ରାଜ୍ୟସ୍ତରୀୟ ଜାତୀୟ ସଡ଼କ ସୁରକ୍ଷା ମାସ-୨୦୨୬ ଉଦଘାଟିତ: ‘ଆମ ସୁବାହକ’ ଯୋଜନାର ଶୁଭାରମ୍ଭ

ଭୁବନେଶ୍ୱର : ରାଜଧାନୀର ମହାତ୍ମା ଗାନ୍ଧୀ ମାର୍ଗଠାରେ ‘ଜାତୀୟ ସଡ଼କ ସୁରକ୍ଷା ମାସ-୨୦୨୬’ର ରାଜ୍ୟସ୍ତରୀୟ ଉତ୍ସବ ମହାସମାରୋହରେ ଉଦଘାଟିତ ହୋଇଯାଇଛି। ଓଡ଼ିଶା ବିଧାନସଭାର ବାଚସ୍ପତି ଶ୍ରୀମତୀ ସୁରମା ପାଢ଼ୀ ମୁଖ୍ୟ ଅତିଥି ଭାବେ ଯୋଗଦେଇ ଏହି ଅଭିଯାନକୁ ବ୍ୟାପକ କରିବାକୁ ଆହ୍ୱାନ ଦେଇଛନ୍ତି।  ବାଣିଜ୍ୟ ଓ ପରିବହନ ମନ୍ତ୍ରୀ  ବିଭୂତି ଭୂଷଣ ଜେନା ‘ଶିକ୍ଷା ରୁ ସୁରକ୍ଷା ଓ ପ୍ରଯୁକ୍ତି ରୁ ପରିବର୍ତ୍ତନ’ ଆଦର୍ଶରେ ସରକାରଙ୍କ ପ୍ରାଥମିକତା ବିଷୟରେ ଆଲୋକପାତ କରିଥିଲେ। ଏହି ଅବସରରେ ‘ଆମ ସୁବାହକ’ ଯୋଜନାର ଶୁଭାରମ୍ଭ କରାଯାଇ ମହିଳା ହିତାଧିକାରୀଙ୍କୁ ସ୍ୱାବଲମ୍ବୀ କରିବା ପାଇଁ ଗାଡ଼ିର ଚାବି ପ୍ରଦାନ କରାଯାଇଥିଲା। ଦୁର୍ଘଟଣା ରୋକିବା ପାଇଁ ବସ୍‌ଗୁଡ଼ିକରେ ‘ସୁବାହକ ସୁବିଧା କୀଟ’ -ନିଦ୍ରା ଓ ମଦ୍ୟପାନ ଚିହ୍ନଟକାରୀ, ଏବଂ ଆଇଆଇଟି ମାଦ୍ରାସ ସହଭାଗିତାରେ ‘ସଡ଼କ ସୁରକ୍ଷା ଡ୍ୟାଶବୋର୍ଡ’ ଲୋକାର୍ପିତ ହୋଇଛି।  କାର୍ଯ୍ୟକ୍ରମରେ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ, ଗୋକୁଳାନନ୍ଦ ମଲ୍ଲିକ, ବ୍ରାଣ୍ଡ ଆମ୍ବାସାଡର ସିଦ୍ଧାନ୍ତ ମହାପାତ୍ର, ସୁଦର୍ଶନ ପଟ୍ଟନାୟକ ଓ ଶ୍ରୁତି ମହାପାତ୍ର ପ୍ରମୁଖ ଯୋଗଦେଇ ଜନସଚେତନତା ଉପରେ ଗୁରୁତ୍ୱ ଦେଇଥିଲେ। ପରିବହନ ସଚିବ ଶ୍ରୀମତୀ ଉଷା ପାଢ଼ୀ ‘4E’ ରଣନୀତି ବିଷୟରେ ସୂଚନା ଦେଇଥିଲେ।