ପୁଅ ନହେବାରୁ ଦୁଇ ଝିଅ ଓ ଗର୍ଭବତୀ ସ୍ତ୍ରୀକୁ ପୋଖରୀରେ ବୁଡ଼ାଇ ମାରିଦେଲା ବାପା

ତେଲେଙ୍ଗାନାର ହନମକୋଣ୍ଡା ଜିଲ୍ଲାରେ ଏକ ଚାଞ୍ଚଲ୍ୟକର ହତ୍ୟା ଘଟଣା ସାମ୍ନାକୁ ଆସିଛି। ଆଉ ପୁଅ ଜନ୍ମ ହେବ ନାହିଁ ବୋଲି ଜାଣି ଗର୍ଭବତୀ ସ୍ତ୍ରୀ ଓ ତାଙ୍କ ଦୁଇ ଝିଅଙ୍କୁ ସ୍ୱାମୀ ପୋଖରୀରେ ବୁଡାଇ ହତ୍ୟା କରିଥିବା ଅଭିଯୋଗ ହୋଇଛି।

ପ୍ରଥମେ ଏହାକୁ ଆକ୍ସିଡେଣ୍ଟ ବୋଲି ଦାବି କରାଯାଇଥିଲା, କିନ୍ତୁ ପରେ ପରିବାରର ଅଭିଯୋଗ ଓ ପୋଲିସ୍ ତଦନ୍ତରେ ହତ୍ୟାର ସତ୍ୟ ବାହାରିଛି।ନିହତ ମହିଳାଙ୍କ ନାମ ଫର୍ହାତ୍ (୨୬)। ସେ ତୃତୀୟ ସନ୍ତାନର ଗର୍ଭବତୀ ଥିଲେ। ତାଙ୍କର ଦୁଇ ଝିଅ ଉମେରା (୮) ଓ ଆୟେଶା (୬) ଅଛନ୍ତି। ସମସ୍ତଙ୍କ ମୃତଦେହ ପୁନ୍ନେଲୁ ଗ୍ରାମର ଇନାବୋଲୁ ମଣ୍ଡଳରେ ଥିବା ଏକ ପୋଖରୀରୁ ଉଦ୍ଧର କରାଯାଇଛି । ଫର୍ହାତ୍‌ଙ୍କ ସ୍ୱାମୀ ମହମ୍ମଦ୍ ଆଜହାରୁଦ୍ଦିନ୍ ପ୍ରଥମେ ପୋଲିସ୍‌କୁ କହିଥିଲେ ଯେ, ତାଙ୍କ ସ୍ତ୍ରୀ ଓ ଝିଅମାନେ ପୋଖରୀରେ ପଡ଼ି ମୃତ୍ୟୁବରଣ କରିଛନ୍ତି।

ସ୍ୱାମୀ କହିଥିଲେ ଯେ ସେ ଏସି ରୁମ୍‌ରେ ଥିବା ସମୟରେ ଏହି ଦୁର୍ଘଟଣା ଘଟିଥିଲା। କିନ୍ତୁ ଫର୍ହାତ୍‌ଙ୍କ ପିତା ଏସ୍‌କେ ଅଲି ଏହାକୁ ଅସ୍ୱୀକାର କରି ଅଭିଯୋଗ କରିଛନ୍ତି ଯେ ଆଜହାରୁଦ୍ଦିନ୍ ଜାଣିଶୁଣି ହତ୍ୟା କରିଛନ୍ତି।ପୋଲିସ୍ ସୂତ୍ରରୁ ଜଣାପଡ଼ିଛି ଯେ ଆଜହାରୁଦ୍ଦିନ୍ ପୁଅ ଚାହୁଁଥିଲେ। ଫର୍ହାତ୍ ଗର୍ଭବତୀ ହେବା ପରେ ଅବୈଧ ଲିଙ୍ଗ ନିର୍ଣ୍ଣୟ ପରୀକ୍ଷାରେ ଝିଅ ହେବ ବୋଲି ଜଣାପଡ଼ିଥିଲା।

ଏହା ପରେ ସେ ଗର୍ଭପାତ କରିବାକୁ ଚାହୁଁଥିଲେ, କିନ୍ତୁ ଫର୍ହାତ୍ ରାଜି ହୋଇ ନଥିଲେ। ଏହି କ୍ରୋଧରେ ସେ ପରିବାରକୁ ପୋଖରୀକୁ ନେଇ ସମସ୍ତଙ୍କୁ ପାଣିରେ ଠେଲି ଦେଇଥିବା ଅଭିଯୋଗ ହୋଇଛି। ଘଟଣା ସମୟରେ ସେ ସିସିଟିଭି କ୍ୟାମେରା ବନ୍ଦ କରିଥିବା ମଧ୍ୟ ଅଭିଯୋଗ ରହିଛି।ପୋଲିସ୍ ଆଜହାରୁଦ୍ଦିନ୍‌କୁ ଗିରଫ କରି ଜେରା କରୁଛି। ହନମକୋଣ୍ଡା ପୋଲିସ୍ କମିଶନର ସନ୍‌ପ୍ରୀତ୍ ସିଂହ ଘଟଣାସ୍ଥଳ ପରିଦର୍ଶନ କରି ତଦନ୍ତ ନିର୍ଦ୍ଦେଶ ଦେଇଛନ୍ତି। ଏହି ଘଟଣାରେ ଏକ ହତ୍ୟା ମାମଲା ରୁଜୁ କରାଯାଇଛି।