ବଲିଉଡ୍ ଅଭିନେତା ରଣବୀର କପୂର ନିତେଶ୍ ତିୱାରୀଙ୍କ ବହୁ ପ୍ରତୀକ୍ଷିତ ଫିଲ୍ମ ‘ରାମାୟଣ’ରେ ଡବଲ୍ ରୋଲ୍ କରୁଥିବାର ନିଶ୍ଚିତ କରିଛନ୍ତି। ସେ ପ୍ରଭୁ ଶ୍ରୀରାମଙ୍କ ମୁଖ୍ୟ ଭୂମିକା ସହିତ ପର୍ଶୁରାମଙ୍କ ଚରିତ୍ରରେ ମଧ୍ୟ ଅଭିନୟ କରିବେ। ପର୍ଶୁରାମ ହେଉଛନ୍ତି ଭଗବାନ୍ ବିଷ୍ଣୁଙ୍କର ଏକ ପୂର୍ବ ଅବତାର। ରଣବୀର କପୂର ଏହି ଡବଲ୍ ରୋଲ୍ ବିଷୟରେ କହିଛନ୍ତି, “ପ୍ରଭୁ ଶ୍ରୀରାମ ଏବଂ ପ୍ରଭୁ ପର୍ଶୁରାମଙ୍କ ଭୂମିକା କରିବାର ସୁଯୋଗ ପାଇ ମୁଁ ଅତ୍ୟନ୍ତ ଖୁସି। ଏହା ଏକ ଅସାଧାରଣ ଅଭିଜ୍ଞତା ହେବ।”
ଫିଲ୍ମର ସଦ୍ୟ ଟିଜର୍ରେ ଏହି ଡବଲ୍ ରୋଲ୍ ସମ୍ପର୍କରେ ଆଭାସ ମିଳିଥିଲା, କିନ୍ତୁ ରଣବୀର ଏହାକୁ ଆନୁଷ୍ଠାନିକ ଭାବେ ନିଶ୍ଚିତ କରିଛନ୍ତି। ନିତେଶ୍ ତିୱାରୀଙ୍କ ଏହି ମହାକାବ୍ୟିକ ଫିଲ୍ମଟି ଦୁଇ ଭାଗରେ ନିର୍ମିତ ହେବ। ପ୍ରଥମ ଭାଗ (ରାମାୟଣ ପାର୍ଟ ୧) ଚଳିତ ବର୍ଷ ଦୀପାବଳୀ ୨୦୨୬ରେ ବିଶ୍ୱବ୍ୟାପୀ ମୁକ୍ତିଲାଭ କରିବ। ଦ୍ୱିତୀୟ ଭାଗ ଆଗାମୀ ବର୍ଷ ଦୀପାବଳୀ ୨୦୨୭ରେ ରିଲିଜ୍ ହେବ ବୋଲି ଜଣାପଡ଼ିଛି।
ଫିଲ୍ମରେ ରଣବୀର କପୂର ପ୍ରଭୁ ଶ୍ରୀରାମଙ୍କ ଭୂମିକାରେ ଅଭିନୟ କରୁଥିବା ବେଳେ ସାଇ ପଲ୍ଲବି ସୀତାଙ୍କ ଚରିତ୍ରରେ ଏବଂ ଯଶ୍ ରାବଣଙ୍କ ଭୂମିକାରେ ଦେଖାଯିବେ। ସନ୍ନି ଦେଓଲ୍ ହନୁମାନ୍ଙ୍କ ଭୂମିକାରେ ଅଭିନୟ କରୁଥିବାର ଖବର ରହିଛି। ରଣବୀର କପୂର ଏହା ପୂର୍ବରୁ ‘ଶମଶେରା’ ଫିଲ୍ମରେ ଡବଲ୍ ରୋଲ୍ କରିଥିଲେ। ‘ରାମାୟଣ’ ହେବ ତାଙ୍କର ଦ୍ୱିତୀୟ ଡବଲ୍ ରୋଲ୍ ଫିଲ୍ମ।
ଏହି ପ୍ରୋଜେକ୍ଟ୍ ଭାରତୀୟ ସିନେମାର ସବୁଠାରୁ ବଡ଼ ପ୍ରୋଜେକ୍ଟ୍ ମଧ୍ୟରୁ ଗୋଟିଏ ବୋଲି ବିବେଚନା କରାଯାଉଛି।ଫିଲ୍ମ ପ୍ରଯୋଜକ ନମିତ୍ ମାଲହୋତ୍ରା ଏବଂ ନିର୍ଦେଶକ ନିତେଶ୍ ତିୱାରୀଙ୍କ ଏହି ଯୁଗଳବନ୍ଦୀ ଦର୍ଶକଙ୍କ ମଧ୍ୟରେ ପ୍ରବଳ ଉତ୍ସାହ ସୃଷ୍ଟି କରିଛି। ରାମାୟଣର ପ୍ରଥମ ଝଲକ ‘ରାମ’ ହନୁମାନ୍ ଜୟନ୍ତୀ ଅବସରରେ ପ୍ରକାଶ ପାଇଥିଲା ଏବଂ ଏହା ବହୁ ପ୍ରଶଂସା ଲାଭ କରିଛି।
