତ ଗୌଡ ତାଙ୍କୁ ଅନେକ ଥର ଫୋନ୍ କରି ସପ୍ତମ ମହଲାକୁ ଡାକିଥିଲେ । ପୀଡ଼ିତା ଛାତ୍ରୀଙ୍କୁ ଅଭିଯୁକ୍ତ ଆର୍କିଟେକ୍ଚର ବ୍ଲକ୍ ନିକଟରେ ଭେଟିବାକୁ କହିଥିଲେ। ଯେତେବେଳେ ଛାତ୍ରୀ ସେଠାରେ ପହଞ୍ଚିଲେ, ସେ ତାଙ୍କୁ ଜୋରଜବରଦସ୍ତି ଚୁମ୍ବନ କରିବାକୁ ଚେଷ୍ଟା କରିଥିଲେ। ଏହାକୁ ଛାତ୍ରୀଜଣଙ୍କ ବିରୋଧ କରିଥିଲେ । ପରେ ଛାତ୍ରୀ ଲିଫ୍ଟରେ ଷଷ୍ଠ ମହଲାକୁ ଆସିଥିଲେ । ଜୀବନ ମଧ୍ୟ ପୀଡ଼ିତାଙ୍କ ପଛରେ ଆସି ତାଙ୍କୁ ପୁରୁଷ ୱାଶରୁମକୁ ଟାଣି ନେଇଥିଲେ । ସେଠାରେ ତାଙ୍କୁ ଯୌନ ନିର୍ଯାତନା ଦେବା ସହ ଦୁଷ୍କର୍ମ କରିଥିଲେ ବୋଲି ପୀଡ଼ିତା ଏଫଆଇଆର ରେ ଲେଖିଛନ୍ତି । ଛାତ୍ରୀଜଣଙ୍କ ପୁଣି ଲେଖିଛନ୍ତି,  ଆକ୍ରମଣ ସମୟରେ ଜୀବନ ୱାଶରୁମର ଦ୍ୱାର ବନ୍ଦ କରିଦେଇଥିଲେ  ।  ତାଙ୍କ ଫୋନ୍ କୁ ଛଡ଼ାଇ ନେଇଥିଲେ । ଏ ସମସ୍ତ ଘଟଣା ଅପରାହ୍ନ ୧:୩୦ ରୁ ୧:୫୦ ମଧ୍ୟରେ ଘଟିଥିଲା । ଘଟଣା ପରେ ଜୀବନ ଛାତ୍ରୀଙ୍କୁ ଫୋନ କରି  “ତୁମେ ପିଲ ବା  ବଟିକା ଖାଇବ କି ? ପ୍ରଶ୍ନ କରିଥିଲେ ।

ସେଦିନର ହଠାତ ଏଭଳି ଘଟଣାକୁ ନେଇ ପୀଡିତା ଡରିଯାଇଥିଲେ । ମାନସିକ ଚିନ୍ତାରେ କଣ କରିବେ ଚିନ୍ତା କରିପାରିନଥିଲେ ।  କାଳେ ତାଙ୍କ ଘରେ ରାଗିବେ, ତେଣୁ ଏହି ଘଟଣା ବିଷୟରେ ବାପା, ମାଆଙ୍କୁ କିଛି ଜଣାଇନଥିଲେ ।  ପରେ ତାଙ୍କ ଦୁଇ ବନ୍ଧୁଙ୍କୁ ଏହି ଘଟଣା ବିଷୟରେ କହିଥିଲେ। ତାଙ୍କ ବନ୍ଧୁମାନେ ତାଙ୍କୁ ସାହସ ଦେଇଥିଲେ । ପୋଲିସକୁ ଥାନାକୁ ଯିବା, ଏବଂ ପରିବାର ଲୋକଙ୍କୁ ଜଣାଇବାକୁ କହିବା ପରେ ପୀଡ଼ିତା ଛାତ୍ରୀ ପୋଲିସ ନିକଟରେ ଅଭିଯୋଗ କରିଥିଲେ  ।

ପୋଲିସ କହିଛି ଯେ ଛାତ୍ରୀ ଜଣକ ପ୍ରଥମେ ଭୟଭୀତ ଥିବାରୁ ଆକ୍ରମଣ ଏବଂ ଦୁଷ୍କର୍ମ ରିପୋର୍ଟ କରିବାକୁ ସଂକୋଚ କରିଥିଲେ। ପରେ ସେ ତାଙ୍କ ପିତାମାତାଙ୍କୁ ଜଣାଇଥିଲେ । ପୀଡ଼ିତା ପରିବାର ଲୋକଙ୍କ ସହ ହନୁମନ୍ତନଗର ପୋଲିସ ଷ୍ଟେସନରେ ଅଭିଯୋଗ ଦାଖଲ କରିବାକୁ ଆସିଥିଲେ।

ତେବେ କଲେଜ କର୍ତ୍ତୃପକ୍ଷ ଏହି ଘଟଣାକୁ ନେଇ କହିଛନ୍ତି ଯେ, ଘଟଣା ଘଟିଥିବା ମହଲାରେ କୌଣସି ସିସି ଟିଭି କ୍ୟାମେରା ଲଗାଯାଇ ନଥିଲା । ତେଣୁ ପୋଲିସ ତଦନ୍ତ କରୁଛି । ଯାହା ପ୍ରମାଣ ମିଳିବ ତାହା ଜଣାଇ ଦିଆଯିବ । ସେପଟେ ଏହି ଘଟଣାକୁ ନେଇ କର୍ଣ୍ଣାଟକରେ ବିରୋଧୀ ଭାରତୀୟ ଜନତା ପାର୍ଟି (ବିଜେପି) ପକ୍ଷରୁ, ଶାସକ କଂଗ୍ରେସ ସରକାରଙ୍କୁ ସମାଲୋଚନା କରାଯାଇଛି। କର୍ଣ୍ଣାଟକର ଆଇନ ଶୃଙ୍ଖଳା ଭାଙ୍ଗି ପଡ଼ିଥିବା ଅଭିଯୋଗ ହୋଇଛି। ଦଣ୍ଡ ଭୟ ରହୁନଥିବାରୁ ମହିଳାଙ୍କ ଉପରେ ନିର୍ଯାତନା ମାମଲା ବଢ଼ୁଥିବା ବିଜେପି କହିଛି ।  ମାତ୍ର ଚାରି ମାସ ମଧ୍ୟରେ, ଝିଅମାନଙ୍କ ଉପରେ 979 ଯୌନ ନିର୍ଯାତନା କର୍ଣ୍ଣାଟକରେ ଘଟିଛି। କେବଳ ବେଙ୍ଗାଲୁରୁରେ 114 ରୁ ଅଧିକ ମହିଳା ଦୁଷ୍କର୍ମ ମାମଲା ରିପୋର୍ଟ ହୋଇଛି। ରାଜ୍ୟ ସରକାରଙ୍କ ଅପରାଧିଙ୍କ ପ୍ରତି କୋହଳ ମନୋଭାବ ଯୋଗୁଁ ଆମର ମହିଳା ଏବଂ ପିଲାମାନେ ଭୟରେ ବଞ୍ଚୁଛନ୍ତି ବୋଲି ବିଜେପି ଅଭିଯୋଗ କରିଛି । ତେଣୁ ରାଜ୍ୟ ବିଜେପି ପକ୍ଷରୁ ଜାତୀୟ ମହିଳା କମିଶନ (NCW) ଙ୍କୁ ଏକ ଜରୁରୀ ଚିଠି ଲେଖାଯାଇଛି । ଏକ ତଥ୍ୟ ଅନୁସନ୍ଧାନକାରୀ ଦଳ ପଠାଇ ଏହି ମାମଲାର ତଦନ୍ତ ନିରପେକ୍ଷ ଭାବେ କରିବାକୁ ବିଜେପି ଦାବି କରିଛି । ସେପଟେ ପୀଡ଼ିତା ଛାତ୍ରୀଙ୍କ ମାନସିକ ସ୍ଥିତି ଭଲ ନଥିବା ପରିବାର ଲୋକ କହିଛନ୍ତି । ତାଙ୍କ ଝିଅକୁ ନ୍ୟାୟ ଦେବାପାଇଁ ସେମାନେ କୋର୍ଟରେ ଲଢ଼ିବେ ବୋଲି ସ୍ପଷ୍ଟ କରିଛନ୍ତି ।