ପଶ୍ଚିମବଙ୍ଗରେ ଆଜିଠୁ ଆରମ୍ଭ ହୋଇଛି ବିଜେପି ସରକାର। ଆଜି ମୁଖ୍ୟମନ୍ତ୍ରୀ ଭାଵେ ଶପଥ ନେଇଛନ୍ତି ଶୁଭେନ୍ଦୁ ଅଧିକାରୀ। ଏହାରି ଭିତରେ ଶପଥ ଗ୍ରହଣ ଉତ୍ସବରେ ଦେଖିବାକୁ ମିଳିଥିଲା ଏକ ଭିନ୍ନ ଦୃଶ୍ୟ। ମଞ୍ଚ ଉପରେ ଜଣେ ବରିଷ୍ଠ ବିଜେପି ନେତାଙ୍କୁ ମୁଣ୍ଡିଆ ମାରିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଯାହାର ଭିଡିଓ ଏବେ ବେଶ୍ ଭାଇରାଲ ହେଉଛି।
ପଶ୍ଚିମବଙ୍ଗରେ ବିଜେପିର ମୂଳଦୁଆ ପକାଇଥିବା ସବୁଠାରୁ ବରିଷ୍ଠ ନେତାଙ୍କ ମଧ୍ୟରୁ ଜଣେ, ହେଉଛନ୍ତି ୯୮ ବର୍ଷୀୟ ମାଖନଲାଲ ସରକାର । ସେ ପୁଣି ଥରେ ଚର୍ଚ୍ଚାର ପରିସରକୁ ଆସିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପଶ୍ଚିମବଙ୍ଗରେ ବିଜେପିର ଶପଥ ଗ୍ରହଣ ସମାରୋହରେ ତାଙ୍କର ଆଶୀର୍ବାଦ ଲୋଡ଼ିଥିଲେ। ଯାହା ଦଳର ବରିଷ୍ଠ ନେତା ଏବଂ ପ୍ରତିଷ୍ଠାତା ସଦସ୍ୟଙ୍କ ପ୍ରତି ସମ୍ମାନର ପ୍ରତୀକ। ମାଖନଲାଲ ସରକାରଙ୍କ ରାଜନୈତିକ ଯାତ୍ରା ଦଳର ପ୍ରାରମ୍ଭିକ ସଂଘର୍ଷ ଏବଂ ବିସ୍ତାରର କାହାଣୀ ବଖାଣେ।
ସ୍ୱାଧୀନତା ପରବର୍ତ୍ତୀ ଭାରତରେ ଜାତୀୟତାବାଦୀ ଆନ୍ଦୋଳନର ପ୍ରାରମ୍ଭିକ ଏବଂ ପ୍ରମୁଖ ତୃଣମୂଳ ସ୍ତରର ନେତାମାନଙ୍କ ମଧ୍ୟରୁ ମାଖନଲାଲ ସରକାର ଜଣେ ଥିଲେ। ଜାତୀୟତାବାଦ ପ୍ରତି ତାଙ୍କର ଉତ୍ସର୍ଗୀକୃତତା ଦଶନ୍ଧି ଧରି ବ୍ୟାପିଛି। ୧୯୫୨ ମସିହାରେ ଯେତେବେଳେ ଶ୍ୟାମା ପ୍ରସାଦ ମୁଖାର୍ଜୀ କାଶ୍ମୀରରେ ଭାରତୀୟ ତ୍ରିରଙ୍ଗା ଉତ୍ତୋଳନ ପାଇଁ ଏକ ଐତିହାସିକ ଆନ୍ଦୋଳନର ନେତୃତ୍ୱ ନେଇଥିଲେ, ମାଖନଲାଲ ଏହି ଅଭିଯାନରେ ତାଙ୍କ ସହିତ ଯୋଗ ଦେଇଥିଲେ।ଏହି ଆନ୍ଦୋଳନ ସମୟରେ ତାଙ୍କୁ କାଶ୍ମୀରରେ ଗିରଫ ମଧ୍ୟ କରାଯାଇଥିଲା।
୧୯୮୦ ମସିହାରେ ଯେତେବେଳେ ଭାରତୀୟ ଜନତା ପାର୍ଟି ଆନୁଷ୍ଠାନିକ ଭାବରେ ଗଠିତ ହେଲା, ସେ ପଶ୍ଚିମବଙ୍ଗରେ ସଂଗଠନ ଗଠନର ଦାୟିତ୍ୱ ଗ୍ରହଣ କଲେ। ୧୯୮୧ ମସିହାରୁ, ସେ ଲଗାତାର ସାତ ବର୍ଷ ପାଇଁ ଜିଲ୍ଲା ସଭାପତି ଭାବରେ କାର୍ଯ୍ୟ କରିଥିଲେ। ତାଙ୍କୁ ପଶ୍ଚିମ ଦିନାଜପୁର, ଜଳପାଇଗୁଡ଼ି ଏବଂ ଦାର୍ଜିଲିଂ ଜିଲ୍ଲା ପାଇଁ ସଂଗଠନ ସଂଯୋଜକ ଭାବରେ ନିଯୁକ୍ତ କରାଯାଇଥିଲା। ତାଙ୍କର ନେତୃତ୍ୱ ଏବଂ ସଂଗଠନ ଦକ୍ଷତା ଏତେ ପ୍ରଭାବଶାଳୀ ଥିଲା ଯେ ମାତ୍ର ଗୋଟିଏ ବର୍ଷ ମଧ୍ୟରେ ସେ ଦଳରେ ପ୍ରାୟ ୧୦,୦୦୦ ନୂତନ ସଦସ୍ୟଙ୍କୁ ଯୋଡିଥିଲେ।
