ଭାରତରେ ଚିନି ଦର ବୃଦ୍ଧିକୁ ନଜରରେ ରଖି କେନ୍ଦ୍ର ସରକାର ଏକ ବଡ଼ ନିଷ୍ପତ୍ତି ନେଇଛନ୍ତି। ସରକାର ଚିନି ରପ୍ତାନି ଉପରେ ପ୍ରତିବନ୍ଧକ ଲାଗୁ କରିଛନ୍ତି। ଏହି ପ୍ରତିବନ୍ଧକ ୩୦ ସେପ୍ଟେମ୍ବର ୨୦୨୬ ପର୍ଯ୍ୟନ୍ତ କିମ୍ବା ପରବର୍ତ୍ତୀ ଆଦେଶ ଆସିବା ପର୍ଯ୍ୟନ୍ତ ଜାରି ରହିବ।
ସରକାରଙ୍କ ନୋଟିଫିକେସନ୍ ଅନୁସାରେ ର ଶୁଗର, ହ୍ୱାଇଟ୍ ଶୁଗର ଏବଂ ରିଫାଇନ୍ଡ ଶୁଗର — ତିନୋଟି ପ୍ରକାର ଚିନିକୁ ଏହି ନିଷେଧରେ ସାମିଲ କରାଯାଇଛି।
ଦେଶୀୟ ବଜାରରେ ଚିନି ଦର ବଢ଼ୁଥିବା ଓ ସପ୍ଲାଇ ଉପରେ ଚାପ ବଢ଼ିବାରୁ ସରକାର ଏହି ପଦକ୍ଷେପ ନେଇଛନ୍ତି। ରପ୍ତାନି ବନ୍ଦ ହେବାରୁ ଦେଶ ଭିତରେ ଚିନି ଉପଲବ୍ଧତା ବଢ଼ିବ ଏବଂ ଦର ନିୟନ୍ତ୍ରଣରେ ରହିବ ବୋଲି ଆଶା କରାଯାଉଛି।
https://x.com/ANI/status/2054736874582028706?s=20
ତେବେ କିଛି ବିଶେଷ କ୍ଷେତ୍ରକୁ ଏହି ପ୍ରତିବନ୍ଧରୁ ଛାଡ଼ ଦିଆଯାଇଛି। EU ଓ USA କୁ CXL ଏବଂ TRQ କୋଟା ଅନୁସାରେ ହେଉଥିବା ରପ୍ତାନି, Advance Authorization Scheme (AAS) ଅଧୀନରେ ରପ୍ତାନି ଏବଂ ଅନ୍ୟ ଦେଶର ଖାଦ୍ୟ ସୁରକ୍ଷା ଆବଶ୍ୟକତା ପାଇଁ ସରକାର-ଟୁ-ସରକାର ଚୁକ୍ତି ଅନୁସାରେ ହେଉଥିବା ଚିନି ରପ୍ତାନି ଜାରି ରହିବ। ଯେଉଁ ଚିନି ଖେପ ପୂର୍ବରୁ ରପ୍ତାନି ପ୍ରକ୍ରିୟାରେ ଅଛି, ସେଗୁଡ଼ିକୁ ମଧ୍ୟ ଛାଡ଼ ମିଳିଛି।
ଭାରତ ବ୍ରାଜିଲ୍ ପରେ ବିଶ୍ୱର ଦ୍ୱିତୀୟ ସର୍ବବୃହତ୍ ଚିନି ରପ୍ତାନିକାରୀ ଦେଶ। ଦେଶରେ ଅଧିକ ଉତ୍ପାଦନ ଆଶାରେ ସରକାର ପୂର୍ବରୁ ୧୫ ଲକ୍ଷ ମେଟ୍ରିକ୍ ଟନ୍ ଚିନି ରପ୍ତାନିକୁ ଅନୁମତି ଦେଇଥିଲେ। କିନ୍ତୁ ପ୍ରମୁଖ ଗଣ୍ଡା ଚାଷ ଅଞ୍ଚଳରେ ଉତ୍ପାଦନ କମିବାରୁ ଏବେ ଚିନି ଉତ୍ପାଦନ ଦେଶୀୟ ଚାହିଦାଠାରୁ କମ୍ ରହିବାର ସମ୍ଭାବନା ରହିଛି।
ରୟଟର୍ସ ରିପୋର୍ଟ ଅନୁସାରେ, ଭାରତର ଏହି ସିଦ୍ଧାନ୍ତରେ ବିଶ୍ୱ ବଜାରରେ ଚିନି ଦର ବଢ଼ିପାରେ। ଏଥିରୁ ଥାଇଲ୍ୟାଣ୍ଡ ଏବଂ ବ୍ରାଜିଲ୍ ଭଳି ଦେଶମାନେ ଏସିଆ ଓ ଆଫ୍ରିକାର ଦେଶଗୁଡ଼ିକୁ ଅଧିକ ଚିନି ରପ୍ତାନି କରିପାରିବେ।
